Angqcoux Dangj Raeuz Ngeihcib Daih

Beijfwen guh liux geijcib bi,

Ngoenzneix daeuj si(lwnh) angq raixcaix;

Angqcoux Dangj raeuz Ngeihcib Daih,

Gou youh bak gvai ciengq diuz moq.

Gwnzmbwn angjlamz fwjhau mbin,

Biengz bungz seizcin va lumj haij;

Ciepcoux Dangj raeuz Ngeihcib Daih,

Bouxboux sim maij angqvauvau.

Lwglan Mbanjcuengh gyaez ciengq go,

Minzcuz doxgiet va rim bya;

Ngoenzngoenz cungj youq ndaw fwen gvaq,

Cien vunz aj bak fanh vunz riengz.

Roegraeu gyaez roengz reih lwgraz,

Vameiz gyaez soengz gwnz faex sang;

Bouxminz Mbanjcuengh ceiq gyaez Dangj,

Couh dangq gomiuz gyaez raemxraiz.

Moegmienz va hai lumj feiz hoengz,

Mbanjcuengh ngoenzngoenz fwen hai langh;

Angqciengq hungmbwk Gungcanjdangj,

Angqciengq fouqgiengz Cungguek moq.

Ndawndoeng duzroeg gyaez duzfungh,

Bya gyaez duzlungz youq ndawhaij;

Ngoenzneix angqcoux “Ngeihcib Daih”,

Dangj daiq beksingq byaij loh moq.

Raemx miz feiz coemh raemx cix goenj,

Yiengz miz nywj soenj(gwn) yiengz cix maez(angq);

Ngeihcib Daihhoih yaek ciuhae(hai),

Gou cix sim maez(angq) guh fwen haenh.

Byasang roq gyong yiengj hwnj mbwn,

Lueglaeg va mwn rang doh biengz;

Dawz gij saeh’angq roengzdaeuj dwen,

Daengx biengz angqciengq Ngeihcib Daih.

Saeh’angq cunghyangh lumj rumzcin,

Ci dwk bouxminz sim raeujrub;

Ciengq Ngeihcib Daih saenqsim cuk,

Fanh minz doengh uk caux hwng’vuengh.

Gwnzmbwn gvangqlangh miz fwjmaeq,

Saenzcou daihdeih va hai langh;

Ciengq diuz go daeuj haenh Aendangj,

Coenz vah mbouj gangj sim gag hai.

Ndaej Gvaq Ngoenzndei Gaej Lumz Dangj

Ndaej gvaq ngoenzndei gaej lumz Dangj,

Coenz vah mbouj gangj vunz mbouj rox;

Fanhai dangjsij dawz daeuj yoz(hag),

Raemxda cix roh lumj diuzdah.

Cunghgung dangjsij yaek geiqcing,

Doenghbaez gwzming diuzloh raez;

Ciencien fanhfanh vunz dai bae,

Gyaeuj doek lwed lae hix mbouj lau.

Hag liux dangjsij raeuz cix rox,

Geijlai bouxcoz deng vutmingh;

Vihliux gwzming guh ndaej hingz,

Gwed hwnj geiznding dingj cungqbauq.

Guengjsae miz boux Veiz Bazgoh,

De bonj riuzcoh okbae gyae;

Haibanh yozdangz youq Gamjgae,

Youh bae Baksaek hengz gijyi.

Baksaek gijyi sing cungq yiengj,

Cungqvunz doxriengz gyaep guk naez(manaez);

Laeb Hungzcizginh guh hwnjbae,

Yougyangh doengsae mbin geizhoengz.

Bazgoh Siujbingz Cangh Yinzyiz,

Baksaek Gijyi yaengx geizhoengz;

Laeb Hungzcizginh baenz daihgoeng,

Bihaenx saenqdoengh daengx Cungguek.

Ciuhgeq hwnjdaeuj guh gwzming,

Ciengzgeiz buekmingh lae lwedhanh;

Heuhsingj beksingq ciencien fanh,

Mbouj lau dai nanh youq gwnzbo.

