Yaek fatcaiz, sien hai roen. Coenz vah neix gangj ndaej mbouj loek, hoeng coenz vah neix doiq vunz Mbanjrunghreiz daeuj gangj dangq ok roet dwk haw——naih mbouj daengz vunz.

Mbouj dwg gyoengq vunz Mbanj- runghreiz mbouj miz ukgyaeuj, hix mbouj dwg vunzmbanj neix gik lai, seizneix mbanjmbanj doeng roen lo, couh mbanj neix mbouj doeng roen.

Baenzlawz guh roen doeng daengz Mbanjrunghreiz bae ni? Bouxdaeuzmbanj、bouxdaeuz baih- gwnz cungj vih gienh saeh neix sieng uk.

Donh roen neix miz haj goeng- leix, gaen roen gaeuq coih daeuj couh aeu ciemq di reihnaz he, ciemq reih couh ciemq reih, vunzmbanj cungj heih gangj, couhdwg yaek guh diuz roen neix aeu ginggvaq gaiq reih moh ndeu, gaiq reih neix ndawde miz bak lai aen moh, yaek guh roen gvaqbae aeu senj ngeihcib geij aen moh.

Sinhoj couh sinhoj youq gizneix. Geijcib bi roxnaeuz geij bak bi roengzdaeuj, mbouj raen miz bouxlawz daeuj sauq gij moh neix gvaq, couhdwg naeuz mbouj rox boux- cawjmoh dwg bouxlawz, yaek senj moh, cungj mbouj rox ra bouxlawz, baenzlawz senj?

Mbouj miz vunz dajleix, gij moh neix miz lengq aen gaenq ciengz lak namh saenq, miz lengq aen gaenq maj rim gooen gohaz. Guh goengloh doeng mbanj, mbouj miz ngaenz hawj vunz senj moh, mbouj senj moh youh mbouj ndaej guh roen, baenzlawz guh?

Miz vunz naeuz:“Raeuz couh ok sawdaezsingj senj moh, danghnaeuz mbouj miz bouxlawz daeuj caeuq raeuz doxnaeuz, raeuz couh dangguh moh fouzcawj daeuj cawqleix couh ndaej.”

Couh yienghneix roengz giet- dingh, couh yienghneix raiz saw okbae nem.

Sawdaezsingj Senj Moh

Gak boux beixnuengx, aenvih yaek coih roen doeng mbanj, aeu gvaq gaiq reih moh bakmbanj, bouxlawz dwg cawj moh, muengh vaiqdi daeuj caeuq dou lienzhaeh baenzlawz senj moh.

Mbanjrunghreiz

Bi x ndwen x ngoenz x

Duenh seizgan haenx, gwnz rin hung bakmbanj、gofaex geq ndaw- doengh、gwnzhaw、 lajmbanj cungj nem rim mbaw sawdaezsingj senj moh neix.

Cib ngoenz gvaqbae, ndwen he gvaqbae, geij ndwen gvaqbae, mbouj miz saek boux daeuj lienzhaeh senj moh. Doengh boux hozgaenj haenx naeuz:“Mbouj leix baenzlai lo, raeuz couh dang guh moh fouz cawj daeuj cawqleix ba.”

Miz vah naeuz “iek gaej gwn haeuxfaen, gungz gaej vat mohfaenz”, gij moh neix geijlai daih cungj youq gizneix lo, bouxlawz gamj bae doengh, daihgya lij nyinhnaeuz caiq siengj- siengj banhfap.

Miz vunz naeuz, heuh vunz senj moh, vunz aeu lingh ra dieg bae cangq, aeu ra goengdauh daeuj hai roen, aeu yungh vunzhong daeuj senj moh, baebae dauqdauq mbouj miz ngaenz bouxlawz senj, lij dwg ok di ngaenz he hawj vunz ba.

Couh yienghneix, mbaw saw- daezsingj senj moh ndeu youh okdaeuj lo.

Sawdaezsingj Senj Moh

Gak boux beixnuengx, aenvih yaek coih roen doeng mbanj, aeu gvaq gaiq reih moh bakmbanj, bouxlawz dwg cawj moh, muengh vaiqdi daeuj caeuq dou lienzhaeh baenzlawz senj moh. Senj aen moh ndeu hawj ngaenz 500 maenz.

Mbanjrunghreiz

Bi x ndwen x ngoenz x

Duenh seizgan haenx, gwnz rin hung bakmbanj、gofaex geq ndaw- doengh、gwnzhaw、lajmbanj cungj nem rim mbaw sawdaezsingj senj moh neix.

Cib ngoenz gvaqbae, ndwen he gvaqbae, geij ndwen gvaqbae, mbouj miz saek boux daeuj lienzhaeh senj moh. Miz vunz naeuz, seizneix 500 maenz ngaenz guh mbouj ndaej maz saeh, ok lai di ngaenz, itdingh miz vunz daeuj lingx.

Couh yienghneix, mbaw saw- daezsingj senj moh moq ndeu youh okdaeuj lo.

Sawdaezsingj Senj Moh

Gak boux beixnuengx, aenvih yaek coih roen doeng mbanj, aeu gvaq gaiq reih moh bakmbanj, bouxlawz dwg cawj moh, muengh vaiqdi daeuj caeuq dou lienzhaeh baenzlawz senj moh. Senj aen moh ndeu hawj ngaenz 1000 maenz.

