Youq mwh aen daih 38 ciet lauxsae daeujdaengz, 9 nyied 9 hauh, Swcigih Dangjveij suhgi、Swcigih Yinzda Cangzveijvei cujyin Liuz Ningz bae daengz Gvangjsih Dayoz caeuq Nanzningz Si Daihngeih Cunghyoz, yawjngonz boux daibyauj lauxsae, daibyauj swcigih dangjveij、cwngfuj caensim camnai caeuq cukhoh gyoengq lauxsae daengx gih ciet lauxsae angqyangz.

Youq Gvangjsih Dayoz Dujmuz Gencuz Gunghcwngz Yozyen, Liuz Ningz yawjngonz le aen bingzdaiz yenzgiu sawqniemh gezgou daihhingz, dingq le Gvangjsih Dayoz bauqlwnh gij cingzgvang hong hwnqguh aen yozgoh itlouz dujmuz gunghcwngz, caemhcaiq caeuq Cinz Cwng gangjgoj, haengjdingh de laebdin ganghvei bonjfaenh、laemxsim yenzgiu sonhag, yienqmienx de roengzrengz yenzgiu, daiq aen doih gohyenz roengzrengz guhhong, haenqrengz gung roengz gij dinfwngz vaedsim gvanhgen, mbouj- duenh aeu ndaej cwngzgoj hung moq. Liuz Ningz giengzdiuh, Gvangjsih Dayoz aeu ciengj gaem seizgei、fatok gijndei、haenqguh baenaj, gaenxmaenx camgya hwnqguh Bingzluz Yinhoz daengj aen gunghcwngz hung, cietsaed gyavaiq hwnqguh “song itlouz”, guhbaenz engq lai aen yozgoh miz daegsaek, yungh hengzdoengh saed- saeh caeuq cingzcik ndei vih hwnqguh aen Gvangjsih gyaeundei seizdaih moq ok rengz engq lai.

Youq Nanzningz Si Daihngeih Cunghyoz Funglingj Yaugih, Liuz Ningz nyinhcaen dingq le gij cingzgvang mizgven hwnqguh ndaw- hag civei hagdangz caeuq gauhcungh gyauyuz hwngfat, caemhcaiq caeuq Bungz Cin’gyauh gangjgoj, ciengzsaeq roxyiuj gij guhhong ndwenngoenz de, gyo’mbaiq de geij cib bi guh ngoenz ndeu youq gwnz gyangjdaiz son saw son vunz. Liuz Ningz yienqmienx Bungz Cin’gyauh laebdaeb roengz- rengz, youq aen ganghvei bingzciengz aeu ndaej cingzcik engq hung moq.

Liuz Ningz naeuz, gyauyuz dwg daihgeiq aenguek、daihgeiq aendangj. Gyoengq lauxsae daengx gih aeu lai roxyiuj gij yiyi gietdingh “song aen laebdingh”, giengiet guh daengz “song aen henhoh”, haeujlaeg hagsib gvancez gij lwnhgangj youqgaenj gvendaengz gyauyuz Siz Ginbingz cungjsuhgi, haeujlaeg gvancez gyau- yuz fuengcim dangj, doeksaed gij gaenbonj yinvu guh ndei son vunz, son gyoengq hagseng dingjmaenh mbouj bienq dingq dangj gangj、riengz dangj byaij, roengzrengz majbaenz boux vunzmoq seizdaih rap ndaej mbaqrap naek minzcuz fukhwng.

Liuz Ningz giengzdiuh, daengx gih gak gaep dangjveij、cwngfuj caeuq gyauyuz bumwnz aeu lai gyagiengz hwnqguh aen doih lauxsae, ciuqfap baujcang gij gienz caeuq dakdaih lauxsae, hawj lauxsae baenz aen cizyez ndaej sevei aeueiq caeuq hawj vunz hozhaenz, hawj gyoengq lauxsae engqgya ansim son saw son vunz. Aeu dungjcouz ndei hong guenjhanh binghraq caeuq gyauyuz gyauyoz, netsaed guh ndei guenjhanh binghraq hagdangz, dingjmaenh ciengzseiz cinjcing guenjhanh caeuq wngqgip cawqleix dox giethab, guh saeq guh ndei ndawhag guenjleix fugsaeh, cungfaen baujcang lauxsae hagseng hableix aeuyungh, baujmaenh lauxsae hagseng cangqheiq caeuq ndawhag ancienz, cauh aen vanzging ndawhag ancienz simsangj.(Cinz Yizcwz)