“Baeuq, sinhvwnz okdaeuj naeuz ranzcoj raeuz miz vunz deng binghraq lah ndang lo, mwngz gaenjgip dauq yienhsingz.” Mehyah youq ndaw souj- gih hemqcaca.

“Aen mbanj ngaiz fung lo, mbouj hawj vunz haeujok.” Lauxvangz naeuz.

“Naeuz mbouj hawj mwngz dauq ranzcoj gvaqcieng, mwngz lij laeglemx dauqbae, mbatneix raen cedvaizhau luba!” Mehyah naeuz.

“Byawz rox baenz yienghneix ne?” Lauxvangz naeuz.

“Youq ndeindei ra maet haeuj mi!” Mehyah naeuz.

“Boh, mwngz ndei lwi? Aulungz gyoengqde cungj ndei ba?” Daeglwg cam.

“Dou seizneix lij ndei, caengz raen miz maz mbouj doxdoengz.” Lauxvangz naeuz.

“Boh, sou gaej vueng, dingq cwngfuj cijveih.” Daeglwg naeuz.

“W, rox lo.” Lauxvangz naeuz.

Lauxvangz bineix ndaej caetcib seiq bi, dwg duiyouh lauxsae, daengx ranz vunz youq yienhsing gwnyouq gaenq geijcib bi lo. Gyoengqde gaenq lai bi mbouj ma ranzcoj gvaqcieng lo. Mbouj rox vihmaz, bineix Lauxvangz daegbied siengj ma ranzcoj gvaqcieng. Lajcieng de caeuq vunzranz doxyaeng, heuh daengx ranzvunz ma ranzcoj gvaqcieng, hoeng mbouj miz byawz ei de.

Daeglwg naeuz:“Mwngz baenzlai geq, ndangdaej mboujdaih ndei, mbouj hab okdou lailai.”

Lwgbawx naeuz:“Mbouj miz saek aen ranz youq ranzcoj, dauqbae gwncieng, ranz raeuz roek bouxvunz comz bae ranz aulungz youq mbouj fuengbienh ni.”

Mehyah naeuz:“Ndaenj dauq ranzcoj gvaqcieng, lau dwg siengj bae raennaj yahyuj mwngz ba?”

Lauxvangz mbouj oksing.

Ranzcoj lij miz godaih Lauxvangz youq. Ranz de gaenq daengj ndaej sam caengz ranzlaeuz, naeuz caengz daihsam ce hawj ranzvunz Lauxvangz baedauq. Godaih bineix ndaej caetcib roek bi, ga miz bingh, song bi neix daeuj byaij mbouj baenz roen.

Cieng cosam, Lauxvangz boux dog laeglemx ma ranzcoj.

Liuh mbouj daengz, cieng coseiq banringz ndaej rox, ndawmbanj miz daegmbauq ndeu deng binghraq dawz, cigouqmingh daeuj aeu de bae gwzliz lo. Seizhaenx, ndawmbanj lumj rek raemx goenj nei.

Vaiqhaemh, aenmbanj ngaiz fung, cwngfuj baij vunz daeuj souj mbanj, mbouj hawj vunz haeujok, heuh vunzlai dangq boux gag youq ranz, mbouj ndaej okdou.

Hwnzde vunzmbanj ninz mbouj ndaek mbouj onj, bouxboux simvueng.

Cieng co’ngux banhaet, canghyw husw daeuj mbanj guh hwzsonh genjcwz.

Banhaemh, hwzsonh gezgoj ok- daeuj lo: Ndawmbanj song bak lai vunz gaenq miz samcib lai boux ngaiz binghdoeg lah ndang. Gyoengqde hix aeu bae gwzliz lo.

Daihgya doeksaek caez, dungx- mbaeu liux, caemhcaiq geizheih dangqmaz.

Aen singz neix gaenq lai bi mbouj miz binghraq lo, saedceij gvaq ndaej vunzmbanj an’onj dangqmaz. Ciengz binghraq neix sawqmwh daeuj daengz, hawj vunz moengjdoengj liux, mbouj rox baenzlawz guh.

