（ciep banj 1）

Aen cawjdaez baez daihhoih neix dwg: Yaengxsang fan geiz hungmbwk yiengh sevei cujyi miz gij daegsaek Cungguek, cienzmienh gvancez Aen Swhsiengj Sevei Cujyi Miz Gij Daegsaek Cungguek Seizdaih Moq, haenq- rengz fatyiengz gij cingsaenz laeb Dangj hungmbwk, gagsaenq gag’ak、souj goek cauh- moq, haenqheiq buekguh、daihdamj baenaj, vih cienzmienh hwnqguh aen guekgya sevei cujyi yendaiva、cienzmienh doicaenh Cunghvaz Minzcuz fukhwng hungmbwk bae doxgiet buekguh.

Dauqyawj gij gunghcoz haj bi gvaqbae neix seiz, Siz Ginbingz gangj, Cibgouj Daih doxdaeuj haj bi neix, dwg haj bi gig mbouj bingzciengz、gig mbouj yungzheih. Dangjcunghyangh dungj- couz aen canloz daengxbuenz Cunghvaz Minzcuz fukhwng hungmbwk caeuq aen geizseiq boekbienq seiqgyaiq bak bi caengz miz gvaq, doiq gij saehnieb Dangj caeuq guekgya yaek baenzlawz fatmaj guh le canloz baijbouh youqgaenj, doxgiet daiqlingx daengx Dangj daengx ginh daengx guek gak cuz yinzminz wngqdoiq ndei gij hingzseiq rog guek yiemzhaenq fukcab caeuq gij fungyiemj diuhcan hungloet gienh riengz gienh haenx, yungh yiengh cingsaenz haenqrengz guh ok cingzcik, dawz yiengh sevei cujyi miz gij daegsaek Cungguek seizdaih moq mboujduenh nyoengx baenaj.

De youq ndaw baugau gangj, haj bi daeuj, raeuz dawzmaenh Dangj lingjdauj fuengfueng mienhmienh caeuq Dangjcunghyangh guh gyonjcomz lingjdauj, caenhrengz doihaeuj yamqdin cienzmienh hwnqbaenz aen biengz siujgangh, caezcingj、cinjdeng、gizgiz hengzguh aen leixniemh hwngfat moq, roengzrengz coibaenz hwngfat ndei youh swnh, gagrox cauhlaeb aen gapgyaq hwngfat moq, byaij vaiq yamq onj bae doicaenh gaijgwz, netsaed coihawj yinzminz minzcuj ronzdoeng goekbyai, cienzmienh doicaenh ciuqfap guenj guek, lailai fazcanj gij vwnzva maenhndei sevei cujyi, lai yunghrengz baujndei caeuq gaijndei gwndaenj yinzminz, comz rengz dwkhoenx ciengz ciengq haenqrengz duetgungz, lai roengzrengz bae guhndei swnghdai vwnzmingz, giengiet henhoh guekgya ancienz, fuengzre vaqgej gij fungyiemj hungnaek, seizseiz hawj ndawbiengz onjdingh, roengz rengz hung coihawj gozfangz caeuq ginhdui guhbaenz yendaiva, dohdaengz bae guh yiengh vaigyauh guekhung miz gij daegsaek Cungguek, cienzmienh doinyoengx gij gunghcwngz hungmbwk moq guhhung guh’ak aen Dangj. Raeuz banh hung banh hoengh gij hozdung angqhoh Cunghgoz Gungcanjdangj laebbaenz it bak hopbi、Cunghvaz Yinzminz Gunghozgoz laebbaenz caetcib hopbi, ceiqdingh aen lizsij gezyi daihsam, youq daengx Dangj haiguh gij hong hag son dangjsij. Mwh bungzdaengz ciengz binghraq bwtbingh sinhgvanh fwtfat, raeuz dawzdingh yinzminz ceiq hung、sengmingh ceiq dij, dawzdingh riengzseiz siu caez mbouj cuengqsoeng, hai hoenx ciengz ciengq daengxcungq yinzminz caez bae laengzhoenx dingjhoenx binghraq, ceiq daih hanhdoh bae baujhoh gij sengmingh caeuq aenndang yinzminz mbouj deng binghraq haih, doengbuenz suenqveh fuengzhaed binghraq caeuq hwngfat ginghci ndawbiengz aeundaej cwngzgoj hungnaek. Bungzdaengz Yanghgangj ok saeh luenhnauh, raeuz ciuq Yenfaz caeuq Gihbwnjfaz mizyauq hengzguh aen gienz dohcaez bae gaemguenj dwzbez hingzcwnggih, dingh ok Aen Fap Yanghgangj Dwzbez Hingzcwnggih Henhoh Guekgya Ancienz, hengz ndei aen yenzcwz “bouxgyaezguek guenj Yanghgangj”, geizseiq Yanghgangj ndaej guhbaenz yiengh cienjbienq hungnaek daj luenhnauh daengz andingh. Raeuz roengzsim bae guh gij doucwngh youqgaenj fanj faenmbek、fanj capfwngz daengzdaej, langhbaij le yiengh simhoz caeuq bonjsaeh raeuz baenzlawz cungj aeu henhoh cawjgienz guekgya caeuq diegguek caezcingj、fanjdoiq “Daizduz”. Bungzdaengz seiqgyaiq geizseiq bienqvaq haenqrem, seizseiz miz rengzdingh canloz, ciepndei gij cingsaenz doucwngh, baijok gij mbeidamj mbouj lau guek ak haephangz, youq mwh doucwngh henhoh gij viyiemz caeuq gij leih’ik goekgaen guekgya, gaemndaet gaemmaenh le gij gienz gag bae fatmaj caeuq henhoh ancienz guek raeuz. Haj bi daeuj, Dangj raeuz doxgiet daiqlingx yinzminz, gungroengz le haujlai aen nanzdaez ciengzgeiz caengz ndaej gaijgez haenx, banh baenz le haujlai gienh saeh hung saeh youqgaenj ngaih daengz coglaeng haenx, hawj aen saehnieb Dangj caeuq guekgya aeundaej gij cwngzciu hungnaek daengx seiqgyaiq cimyawj.

