Moix vunz cungj miz seiz lwgnyez, ciuh vunz mbouj doxdoengz, seiz lwgnyez hix mbouj doxdoengz.

Seizneix, gaenq geijcib lai bi gvaqbae lo, dauqngeix seiz lwgnyez, cungj loq miz di feihdauh vut mbouj bae, lumz mbouj ndaej.

Seiz lwgnyez dou caeuq lwgnyez seizneix mbouj doxdoengz. Seizde gijgwn noix, mbouj doeng goengloh, mbouj doeng swlaizsuij, engq mbouj miz dienh. Hoeng, dauq mbouj dwg gangj, gij saedceij seiz lwgnyez gou couh mbouj miz vaiqvued caeuq vuenyungz.

Gyoengq lwgnyez seizneix, daj ngamq rox guhcaemz, vah lij caengz ndaej raeuz, couh rox aeu soujgih guhcaemz, lumjnaeuz yawj sibinz dinj roxnaeuz yawj dungva. Daegbied dwg duzlwg baez nauh, bohmeh doq ndenq aen soujgih gvaqbae. Duzlwg cijaeu ndawfwngz miz aen soujgih, couh mbouj caiq nauh, dinghngae’ngae dwk, caemz soujgih baenzngoenz. Gyoengq lwgnyez seizneix mbouj you gwn, mbouj you daenj, siengj aeu maz couh miz maz, yaengx fwngz daenj buhvaq gyaeundei, aj bak caj haeux dwk gwn, vaiqvued ngoenz gvaq ngoenz.

Hoeng, gou lij iq seiz, yienznaeuz mbouj miz doenghyiengh lwgnyez seizneix daeuj guhcaemz, dauq miz gij guhcaemz gou mizyinx lai. Lumjnaeuz, gou ngamq ndaej seiq haj bi seiz- haenx, ngoenznaengz youq ndawmbanj caeuq doengzdoih itheij, couh rox aeu namh daeuj baenj guh yienghneix yienghhaenx. Daegbied dwg seizhaenx ranzmbanj gou miz aen caizyouzgih ndeu, moix baez raen bouxlaux aeu caizyouzgih nienj haeux, dou couh siengj daengz, yaek aeu namh daeuj baenj guh aen caizyouzgih iq ndeu. Dou geij boux lwgnyez, gangj guh couh guh, bae gyaeujmbanj vut namhhenj ma, rwed di raemx hwnjbae, gyaux namhhenj niu le, caiq baenj baenz aen yiengh caizyouzgih iq. Aen caiz- youzgih guh baenz le, dou geij boux lwgnyez youh cang yiengh guh yiengh, aeu gaiq yauzbaj daeuj ngauz de, caemh doengzseiz hag guh sing aen caizyouzgih yiengj “du……du……du……”. Seizhaenx, dou miznaj dangqmaz, sim’angq raixcaix, hemq- yaya hwnjdaeuj, nyex ndaej gyoengq vunzlaux gvaq henz hix riuhoho.

Ngoenz bae ngoenz dauq, gou ndaej caet bi seizhaenx, aeu bae hagdangz doegsaw lo. Dou bae doeg- saw, hix mbouj lumj gyoengq lwg- nyez seizneix, ngoenznaengz cungj aeu bouxhung haet soengq haemh ciep, hwnjdin couh naengh ci, yamq roen mbouj yungh byaij, soengq baenz daek baenz nengz. Dou seizhaenx bae hagdangz, cawz haggeiz haihag ngoenz daih’it, bohmeh soengq bae gyau yozfei, gizyawz moix ngoenz cungj dwg gag bae gag ma. Yienznaeuz byaij roen hwnjhag sinhoj, hoeng, gyoengq doengzdoih caez byaij, miz gangj miz riu, mboujdanh mbouj roxnyinh dwgrengz, caemhcaiq gyoengqdou lai miz gamjcingz dem.