Binghraq daj gizlawz daeuj ni?

Yienzlaiz, daegmbauq haenx dwg youq Swnhcwn dajgoeng, lajcieng ngeihloek dauq mbanj gvaqcieng. Ngoenz ngeihloek, de youq Swnhcwn guh hwzsonh, gij gezgoj de dwg yinhsing, banhaemh de cij gag haici dauq mbanj. Dauq mbanj le, de laihnaeuz mbouj laemqleuq couh dauqcawq bae cunz caencik baengz- youz.

Cig daengz cieng coseiq haet- romh de ndaej siusik: Swnhcwn miz vunz deng binghraq lah ndang, diegyouq bouxhaenx caeuq daeg- mbauq caemh diuz gai. Daeg neix aenq saeh mbouj ndei, gaenjgip bae guh hwzsonh genjcwz, cij rox swhgeij gaenq ngaiz lah. De doeksaet yat.

“Ndaek fangzdawz neix daiq binghdoeg dauq mbanj, cax heh de.”

“Daigaj neix, youq Swnhcwn ndeindei mbouj youq, dauq mbanj haih vunzlai.”

“Gyaeuj goenq neix, dawz de bae coemh cij biuhhoz.”

……

Vunzmbanj lwnhyaengyaeng.

Ndawcieng angqyangz neix ngaiz binghraq dwkvaih lo, daengx mbanj gyuemluemx gij heiqfaenh dwglau haenx.

Cieng coloeg, cwngfuj caeuq yihyen baij ci daeuj aeu vunzmbanj bae gwzliz.

Bouxdaeuz daiqdoih naeuz:“Gyoengq beixnuengx, seizneix lij youq gyajgeiz ndwencieng, gunghcoz yinzyenz caengz daengz dieg, dieggwzliz mizhanh, raeuz aeu faen buek bae gwzliz……” Bouxdaeuz caengz gangj sat couh ngaiz vunz- mbanj dajduenh lo.

“Ceiz aen cungdaeuz ndeu roxnaeuz ceiz ngoenz ndeu couh demlai faenh yungyiemj he, byawz nyienh guh buek riengzlaeng ne?”

“Hawj lwgnyez、bouxcoz bae gonq.”

“Neix mbouj goengbingz. Seng- mingh bingzdaengj.”

“Yaeb ciem!”

……

“Gyoengq beixnuengx gaej vueng, aeu saenq dangj caeuq cwngfuj, haengjdingh cawqleix gij saeh neix ndei. Daihgya dingq gou naeuz, bouxgeq roxnaeuz boux- ndangcanz byaij roen mbouj fueng- bienh haenx, camhseiz louz guh buek doeklaeng, gak boux lij aeu baij boux vunzcaen ndeu caemh louz roengz- daeuj ciuqgoq……”

“Ndawmbanj guggug gedged dauqcawq dwg cungj binghdoeg neix, louz roengzdaeuj couhdwg deq dai.” Miz vunz naeuz.

Godaih Lauxvangz byaij roen mbouj fuengbienh, aeu camhseiz louz youq mbanj gwzliz. Ranz vunz godaih haj boux, daeglwg、lwgbawx caeuq song bouxlan.

Byawz louz roengzdaeuj ciuqgoq ni? Ranz vunz de cingq veiznanz.

Lauxvangz raen le naeuz:“Gou ndaej caetcib seiq bi lo, dai hix dohciuh lo, gou louz roengzdaeuj ciuqgoq godaih, sou gaenjgip bae gwzliz.

“Boh’au, neix mbouj habcik.” Lwgbawx godaih naeuz.

“Yienghneix, dou baenzlawz caeuq mehsimj、daegnuengx gyaudaih ne?” Daeglwg godaih naeuz.