Siz Ginbingz gangj, daj hai Cibbet Daih daengz seizneix gaenq ndaej cib bi lo. Cib bi daeuj, raeuz guh le sam gienh saeh hung, gij saeh hung neix doiq saehnieb Dangj caeuq yinzminz miz yienhsaed yiyi hungnaek caeuq lizsij yiyi gyaeraez: It dwg ciep daeuj Cunghgoz Gungcanjdangj laebbaenz it bak hopbi, ngeih dwg yiengh sevei cujyi miz gij daegsaek Cungguek haeuj daengz seizdaih moq, sam dwg guhbaenz faenhhong haenq- rengz duetgungz、cienzmienh hwnqbaenz aen biengz siujgangh lizsij gyauhawj haenx, guhbaenz gij moegbiu buekguh aen bak bi daih’it. Neix dwg gij ndaejhingz hab geiq haeuj lizsij youz Cunghgoz Gungcanjdangj caeuq yinzminz Cungguek doxgiet buekguh cix aeundaej, dwg gij ndaejhingz hab geiq haeuj lizsij ndaej ciuqrongh ceksaw lizsij Cunghvaz Minzcuz fathoengh, hix dwg gij ndaejhingz hab geiq haeuj lizsij doiq seiqgyaiq miz yingjyangj gyaeraez.

Cib bi gonq, gij hingzseiq dangqnaj raeuz dwg, gaijgwz hailangh caeuq hwnqguh sevei cujyi yendaiva guh ndaej cingzcik hungloet, hangh gunghcwngz hungmbwk moq guhhung guh’ak aen Dangj ndaej cingzyauq yienhda, vih raeuz laebdaeb baenaj demh roengz le giekdaej maenh、cauh ok le diuzgen haemq ndei、 hawj le baujcang youqgaenj, doengzseiz youh miz baenzroix mauzdun caeuq vwndiz haenqrem ngamq mizok nem ciengzgeiz cwkrom haenx gaenjgip caj bae gaijgez. Mwhhaenx, ndaw Dangj caeuq gwnz biengz miz mbouj noix vunz doiq diuz roennaj Dangj caeuq guekgya yousim dangqmaz. Yawjraen doengh gij mauzdun caeuq vwndiz haenqrem yingjyangj Dangj ciengzgeiz gaemgienz、guekgya ciengzgeiz andingh、yinzminz vuenyungz an’onj neix, Dangjcungh- yangh yawjcinj seizseiq、daihdamj genjdingh, laebsim gouz baenaj、gungroengz gizhoj, doxgiet daiqlingx daengx Dangj daengx ginh daengx guek gak cuz yinzminz vid gen vid ga haenqrengz guh、rumzrumz fwnfwn mbouj gwxdingz, mbouj goq dailix bae guh gij doucwngh hungmbwk miz haujlai yienghmoq caeuq doenghbaez mboujdoengz haenx.

