（ciep banj 2）

——Daezok caemhcaiq hengz ndei gij leixniemh hwngfat moq, roengzrengz doi- caenh yiengh hwngfat caetliengh sang, doidoengh cauhlaeb aen gapgyaq hwngfat moq, bae guh gaiq hong gaijgwz gij gezgou mbiengj gunghawj, ceiqdingh baenzroix canloz hungnaek gvaengxdieg ik daengz daengxbuenz haenx, gij saedlig ginghci guek raeuz ndaej yathwnj yienhda raixcaix. Swnghcanj cungjciz ndaw guek daj hajcib seiq fanh ik maenz demmaj daengz it bak itcib seiq fanh ik maenz, ginghci cungjliengh guek raeuz youq ginghci seiqgyaiq ciemq daengz bak faenh cih cibbet diemj haj, daezsang caet diemj ngeih aen bakfaendiemj, onj youq vih daihngeih gwnz seiqgyaiq; swnghcanj cungjciz ndaw guek dan bingz suenq daengz gak boux daj sam fanh gouj cien bet bak maenz demgya daengz bet fanh it cien maenz. Gij gveihmoz hangzdajcauh、gij cienzrom vaivei onj youq vih daih’it gwnz seiqgyaiq. Daengx biengz gij cienz yungh daeuj yenzgiu haifat de daj it fanh ik maenz gyalai daengz song fanh bet cien ik maenz, baiz youq vih daihngeih gwnz seiqgyaiq, aen cungjsoq boux guh yenzgiu haifat baiz youq vih daih’it gwnz seiqgyaiq. Yiengh yenzgiu giekdaej caeuq gij cauhmoq codaeuz mboujduenh gyagiengz, mbangj yiengh gisuz goekdaej youqgaenj ndaej dwkbyoengq, gij canjnieb saenhwng nangq daengxbuenz de fatmaj hungcoek, dap vunz mbin mbwn、damq aen ronghndwen damq aen hojsingh、damqcaek giz laeg ndaw haij giz laeg lajnamh、cauhgiz gisongih、veisingh daujhangz、liengswj saenqsik、hwzden gisuz、cauhguh feihgih loet、swnghvuz yihyoz daengj aeundaej cwngzgoj hungnaek, haeuj daengz aen hangz- lied yiengh guekgya ak cauhmoq.

——Baengh cungj damjliengh cwngci hungloet bae cienzmienh gyalaeg gaijgwz, haujlai lingjyiz ndaej daj goek bengwz、daj gwnz daengz laj dauq nda、baenz aen bae dauq laeb, aen dijhi ceihleix guekgya caeuq gij bonjsaeh ceihleix de ndaej lai gaenhwnj ciuhneix haujlai.

——Saedhengz aen canloz engqgya gaenxmaenx cawjdoengh guh hailangh, caezlaeb “it rangh it loh” bienqbaenz gaiq canjbinj lai guek caezcaemh caeuq aen bingzdaiz lai guek gapguh ndaejdaengz vunzlai angqcoux haenx. Guek raeuz baenz le boux doengzdoih gaicawx youqgaenj it bak seiqcib lai aen guekgya caeuq digih, aen cungjsoq gaicawx huqyiengh baiz youq seiqgyaiq daih’it, supyinx gij swhbwnj rog guek caeuq doiq rog douzswh baiz youq baihgonq seiqgyaiq, guhbaenz aen gapgyaq doiq rog hailangh gvaengxlaengx engq hung、lingjyiz engq gvangq、cwngzsw engq laeg.

——Dingjmaenh byaij diuz roen cwngci fazcanj yiengh sevei cujyi miz gij daegsaek Cungguek, gizgiz yienghyiengh cungj hawj yinzminz minzcuj ronzdoeng goekbyai, yiengh minzcuj cwngci sevei cujyi ciuq cidu、hab gveihfan、miz bouhloh cienzmienh doihaeuj, yiengh minzcuj doxyaeng sevei cujyi gvangq- langh mbehai, yinzminz danggya guhcawj engqgya netsaed, aen gapgyaq cungjdaej cienzmienh ciuqfap guenj guek daihdaej cauxbaenz.