Mwh de najmbanj raemxdah lae,

Dwng Binh cwng’veij daengz Mbanjcuengh;

Guh Gunggwnghse le beixnuengx,

Hawj raeuz Mbanjcuengh caux baenz gwn.

Nungzminz yindung de vix yiengq,

Son raeuz dwk ciengq hoenx vunzdig;

Vunzlai doengzcaez hwnj baenz mid(cax),

Gaj dai vunzdig hawj biengz bingz.

Ciuhlaux aencingz mbouj ndaej lumz,

Fwnfwn rumzrumz bae hoenxciengq;

Lae lwed vutmingh vih lijsiengj,

Hawj raeuz yiengjfuk daengz ngoenzneix.

Yamqdin Byaij Haeuj Seizdaih Moq

Dangj raeuz cwngcwz cienz daengz ranz,

Bouxminz ndaw sim angq hai va;

Gak hangh gak nieb doengzcaez ca(cagaenj),

Lumj duzdungz gyaq youq gwnzmbwn.

Gaijgwz hailangh bienqvaq daih,

Ngoenzneix gaiqgaiq guh ndaej baenz;

Ndawreih ndawnaz ok gimngaenz,

Bouxboux naeksaem(sim) haenqrengz guh.

Yamqdin byaij haeuj seizdaih moq,

Haemh ninz hwnzloq hix angqyangz;

Singz mbanj doengzcaez bongh siujgangh,

Mauhgungz cix vangh(vut) bae gyae’gyae.

Daengngoenz okdaeuj angj baenz gim,

Raeuz ndaej dozbinz(duetgungz) caen angqyangz;

Gwndaenj ngoenzngoenz hwnj mbaeksang,

Beij ndaej gwn dangz lij vannyiemh(gig diemz).

Doenghbaez mbanj gungz vunz hix gungz,

Beksingq gutgungq youq ranzhaz;

Ngoenzneix gaiq gungz baet bae laj,

Bouxboux naj hai lumj mauxdan.

Lajmbanj hwng’vuengh ci rumzcin,

Hawj raeuz bouxminz engq miz muengh;

Haeujneix baenaj dieg Bouxcuengh,

Yienghyiengh hwng’vuengh bongh mbouj dingz.

Najranz maij ndaem gofaexcoengz,

Ndaw ndoeng maij maj gofaexgauj;

Ndaej gvaq ngoenzndei angqvauvau,

Dangj raeuz goenglauz mbouj ndaej lumz.

Fatyiengz gwzming conzdungj ndei,

Lumj baenz yienjheiq feihdauh noengz;

Gyaez guek cujyi lumj rumzdoeng,

Haethaemh hwnjroengz niemh coq sim.

Gaijgwz hailangh geijcib bi,

Singz mbanj gizgiz yienghsiengq moq;

Seiqmienh ranzlaeuz hwnj doxcoh,

Siujceh mozdoz hai fodfod.

Cungguek bouxminz ceiqheiq sang,

Yied dwg gannanz yied baenaj;

Vunz ndei saeh ndei miz daihbaj,

Gwnzgwnz lajlaj cungj riuzcienz.

Guengjsae Gyaeundei Daengx Biengz Rox

Guengjsae gyaeundei dwg ranz raeuz,

Beixnuengx doxaeu(doxgiet) sim lienz sim;

Sevei doxhuz youh onjdingh,

Ndwenngoenz hoengznding lumj fwjmaeq.

Bungz daengz seizndei va hai hoengh,

Guengjsae Diegcuengh angqfwngfwng;

Vunzlai eu fwen angqcoux mwngz,

Roq nyenz “dwngdwng” caj hek daeuj.

Lajmbwn dieg gyaeu youq gizlawz,

Bya heu raemx saw gingj maez vunz;

Cingj mwngz daeuj daengz Guengjsae cunz,

Bau mwngz cinhvunz gyoh mbouj liux.

Seiqgeiq lumj cin gingjsaek gyaeu,

Bak va hai daeuj mbungqmbaj mbin;

Gyong nyenz beijfwen sing dem sing,

Bouxhek daeuj dingq angq dangqmaz.