Siz Ginbingz youq ndaw baugau vixok, cib bi daeuj, raeuz yungh baenzroix guhfap ndaej coengh daengxbuenz, doicaenh baenzroix saedguh ndaej bengwz, guhbaenz baenzroix hongsaeh ndaej miz cungbyoengq, aeundaej baenzroix cwngzgoj ndaej dang geiqhauh, dingj ndaej hwnj gij gaujniemh yiengh fungyiemj diuhcan daj cwngci、ginghci、yisiz hingzdai、swyenzgai daengj fuengmienh miz daeuj haenx, gij saehnieb Dangj caeuq guekgya aeundaej yiengh cwngzciu hab geiq haeuj lizsij、miz ok gij bengwz hab geiq haeuj lizsij, doidoengh guek raeuz yamqhwnj diuz roen moq cienzmienh hwnqguh aen guekgya sevei cujyi yendaiva.

——Cauhlaeb le Aen Swhsiengj Sevei Cujyi Miz Gij Daegsaek Cungguek Seizdaih Moq, mingzbeg doekdingh aen fanghloz giekbonj dawzmaenh caeuq hwngfat yiengh sevei cujyi miz gij daegsaek Cungguek, daezok baenzroix leixniemh moq swhsiengj moq canloz moq guenj guek ceih biengz, guhbaenz yiengh bonghyat moq hawj Majgwzswh Cujyi habngamj Cungguek、gaenhwnj seizdaih.

——Daj fuengfueng mienhmienh bae gyaak Dangj raeuz lingjdauj, saedbauj gij gienzvi caeuq yiengh gyonjcomz lingjdauj Dangjcunghyangh, saedbauj Dangj dangguh aen cehsim lingjdauj ndaej doengjlamx daengxbuenz、hezdiuz gak fueng, raeuz aen Majgwzswh Cujyi cwngdangj miz gouj cien roek bak lai fanh boux dangjyenz neix engqgya doxgiet caezsim.

——Gohyoz caezcingj dwk daj daengx- buenz bae baijbouh gij saehnieb Dangj caeuq guekgya seizdaih moq baenzlawz hwngfat, daezok guhbaenz aen loqsiengj Cungguek Cunghvaz Minzcuz fukhwng hungmbwk, doengjlamx gij doucwngh hungmbwk、gij gunghcwngz hungmbwk、gij saehnieb hung- mbwk、gij loqsiengj hungmbwk, mingzbeg doekdingh aen cungjdaej baijbouh“haj yiengh gap baenz aen” caeuq aen canloz baijbouh “seiq aen cienzmienh”, doekdingh aen diuhgoek guhhong youq ndaw onjdingh gouz baenaj, doengbuenz maeuzveh fazcanj caeuq ancienz, mingzbeg doekdingh gij cujyau mauzdun ndawbiengz guek raeuz dwg gij aeuyungh yinzminz gvaq saedceij gyaeundei ngoenz beij ngoenz demlai hoeng fazcanj mbouj bingzyaenx mbouj cukgaeuq, caemhcaiq gaenjgaenj hopheux aen cujyau mauzdun ndawbiengz neix doicaenh gak hangh hong, mboujduenh gyalai caeuq hwngfat gij hingzdai moq vunzloih vwnzmingz.

——Ginggvaq lienzdaemh buekguh, guhdaengz le siujgangh aen loqsiengj cien bi Cunghvaz Minzcuz neix, hoenx hingz le ciengz ciengq haenqrengz duetgungz gwnz lizsij vunzloih gveihmoz ceiq hung haenx, daengx guek bet bak samcib ngeih aen yienh gungz cienzbouh duetmauh, gaenh baenz ik vunzgungz lajmbanj ndaej duetgungz, gouj bak roekcib lai fanh vunzgungz ndaej senj bae dieg ndei youq, youq gwnz lizsij baez daih’it mbouj miz le hojngaeuz, vih gij saehnieb gemjgungz daengx seiqgyaiq ok le goengrengz hungloet.

（cienj banj 3）