——Dinghlaeb caeuq dingjmaenh yiengh gaenbonj cidu aeu Majgwzswh Cujyi dazyinx yisiz hingzdai, seizdaih moq gij lijlun cauhmoq aen Dangj ndaej vunzlai dawz haeuj uk bae, aen hwzsinh gyacizgvanh sevei cujyi cienzboq gvangqlangh, gij conzdungj vwnzva maenhndei Cunghvaz ndaej doenggvaq dajcauh bae cienjvaq、cauhmoq bae hwngfat, gij saehnieb vwnzva ngoenz beij ngoenz mwnhoengh, vangjloz swnghdai laebdaeb bienq ndei, gij hingzseiq aen lingjyiz yisiz hingzdai ndaej daj daengxbuenz、 daj goekgaen bae cienj- bienq.

——Haeujlaeg hengz ndei aen swhsiengj hwngfat aeu yinzminz guh goek, laebdaeb roengzrengz guh daengz nomj ndaej ganq、hag ndaej son、guh ndaej gwn、bingh ndaej yw、geq ndaej ciengx、youq miz ranz、nyieg ndaej rex, ndwenngoenz beksingq yienghyiengh ndaej gaijndei. Moix boux bingzyaenz aiq yaek lai gyaeu daengz caetcib bet diemj ngeih bi. Gij souhaeuj ndaej yungh dan bingz suenq daengz gak boux gihminz daj it fanh roek cien haj bak maenz gyalai daengz sam fanh haj cien it bak maenz. Hwnqbaenz aen dijhi gyauyuz、aen dijhi ndawbiengz baujcang、aen dijhi ywbingh veiswngh daengx seiqgyaiq ceiq hung, yinzminz ginzcung roxnyinh ndaejdaengz、roxnyinh vuenyungz、roxnyinh ancienz engqgya cung- saed、engq miz baujcang、engq ndaej lienzdaemh, doengzcaez fouqmiz aeundaej yiengh ndei moq.

——Dingjmaenh raemx saw bya heu couh dwg bya gim bya ngaenz, dingjmaenh doengzcaez baujhoh caeuq doengzcaemh ceihleix bya raemx ndoeng naz huz diegnywj diegsa, cienzmienh、daengx biengzdieg、daj goek daengz byai lai roengzrengz baujhoh swnghdai vanzging, swnghdai vanzging baujhoh miz ok yiengh bienqvaq daengxbuenz bienq ndei doenghbaez caengz miz gvaq haenx, guekcoj raeuz mbwn engq seuq、 bya engq heu、 raemx engq saw.

——Hengz ndei aen swhsiengj daengx- buenz guekgya ancienz, mbouj doenghngauz saek di bae henhoh gij cawjgienz、 ancienz、leih’ik hwngfat guekgya, guekgya ancienz cienzbuenz ndaej gyaak. Aen cidu ceihleix ndawbiengz caez laeb caez guenj caez yungh caiq lai caezcienz, gaiq hong cienmonz baet yak cawz rwix cug mboengq cug mbaek aeu ndaej cingzgoj, miz rengz bae wngqdoiq baenzroix diencai hungnaek, hwnqguh aen Cungguek bingzan ndaej yamq hwnj mbaek engq sang.

——Dinghlaeb aen moegbiu ak bing seizdaih moq Dangj raeuz, hengz ndei aen swhsiengj ak bing seizdaih moq Dangj raeuz, hengz ndei diuz canloz fuengcim bingsaeh seizdaih moq, dingjmaenh seizseiz aeu Dangj lingjdauj bingdoih yinzminz, dauqcungz laeb- dingh gij dijci lingjdauj cijveih bingdoih yinzminz、aen dijhi ligliengh bingsaeh ciuhneix、gij cwngcwz cidu bingsaeh, gij dijci、gezgou、gwzgiz、yienghsiengq bingdoih yinzminz bienq ndaej moqsak.