Caiq majhung di, ngoenznaengz cuengqhag maranz, gyoengq lwgnyez dou couh mbouj ndaej bae gyang- mbanj guhcaemz lo. Aenvih gyoengq bohmeh dou, youq dou banhaet bae hagdangz seiz, couh daengq dou, banringzgvaq cuengqhag maranz le, yaek bang bohmeh guh maz hongranz, lumjnaeuz aeu rap raemx rim gang, aeu cawj haeuxhaemh caj, aeu gueng mou gueng bit gaeq roxnaeuz aeu bae ndaw reihnaz ra byaekmou maranz. Cawz ngoenzngoenz deng cawj haeux- haemh caj, gij hongranz gizyawz de, maz caengz couh guh maz. Caj dou cungj guh hongranz sat, mbwn hix gaenq laep roengzdaeuj lo, bohmeh hix daj baihrog guhhong dauqranz. Daengx ranz vunz couh ndaej gwn caeuz lo. Caj daengx ranz vunz gwn caeuz sat le, gyoengq lwgnyez dou lij aeu rib vanj swiq vanj, yienghneix, ngoenz hongranz neix cij suenq guh sat.

Seiz lwgnyez dou mbouj doeng dienh, doengxhaemh raezrangrang, guh maz ne? Guh cozyez ba, seizhaenx doegsaw mbouj miz baenzlai cozyez aeu guh. Engq mbouj gangj lumj seizneix ndaej hai dendwngh. Mbouj- gvaq, dou hix mbouj mbwq, gag miz banhfap guhcaemz angq dou. Dangh- naeuz haemh miz ronghndwen rongh- sagsag, daengx mbanj lwgnyez dou couh daengz gyangmbanj bae guh- caemz, guh yahndoj、“dwk hoenx- ciengq”. Ceiq mizyinx dwg “dwk hoenxciengq” lo. Seiz “dwk hoenx- ciengq”, couh faen gyoengqdoih baenz song doih, doih ndeu dwg “vunzndei”, doih ndeu dwg “vunzrwix”, caiq cang guh “dwk hoenxciengq”. Cungj ciengzmienh “dwk hoenxciengq” seizde, gou lij geiq ndaej daengz seizneix. Dangh- naeuz haemh mbouj miz rongh- ndwen, dou couh mbouj okdou lo, aenvih gyangmbanj laepngaungau, hawj vunz miz di dwglau. Yienghneix, dou geij beixnuengx couh humx youq henz ndang bohmeh roxnaeuz goeng- buz, rwenq gyoengq bouxhung gangj- goj, lumjnaeuz gangj gojyahvaiz、goj- daengngoenz、gojronghndwen caeuq gojgvijgvaiq daengjdaengj. Cungj goj ciuhgeq riuz roengzdaeuj neix, yienznaeuz mbouj miz maz gohyoz gaengawq, hoeng dingzlai cungj dwg son dou baenzlawz guh vunz, baenz- lawz guh lwgnyez gvai, hawj dou ndaej ik baenz ciuh vunz.

Seizgan vaiqvet gvaq, gyoengq- vunz bienq geqlaux. Baez yaepda, geijcib bi gvaqbae lo. Seizhaenx dou lij iq, seizneix cix bienq geq lo. Dauqngeix seiz lwgnyez gyae’gyang dou, caiq yawj gyoengq lwgnyez seizneix, caen dwg seizdaih bienq lo, lwgnyez hix bienq lo. Hozhaenz gij saedceij gyoengq lwgnyez seizneix mbouj aeu you gwn you daenj le, gou hix gyo’mbaiq seiziq gij saedceij gvaq ndaej hoj de. Danghnaeuz gou mbouj ginggvaq seizde muzlienh, mbouj rox seizneix rox guh ndaej hong gwn ndaej haemz lwi? Rox gyo’mbaiq gij aen- cingz bohmeh ciengxganq lwi? Rox mbaet gwn mbaet yungh caemhcaiq insik gij ndwenngoenz seizneix lwi?