Mbanjrunghreiz

Bi x ndwen x ngoenz x

Duenh seizgan haenx, gwnz rin hung bakmbanj、gofaex geq ndaw- doengh、gwnzhaw、lajmbanj cungj nem rim mbaw sawdaezsingj senj moh neix.

Mbanjdoeng miz vunz gvaqdaeuj lienzhaeh lo, naeuz aen moh neix aen moh haenx dwg mohcoj ranz de; Mbanjsae miz vunz gvaqdaeuj lienz- haeh lo, naeuz aen moh neix aen moh haenx dwg mohcoj ranz de. Ciep roengzdaeuj mbanjgwnz mbanjlaj cungj miz vunz gvaqdaeuj lienzhaeh lo, mbouj daengz sam ngoenz, gij moh yaek aeu senj haenx cungj miz vunz lingx liux lo.

Gangj daeuj dwg saehndei, hoeng doiq Mbanjrunghreiz daeuj gangj hix miz vah gangj mbouj ok bak, ndawmbanj mbouj miz geijlai ngaenz, senj moh couh yungh bae geij fanh, baenzlawz guh. Miz vunz naeuz, sien heuh vunz senj moh gonq, senj aen lawz hawj ngaenz aen de.

Boux Mbanjdoeng cawx gyaeuj- mou, bwh yieng bwh lab cingj goengdauh daeuj senj moh lo, vat aen moh daih’it, dwg doi namh ndeu, ndawmoh mbouj miz saek yiengh; vat aen moh daihngeih hix dwg doi namh ndeu, ndawmoh mbouj miz saek yiengh, vat aen daih sam hix dwg yienghneix.

Boux Mbanjsae cawx gyaeujmou, bwh yieng bwh lab cingj goengdauh daeuj senj moh lo, vat aen moh daih- it, dwg doi namh ndeu, ndawmoh mbouj miz saek yiengh; vat aen moh daihngeih hix dwg doi namh ndeu, ndawmoh mbouj miz saek yiengh, vat aen daih sam hix dwg yienghneix.

Ciep roengzdaeuj, boux mbanj- gwnz daeuj vat gij mohcoj de, hix mbouj raen saek yiengh; boux mbanjlaj daeuj vat gij mohcoj de, hix mbouj raen saek yiengh. Ngeihcib geij aen moh cungj vat liux lo, cungj dwg doi namh ndeu, cungj dwg mbouj miz saek yiengh. Gyoengqvunz boux yawj boux, mbouj rox gangj vah.

Miz vunz naeuz:“Gij moh neix dwg mbouj dwg haem youq lajnamh ni? Aeu vat roengz laj bae yawjyawj cij ndaej.”

Vunzmbanj cingj ngouhgih daeuj, cug aen moh cug aen moh vat liux cix mbouj raen saek yiengh, vunz Mbanj- runghreiz naeuz boux Mbanjdoeng、boux Mbanjsae、boux mbanjgwnz、boux mbanjlaj:“Baenzlawz suenq?”

Boux Mbanjdoeng、boux Mbanj- sae、boux mbanjgwnz、boux mbanjlaj cungj mbouj miz vah gangj, laeglemx ndonj bae ranz liux lo.

Gienh saeh neix caen miz di geizgvaiq, vat bae baenzlai aen moh cungj mbouj miz saek yiengh, dwg mbouj dwg bak lai aen moh gwnz gaiq reih neix hix dwg moh gyaj, hix cungj dwg mbouj miz saek yiengh?

Vunz Mbanjrunghreiz gietdingh vat gij moh gwnz gaiq reih neix liux bae, bouxgeq ndawmbanj okdaeuj lanz naeuz:“Mbouj ndaej bw, bak lai aen moh neix cungj miz aen ndeu dwg moh caen, gaxgonq bouxdai lau vunz caeg moh, couh yienghneix guh haujlai moh gyaj, hawj boux caeg mbouj rox vat aen lawz ndei.”

Vunzgeq yienghneix baez gangj, vunzmbanj singj gvaqdaeuj lo. Miz vunz naeuz, yawj daeuj bouxdai neix itdingh dwg boux fatcaiz ndeu, mbouj ni, baenzlawz miz ngaenz cawx gaiq reih baenzlai gvangq daeuj cangq moh? Baenzlawz miz baenzlai ngaenz daeuj cingj vunz guh baenzlai moh gyaj? Baenzlawz lau vunz daeuj vat moh?

Neix dwg gienh saeh geizgvaiq ndeu, vunzmbanj mbouj miz baenzlai simgei bae naemj ngeix gij saeh neix, gij moh gik roen haenx gaenq “senj” liux, ciep roengzdaeuj couh cuengqsim bae guh roen lo.

Mbanjrunghreiz doeng roen bihaenx, miz vunz daeuj daengz gaiq reih moh haenx damqcaz, naeuz gaxgonq bouxdaeuz dieggyae ndeu daiq bing youq gizneix caeuq vunzdig doxhoenx deng sieng lo, vihliux gouq de, vunzmbanj couh gyajcang naeuz de dai lo, daihgya comz ngaenz cawx gaiq reih neix daeuj cangq de, lau vunzdig daeuj vat moh, vunzmbanj couh guh baenz lai aen moh, gij moh gizneix cungj dwg moh gyaj ndwi.