“Gou gag ganq ndaej swhgeij, mbouj yungh byawz ciuqgoq, sou bae gwzliz, louz youq mbanj mauhyiemj lai lo.” Godaih naeuz.

“Dingling” sing ndeu, Cingq youq seizneix, soujgih Lauxvangz yiengj, dwg mehyah dwk daeuj, de cam:“Baeuq, sou baenzlawz yiengh?”

“Dou seizneix lij ndei. Cwngfuj caeuq yihyen cingq baij ci daeuj aeu vunzmbanj bae gwzliz. Godaih byaij roen mbouj fuengbienh camhseiz louz youq mbanj gwzliz, gou caemh louz roengzdaeuj ciuqgoq de.”

“Mbouj ndaej! Mwngz mbouj aeu mingh ha? De miz lwg miz bawx, vihmaz dwg mwngz louz roengzdaeuj ni?”

“Gou dwg boux namh hoem daengz lajhangz lo, dai hix dohciuh lo, lau maz ne?” Lauxvangz gangj sat couh ndaep soujgih lo, de lau mehyah raemhraeh mbouj dingz.

“Dingling”, soujgih youh yiengj lo, daeglwg dwk daeuj naeuz:“Boh, mwngz aeu siujsim, guh ndei fuengzre, binghdoeg neix vei lah nw.”

“Rox lo, cuengqsim ba. Naeuz hawj meh mwngz gaej yousim. Sou youq yienhsingz hix aeu guh ndei fuengzre nw, gaej okdou.”

Mehyah Lauxvangz ngoenz dwk geij baez denva, seiz nai seiz ndaq, hawj Lauxvangz daej riu mbouj baenz.

Sam ngoenz ndawde, ndawmbanj cij lw cib lai boux, daengx mbanj caemrwdrwd, dwglau dangqmaz.

Ceiq hojlienz dwg gij doenghduz ndawmbanj, lumjbaenz duzmou、duzma、duzbit、duzgaeq、duzmax caeuq duzcwz, mbouj ndaej gueng, swenjnganga heuh iek. Cwngfuj itseiz hix mbouj rox baenzlawz cawqceq gij doenghduz neix, cijndei baij vunz daeuj souj gonq.

“Baenzlai bi mbouj dauq gvaqcieng, dandan bineix dauq, boihseiz lo.” Godaih naeuz.

“Lij ndei, gou boux dog gag dauq!” Lauxvangz naeuz.

“Nanzgvaiq nuengxbawx ndaq mwngz naeuz youq ndeindei ra maet haeuj mi.” Godaih naeuz.

Lauxvangz riuhehe mbouj guh- sing, yaep he, de danqheiq naeuz:“Ndwencieng bineix linghyiengh ha!”

Song beixnuengx lwnh gij goj mwh iq daeuj gaijmbawq.

Seizhaenx gvaq ngoenz ndeu couh lumj gvaq bi ndeu baenzneix raezrang.

Cieng cocib banringz, buek vunz doeklaeng ndawmbanj dauqdaej ndaej bae gwzliz lo. Gyoengqde dauqdaej ndaej soeng gaemz heiq raezrangrang he.

Dinjdinj cib lai ngoenz ndawde, bonj yienh miz song bak lai vunz deng lah, binghdoeg neix vei lah dahraix.

Lauxvangz ndawsim gag haenh: Ciengz binghraq neix yienznaeuz fwt daeuj daengz, hawj vunz moengjdoengj liux. Hoeng, baihgwnz fanjwngq ndaej vaiq, cawqceq ndaej ndei; baihlaj cizgiz boiqhab. Ceiq hawj vunz simraeuj dwg miz lailai daihdaih boux beixnuengx daj guekcoj gak dieg caemh daeuj bangcoh, caezsim hoenx binghraq. Vunz lai rengz hung, cij yungh cib lai ngoenz seizgan couh gaemhanh binghdoeg. Gij rengz minzcuz doxgiet hungmbwk ha! Dangj caeuq cwngfuj raeuz caen maenh’ak.