——Cienzmienh cinjdeng doihaeuj gij hong hengz “aen guekgya ndeu song cungj cidu”, dawzmaenh diuz fuengcim “aen guekgya ndeu song cungj cidu”、“vunz Yanghgangj guenj Yanghgangj”、 “vunz Aumwnz guenj Aumwnz”、gagguenj lailai neix, coihawj Yanghgangj daj luenhnauh daengz andingh byaij haeuj mboengq daj andingh daengz hwnghoengh bae, Yanghgangj、Aumwnz ndaej guhdaengz ciengzgeiz onjdingh hwngfat. Raeuz daezok aen fanghloz daengxbuenz gaijgez gij vwndiz Daizvanh seizdaih moq, coihawj song hamq gyaulouz doxgap, baenzbaenz cungj fanjdoiq gij guhfap faenmbek “Daizduz”, baenzbaenz cungj fanjdoiq gij seiqlig baihrog capfwngz saehguek, youq ndaw gvanhaeh song hamq dawzmaenh gienzguhgoek caeuq gienz- cawjdoengh.

——Cienzmienh doicaenh yiengh vaigyauh guekhung miz gij daegsaek Cung- guek, doidoengh cauhlaeb aen minghyinh caezcaemh vunz lajmbwn, giendingh henhoh gij goengbingz cingqngeih gozci, mbouj doenghngauz saekdi bae fanjdoiq sojmiz danhbenh cujyi、 baujhu cujyi、hengzmanz haephwk. Lai bae caeuqfaenh gaijgwz caeuq hwnqguh aen dijhi ceihleix lajmbwn, guek raeuz ndaej bae yingjyangj、gamjciu、dajcauh seiqgyaiq engq lai.

——Coihawj cienzmienh yiemzhaenq guenj Dangj guh haeuj laeg bae, dawzdingh dizdiet lij aeu fagcuiz geng, daezok caeuq doeksaed gij cungjiugouz guhhung guh’ak aen Dangj seizdaih moq, aeu guh ndei gij hongsaeh cwngci aen Dangj bae dazlingx guhhung guh’ak aen Dangj gak hangh gunghcoz, ciengzgeiz mbouj dingz bae niujcingq fungheiq dawzyiemz gijliz, aeu gij cingsaenz dok ding daeuj niujcingq ceihleix “seiq fung”, sabdingz le doengh gij fungheiq rwix ciengzgeiz sab mbouj dingz haenx, niujcingq ceihleix le doengh gij binghnyangq baezgeq lai bi cungj cawz mbouj bae de. Guh le gaiq hong fanj nduknaeuh doenghbaez caengz miz gvaq, aeu cungj sawjmingh dangrap “daekcoih cien bak boux、mbouj vei cibseiq ik” bae cawz bingh ceih luenh, ronj bae doihaeuj mbouj gamj nduknaeuh、mbouj ndaej nduknaeuh、mbouj siengj nduknaeuh, “dwk guk”、“bek nyaek”、“dwk nyaen” lai yiengh caez guh, gaiq hong fanj nduknaeuh ndaej hingz dingh caemhcaiq ndaej cienzmienh gyamaenh, siucawz le gij huxndumj youqgaenj baihndaw Dangj、guekgya、bingdoih. Ginggvaq mboujduenh roengzrengz bae guh, Dangj raeuz ra ndaej le aen dapanq daihngeih, hix couhdwg doenggvaq gag gaij bienq ndei bae saet ok andingh、doengh- luenh、hwnghoengh、doekbaih yiengh hopgeiz lizsij neix, saedbauj Dangj ciengxlwenx mbouj nduk、mbouj naeuh、mbouj haeu.

Siz Ginbingz biujsiq, bietdingh aeu singjsag yawj daengz, gij hong raeuz lij miz di guh ndaej mbouj ndei, bungzdaengz gunnanz caeuq vwndiz mbouj noix. Doiq doengh gij vwndiz neix, raeuz gaenq yungh le baenzroix banhfap bae gaijgez, gvaqlaeng itdingh aeu lai roengzrengz bae guh dem.

Siz Ginbingz daegbied gangj daengz, gij cingzcik hungmbwk seizdaih moq dwg Dangj caeuq yinzminz caezcaemh buek okdaeuj、guh okdaeuj、haenqguh okdaeuj!

（cienj banj 4）