Sai:

Raeuz caez dap aen daiz,

Danq dangj hai aen hoih,

Lumj gwn gij dangzoij,

Faex gwnzndoi hix angq.

Mbwk:

Raeuz caez dap aen daiz,

Aeu fwen haisim doiq,

Danq dangj hai aen hoih,

Vih vunzloih cauhfuk.

Sai:

Aen hoih Ngeihcib Daih,

Dazyinx caiq coh naj,

Vunzlai riuhaha,

Lumj cuengq bya roengz haij.

Mbwk:

Lumj cuengq bya roengz haij,

Vunzlai maij dangj raeuz,

Boux duet gungzhoj naeuz,

Baengh dangj raeuz vuenyungz.

Sai:

Va gyaez seizcin fwn,

Duetgungz vunzvunz maij,

Vunzlai riengz dangj byaij,

Seiqdaih cungj angqyangz.

Mbwk:

Gak nieb caeuq gak hangz,

Vah noix gangj haenq guh,

Cingzcik bauq guekcoj,

Lawz haemzhoj mbouj lau.

Sai:

Nyeuxgyaeuj yawj gaxgonq,

Lajmbanj roen nanz byaij,

Ngeix daengz sim hix naiq,

Angq haeuj seizdaih moq.

Mbwk:

Nyeuxgyaeuj yawj gaxgonq,

Can haeuxdonq mbouj ndei,

Gag ngeix youq dangseiz,

Gunnanz geiz caengz gvaq.

Sai:

Gunnanz geiz caengz gvaq,

Vuenyungz gvaq doenghbaez,

Deng boksok nanz daej,

Engq mbouj ndaej swyouz.

Mbwk:

Bae Gang Meij Yenz Cauz,

Buekmingh bauq guekcoj,

Daengx guek mbouj lau hoj,

Henhoh ndei guek raeuz.

Sai:

Youh Gang Meij Yenz Yez,

Lwgnyez raeuz hix angq,

Guek raeuz Gungcanjdangj,

Ceiq angq bang bouxgungz.

Mbwk:

Daengz gaijgwz hailangh,

Lwgminz angq dangqmaz,

Haenq guh cauh aen gya,

Gijmaz ndaej daengjlaengz?

Sai:

Ndaej gwn imq daenj raeuj,

Raeuz youh engq vuenyungz,

Ndwenngoenz ciemh bienq soeng,

Youh caemh roengzrengz guh.

Mbwk:

Dangj mbouj lumz sinhoj,

Mauh gungzhoj duet caez,

Ndwenngoenz youh bienq ndei,

Bouxboux gyaez guekcoj.

Sai:

Bouxgeq mbouj youheiq,

Yiengj fukheiq haujlai,

Mbouj miz ngoenz gwn caiq,

Aensim hai fouzbeij.

Mbwk:

Bya heu raemx hix saw,

Nyez doegsaw ndaej coengh,

Roengauhsuz cungj doeng,

Hawciengz hoengh dangqmaz.

Sai:

Binghraq gyuek lajbiengz,

Daengx guek riengz dangj byaij,

Hoenx binghraq mbouj naiq,

Bouxboux maij dangj raeuz.

Mbwk:

Gohgi ndaej fazcanj,

Guekwnq danq guek raeuz,

Bouxboux youq ranzlaeuz,

Guk mbouj you deng haep.

Sai:

Dangj saenqhwng lajmbanj,

Bouxguhnaz angq lai,

Miz mbei hai dungxcaiz,

Ndaej fatcaiz mizmuengh.

Mbwk:

Ngeihcib Daih yaek hai,

Najhai lumj dujva,

Fukhwng raeuz Cunghvaz,

Bouxguhnaz engq fouq.

Sai:

Guh it rangh it loh,

Caez hozcoz canh ngaenz,

Gungganq vunz guekwnq,

Gyoengqde caen danqhaenh.

Mbwk:

Diegveih ndaej daezsang,

Lwgminz angq dahraix,

Bak bi gonq mbouj caiq,

Haenqguh fanh daih vuen.

Hab:

Aen hoih Ngeihcib Daih,

Youh ndaej caiq yatbongh,

Yienghyiengh ndaej hwnghoengh,

Moengh fukhwng engq gyawj.