Daihngeihseiq Au- lungzgveiz Buetdeuz Lo

Ndonj gvaq ndoengfaexnganx, gvaengz gvaq geij aen ranz henz bya, buet daengz baihnaj ranzdaemq laeng miuhsaenzvuengz seiz, gou gaenq baegfofo lo.

“Aulungzgveiz! Aulungzgveiz!” Gou fwngz he rex begdou, sing hung dwk hemq coh ndawranz.

Ndawranz dinghrikrik, mbouj miz vunz han, gou baez nyoengx bakdou, “yiya” sing ndeu, yenzlaiz dou caengz haep caez hane.

Gou iet gyaeuj daj gehdou yawj coh baihndaw, laepngaungau, Au- lungzgveiz mbouj youq, cij miz aen loengzdietsienq ndawde loq miz di sing, gou rox ndawde miz ngwzdoeg, mbouj gamj yamq gvaq giemxdou, lawq yaep he, haep dou dauq, cienq ndang byaij coh ndaw mbanj.

Aulungzgveiz nanzdauh couh yienghneix buetdeuz lo?

De itdingh nyinhnaeuz doeg dai Ahveij le, couh ndaej boizhaemz Simjmehveij mbouj haq hawj de, ndaek vunz neix dwglau dahraix, deq le baenzlai bi, cungjsuenq hawj de deq ndaej le aen gihvei neix, Ahveij caen hojlienz, yenzlaiz diuz mingh Ahveij caeux couh youq ndaw fwngz de lo.

Hing dwg gaiq laux manh! Daiq dauqdaej gaenq laux, ndaej yawj gij saeh lai, de dawz gij ndei caeuq gij rwix Aulungzgveiz faen ndaej gig cingcuj. Gou lij doiq daiq euq, nyengh naeuz de dwg boux vunzndei deng ienuengj, caen dwg ngawz lai lo.

Ngoenzhaenx banringzgvaq, Ah- veij gwn le gij yw gaijdoeg bohgoux gou cawx haenx, dungx cij mbouj in, dawz gij doxgaiq ndaw dungx siq okdaeuj caez, cungjsuenq ce ndaej diuz mingh roengzdaeuj, bohgoux daj ranz Ahveij okdaeuj seiz, couh heuh gou caeuq de bae ra Aulungzgveiz.

“De mbouj youq aen ranz- daemq.” Gou youq byongh roen lwnh hawj bohgoux, “Aiq buetdeuz lo.”

“Buetdeuz? De ndaej buet daengz gyawz bae?”

Bohgoux mbouj saenq gou, deq de bae nyoengx gij dou caengz haep caez le, cijndaej ngaemgyaeuj mbouj oksing dwk dauqranz.

“Baenzlawz ndaej hawj de baenzneix couh buetdeuz lo!” Daiq baez dingq couh gip lo.

Danghnaeuz daiq dwg bouxsai, gyoengq vunz ndaw mbanj itdingh senj de guh yanghcangj, de baenzneix simndat, deng caeuq mbouj deng cungj aeu faen guh seuqcingh:“Ra geij bouxsai cangq bae gyaep de ha, mbouj ndaej hawj de buetdeuz!”

“Lij mbouj rox dwg mbouj dwg buetdeuz lo.” Bohgoux fouznaih dwk baij fwngz.(caengz sat)