Doenghbaez yienznaeuz gou hix gaenq song sam ngoenz mbouj ndaej raen Aulungzgveiz gvaq, hoeng cungj mbouj miz geij ngoenz neix yienghneix daegbied niemh de, gou hix haemz de、mieng de, hoeng lij simnyap lumj doek maz doxgaiq nei, gou ciengzseiz gag dauqngeix gij goj haemhhaenx de lwnh hawj gou, ndaw goj haenx, “Lungz Byauh” caen dwg boux hauxseng hawj vunz doengzcingz, hoeng, Aulungz- gveiz dwg mbouj dwg couhdwg “Lungz Byauh”? De vihmaz gangj bonjfaenh dwg vunzndei? Ok gij saeh Ahveij gwn gij yw miz doeg, gij goj haenx dingzlai dwg yaeuh gou, daiq gangj ndaej deng, cij miz di dwg caen.

Caen mbouj rox ndawsim vunz- hung ngeix maz, vihmaz cungj aeu haenh bonjfaenh baenzlawz maenh’ak baenzlawz simndei?

Yienznaeuz vunzmbanj gaenq mbouj lumj geij ngoenz gonq yienghhaenx baez haibak couh dwen daengz Aulungzgveiz, hoeng gou lij ngoenzngoenz cungj buet daengz baihlaeng miuhsaenzvangz bae yawj- yawj aen ranzdaemq de, menhmenh nyoengx hai aen dou caengz haep caez, ndawde laepngau, miz heiq haeusing cung ok rog daeuj, gou gwq nep ndaeng, dingqdingq ndawranz miz maz doenghdanh.

Ndaw loengzdietsienq mbouj dingz dwk fatok gij sing “sisi”、“huhu”, baez ndaejnyi cungj sing neix, gou couh ndaejgeiq Ahveij deng ngwzdoeg haeb. Gou baez simvueng, doq haep dou hwnjdaeuj, cienq ndang couh buetdeuz lo.

Gyanghaemh, daiq youh mboen bohgoux:“Aen ranzdaemq haenx caeux couh wnggai lid bae lo, mwngz lij ce youq gizhaenx caj de dauqma youq?”

(caengz sat)