Banh 21 aen lundanz caengz sang baugvat gohgi、veiswngh daengj

Gaiq Daih Cibgouj Cungguek—Dunghmungz Bozlanjvei、Cungguek—Dunghmungz Sanghvu Caeuq Douzswh Funghvei 19 hauh youq Nanzningz gietsat. Gaiq dunghbozvei neix gungh ciemdingh rogguek、ndawguek doxgap hanghmoeg 267 aen, gungh douzcienz mauhgvaq 4000 ik maenz, beij gaiq gonq demlai 37%.

Gaiq dunghbozvei caeuq funghvei lundanz caengz sang caeuq baenzroix ciendaez hozdung diemjrongh lai raeuh, gyalai le Cungguek—Dunghmungz lai gizdieg doxgap. Gaiq funghvei neix gungh banh 6 ciengz hozdung, ndawde hoihgeiz 3 ciengz, aeundaej baenzroix cwngzgoj, lumjbaenz biengj baiz aen fazdingz saeh gaicawx gozci youq gwnz giek deihfueng, aen fazdingz neix youq dieg gaicawx swyouz dwg aen daih’it Cungguek, doidoengh Cungguek Majlaizsihya youq nwngzyenz、giekdaej sezsih、canjyez yenzgih、denswj saenqsik daengj gizdieg hwnqguh hanghmoeg doxgap cungdenj, cuknet le aen gihci Cungguek—Dunghmungz gunghsanghgai doxgap.

Gaiq dunghbozvei neix gungh banh 21 aen lundanz caengz sang, ndawde hoihgeiz 11 aen, baugvat canjnwngz doxgap、gohgi、veiswngh daengj, demmoq meizdij、hozbingz leihyungh hwzgisuz、dajhwnq、lwgnyez fukleih、saeklamz ginghci daengj 5 aen lundanz. Gak lundanz goengbouh buek doxgap cang’yi caeuq yenzgiu baugau ndeu, lumjbaenz Cungguek—Dunghmungz veiswngh doxgap lundanz lienzhab gangjmingz、Cungguek—Dunghmungz yawjdingq gozci cienzboq cib bi hwngfat baugau daengj; hainduj roxnaeuz doekdeih le buek doxgap gihci caeuq gihgou ndeu, lumjbaenz Cungguek—Dunghmungz conzmeizgangj、Cungguek—Dunghmungz dungjgi yozyen、Cung- guek—Dunghmungz gisuz cienjsenj lenzmungz daengj; ciem buek doxgap hezyi caeuq hanghmoeg ndeu, nangqdaengz densangh hamj guek、gvangjden yawjdingq、denliz、nwngzyenz daengj. Gaiq daihngeih RCEP ginghmou doxgap gunghsangh lundanz nem caetliengh sang saedhengz RCEP lundanz goengbouh 《Nanzningz Cang’yi Mizgven Gunghsanghgai Dazfwngz Caetliengh Sang Saed- hengz RCEP、Doicaenh Gizdieg Ginghci Daengx Buenz Suijbingz Engq Sang》 daengj lai hangh cwngzgoj. Cungguek—Dunghmungz sanghgai lingj- siu lundanz nem RCEP daegbied doiqvah goengbouh le Dunghmungz yingzsangh vanzging baugau daengj cwngzgoj cauhmoq.

Baez nduj cauh “gwnzmuengx dunghbozvei+bouqdiemq baijok” guh langhbaij guh hoih vunqsik moq

Gaiq dunghbozvei neix baez nduj cauh “gwnzmuengx dunghbozvei+bouqdiemq baijok” guh langhbaij guh hoih vunqsik moq, gaengaenj RCEP saedhengz caeuq banj 3.0 dieg gaicawx swyouz yaek hainduj aen seizgei moq, conz rengz haeuj lai doxgap, doidoengh doxleih caez hingz hamj hwnj mbaeklae moq. Gaiq dunghbozvei neix langhbaij najdieg gungh 10.2 fanh bingzfangh mij, ndawde rogguek langhbaij ciemq 30%, gihbwnj hoiz daengz suijbingz baenz binghraq gaxgonq; bouqdiemq langhbaij diegvih gungh 5400 aen, gungh miz 40 aen guekgya 1653 aen giyez camgya langhbaij, beij gaiq gonq demlai 10%, ndawde rogguek camgya langhbaij giyez 473 aen（hamz Dunghmungz 338 aen）. 311 aen seiqgyaiq 500 giengz、Cungguek 500 giengz caeuq hangzyez giyez lingxdaeuz camgya lajsienq langhbaij; “gwnzmuengx dunghbozvei” mauhgvaq 2000 aen giyez camgya gwnzsienq langhbaij.

Gaiq dunghbozvei neix banh le 88 ciengz gwnzsienq lajsienq ginghmou hozdung, gungh coengh baenz 3500 lai doiq cinjdeng mouyi boiqdoiq caeuq hanghmoeg doxgap, ndawde 1000 lai doiq doenggvaq gwnzmuengx dunghbozvei yaengbaenz, douzcienz mouyi guhbaenz hoenghhwd. Gaiq dunghbozvei neix ciemdingh hanghmoeg gezgou ndei, cujyau comz youq gauhdonh gimsug caizliuh moq、cangqheiq caeuq vwnzlij dijyuz、saekheu vagungh caizliuh moq、cauh gihgai cangbwh daengj 6 aen canjyez hung; hanghmoeg caetliengh daez- swng, 10 ik maenz doxhwnj hanghmoeg dwg 2.6 boix gaiq gonq, 50 ik maenz doxhwnj hanghmoeg beij gaiq gonq demlai 57%, 100 ik maenz doxhwnj hanghmoeg caeuq gaiq gonq doxbeij gaiq neix ndaej miz dwkbyoengq lo. Cungguek cinwngzva sezbei、saekheu gyahden、huq gohgi dajrongh ndaej canghseng’eiq Dunghmungz haengjgyaez, gaiqgwn gaiqndoet、mak diegndat、doxgaiq ranz yungh Dunghmungz guekgya baenz gaiq huq hoengh canghseng’eiq Cungguek ciengj cawx. Dunghmungz guekgya hangzgungh、lijyouz daengj fuvuyez giyez caeuq canghseng’eiq bouxhek Cungguek doxdamz hoenghhwd, dazfwngz hainduj aen seizdaih “binghraq gvaq” ginghci dauqhoiz doxgap moq.

Gaiq Daih Ngeihcib Dunghbozvei Caeuq Funghvei yaek youq bicog 9 nyied banh

Ciuq cam rox, Gaiq Daih Ngeihcib Dungh- bozvei Caeuq Funghvei yaek youq 2023 nienz 9 nyied 16-19 hauh youq Nanzningz banh. Bicog dwg Cungguek—Dunghmungz laeb canloz bouxdoih gvanhaeh 20 hopbi caeuq dunghbozvei 20 hopbi, dwg bi angqhoh hung, 11 aen guek 12 aen cawjbanhfueng caezcaemh yaek caezcaemh angq- hoh. Gaiq Daih Ngeihcib Dunghbozvei laebdaeb doengzseiz banh Gaiq Daih Ngeihcib Funghvei. Hangzcouh Si yaek guh “aen singz yinxdaeuz” Cungguek Gaiq Daih Ngeihcib Dunghbozvei.

(Dauz Canghsun Banh Ginjcaiz Linz Lieng)