Guengjsae gingj ndei youq daih’it,

Bya heu raemx bik gvaq Hangzcouh;

Bouxhek bae le youh dauq daeuj,

Lij iu baengzyoux caez daeuj cunz.

Gyawj bya ciengq go roeg hix swenj(han),

Dep raemx eu fwen bya hix saet;

Guengjsae swnghdai saedcaih aet(gyaeu),

Gyanghaemh gyanghaet cungj maez vunz.

Daengz henz Lizgyangh ninz ndawrug,

Rumzcin raeujrub va hai oq;

Byaraemx Gveilinz lajmbwn rox,

Baihnamz guekcoj ceiq maez vunz.

Dwk fwnz couh yaek hwnj bya sang,

Dwk bya muengx gang roengz dah hung;

Siengj yaek ndang ndei ak lumj lungz,

Dingh bae Dunghlanz caeuq Bahmaj.

Gwn liux laeuj ndei “Doenglanzhoengz”,

Bouxlaux sim soeng naj hoengzmaeq;

Fuk lumj Doenghaij raemx lae raez,

Souh beij gocoengz Byananzsanh.

Doenglanz miz dieg ceiq cix lik(gyaeu),

Aenvan Daih’it Dahraemxhoengz;

Gyae yawj caen cix lumj duzloengz(lungz),

Gwnz dah raemxhoengz laefoedfoed.

Guengjsae dwg aen dieg gyaeusang,

Bya heu raemx langh lengjlili;

Ndoengfaex yangjbah dauqcawq miz,

Biengz neix gizgiz cungj ndei haenh.

Mbanjcuengh Baihnaj Engqgya Ndei

Dangj daiq bouxminz bongh siujgangh,

Lumj daeng angjdangx youq baihnaj;

Raeuz caez roengzrengz mbouj dingz max,

Mbanjcuengh baihnaj engqgya ndei.

Lajmbanj hwng’vuengh vanzging ndei,

Vunzlai doengzcaez hengzguh moq;

Duetgungz baenzfouq riuhoho,

Ndwenngoenz moqnaj engq ronghsag.

Gyoengqraeuz couh lumj naed sigloux,

Ndaetndaet gotyouq mbouj faenhai;

Minzcuz doxgiet ndei dahraix,

Cien bi fanhdaih mbouj bienq sim.

Mbanjcuengh yienghsiengq ngoenzngoenz moq,

Byaraemx roxsoq vunz engq gvai;

Dakhek laeuj noh gya byaek ngaiz,

Lij miz fwen nai gyoengq beixnuengx.

Ngoenzneix vunz yawj raeuz Mbanjcuengh,

Lajmbanj hwng’vuengh yienghsiengq leih(ndei);

Docih Dangj raeuz lingjdauj ndei,

Ndwenngoenz yied bae yied vandiemz.

Guengjsae bya gyaeu raemx hix gyaeu,

Mbanj raeuz gizgiz miz fwen mbin;

Youq gwnz Byacwx miz gaeqgim,

Dah hung roenx rim bya caeuq nyauh.

Cifeiz buet vaiq baeyouyou,

Cienz baengh cidaeuz youq naj hai;

Gak hangh saehnieb guh baenz vaiq,

Cienz baengh Dangj daiq cij miz muengh.

Ndaej gwn dangzrwi baengh rwi daeuj,

Gwn haeux docih boux ndaemnaz;

Ngoenzneix Mbanjcuengh ndei dangqmaz,

Cienz baengh Dangj daz ndaej baenzgoeng.

Hwnzloq Cungguek gaiq bouxminz,

Lajmbanj ndawsingz siengj doxdoengz;

Vunzlai riengz Dangj bae yunghgoeng,

Raeuz dingh miz ngoenz baenz dahraix.

Ga Dahraemxhoengz yiengq baihdoeng,

Vareux(moegmienz) hai mboeng coh daengngoenz;

Mbanjcuengh riengz Dangj byaij diuzroen,

Moqnaj ndwenngoenz ndei fanhdaih.

Raemxhaij cungj cix rap mbouj liux(sat),

Beijfwen yied eu yied miz lai;

Mbouj lumj simnduj riengz Dangj byaij,

Cien bi fanh daih engq vuenyungz.