Mboengqneix, gicej daj mizgven bouhmonz roxyiuj, Cibbet Daih Dangj doxdaeuj, Gvangjsih gyauyuz hidungj cienzmienh gvancez doeksaed gyauyuz fuengcim caeuq minzcuz cwngcwz dangj, youq hagdangz haeujlaeg guh minzcuz doxgiet cinbu gyauyuz, mboujduenh couqmaenh gij eiqsik caezcaemh Cunghvaz Minzcuz, dieg minzcuz gyauyuz hwngfat suijbingz caeuq daengx gih doxcaez daezswng, aeundaej cingzcik yienhda.

Gvangjsih dwg dieg minzcuz, dangj yawjnaek minzcuz gyauyuz saehnieb hwngfat dangqmaz, youq cungh siuj hagdangz cienzmienh hai dangzgoq minzcuz doxgiet cinbu, youq gauhyau hai son’gyauq couqmaenh gij eiqsik caezcaemh Cunghvaz Minzcuz, youq cungh siuj hagdangz cienzmienh doihengz yungh 《Cunghvaz Minzcuz Daih Doxgiet》 daengj sawsonhag guekgya doengjit bien haenx, mwh cujciz bien 《Gvangjsih Gyaeundei》《Gvangjsih Saek- hoengz》《Sawcuengh Vahcuengh》 daengj sawsonhag deihfueng, yungzhaeuj gyauyuz neiyungz couqmaenh gij eiqsik caezcaemh Cunghvaz Minzcuz ndeindi, daengx gih da cungh siuj hagdangz saedyienh vah saw guekgya doeng’yungh gyauyuz gyauyoz 100%, 2020 nienz Gvangjsih Vahbujdungh bujgizliz daengz 85.68%, sang gvaq daengx guek bingzyaenz suij- bingz ca mbouj geijlai 5 aen bakfaendiemj, vih gak cuz lauxsae hagseng dox baedauq doxgyau doxyungz roengz giek vahgangj.

Yungh ndei vwnzva saekhoengz、vwnzva minzcuz、 vwnzva bien’gyaiq daengj gij swhyenz ndei lai, gaenxmaenx vih gak cuz lauxsae hagseng hwnqguh aen gyaranz cingsaenz caezcaemh. Cauh- laeb 100 aen hagdangz guhyiengh son’gyauq minzcuz doxgiet cinbu、100 aen hagdangz guh- yiengh son’gyauq cienzswnj feihvuzciz vwnzva yizcanj、 156 aen hagdangz guhyiengh son’gyauq vwnzva minzcuz caeuq 52 aen dieg cizyez gyauyuz cienzswnj minzcuz vwnzva. Gujli hagdangz yungh cawjdaez banhoih、aendoih hozdung、swng geiz yizsiz、ciengzbauq banjbau daengj hingzsik hagseng haengj dingq gyaez yawj haenx guh son’gyauq lwnhgangj couqmaenh gij eiqsik caezcaemh Cungh- vaz Minzcuz, gyalai gak cuz hagseng nyinhdoengz guekcoj hungmbwk、Cunghvaz Minzcuz、Cunghvaz vwnzva、Cunghgoz Gungcanjdangj、sevei cujyi miz daegsaek Cunghgoz.

Ciuq cam rox, 10 bi neix, Gvangjsih giethab gij daegdiemj dieg minzcuz, dingjmaenh hwngfat ndei gyauyuz saehnieb, aeundaej cingzcik yienhda. 2021 nienz, daengx gih ngaenzcienz itbuen gunghgung yawhsuenq daengz 1105 ik maenz, lai gvaq 2012 nienz 518 ik maenz, bi bingzyaenz demlai 7.3%; cungh siuj hagdangz caeuq youwzyenz hwnqmoq 2526 aen, youwzyenz goengbanh aen yanghcin lawz cungj miz, yivu gyauyuz aen ban hung ban vunz lai cungj cawzsiu bae liux, aen bujdungh gauhcungh guhyiengh yienhyienh miz. (Luz Caudwz)