9 nyied 10 hauh dwg ngoenz bet nyied cibngux youh dwg ciet lauxsae, vunzlai gak dieg gih raeuz guh lai cungj lai yiengh hozdung lumj guh daengloengz、loengh gaiqgwn、foux lungz foux saeceij daengj angqcoux song aen ciet hoengh neix.

Bet nyied cibngux, vunzmbanj Yinhcwngz Yen Cwngzgvanh Cin cingq nyaengq guh gak cungj gak yiengh “maxlwg”, caiq aeu bae gwnzhaw baij gai. Ngoenz de guh “maxlwg”dwg gij cienzdoengj Yinhcwngz, neix gaenq cienz ndaej saek bak bi lo. “Maxlwg”dwg aeu mba baenj baenz doengh duz cibngeih swnghsiuh, naengj ndei hwnjsaek le, couh aeu bae sax ronghndwen, mbaenjgouz dajndaem sou ndaej lai. Bi 2020, gij dinfwngz guh maxlwg cibngeih swnghsiuh Yinhcwngz ndaej senj haeuj buek daihbet swcigih gaep feihyiz mingzloeg.

(Fanz Saugvangh/樊绍光)

Ciet yaek daengz, Aen Cungsim Saedguh Vwnzmingz Seizdaih Moq laeng Vanzgyangh Mauznanzcuz Swciyen guh buek hozdung angqcoux Ngeihcib Daih angqhoh song aen ciet. Miz lauxsae lwghag biujyienj cezmuz、bohmeh caeuq lwg doxcaez guh doxgaiq、gangj goj bet nyied cibngux daengj. Neix hawj lauxsae、lwghag caeuq bohmeh lwghag ndaej doxgyau doxrox, cauhguh fwnhveiz naekna song ciet, hawj gyoengqvunz daejniemh yienghndei vwnzva cienzdoengj raeuz.

（Cinz Swjyij/覃子苡 Cinz Yacinz/覃娅宸 Cinz Yizsiz/覃奕晰）

9 nyied 10 hauh, vunzlai Yungzanh Yen Cangzanh Cin youq henz Dahyungzgyangh foux lungz foux saeceij, yinx daeuj haujlai vunz comzyawj. Aen doih biujyienj youz haw youz gai foux dwk gig ndeiyawj, hawj vunzlai angq gvaq song ciet, yiengjsouh ndwenngoenz vuenyungz siujgangh.（Danz Gaijhingh/谭凯兴）