It

Bi 1943, gwnz bangxdat gizhaenx

Gyoengqvunz hoenxciengq ndangdaenj sengxsan caeuq fajnaj faenxfan

Cingq gannanz fuzrex hwnjbae

Gou naemj, daxboh hix youq ndawdoih

De aeu fajfwngz saenzdedded, menhmenh mbehai mbawgeiz hoengz- gywggywg

Doengh dujva ngamqngamq angj hai haenx

Raemxraiz doekcaek

Ngeih

Boux bawxmoq bwz nogbyoem baenz yiengh mehmbwk neix, de dingq gyaeuj Dahsienghgyangh haenx

Singcung singbauq menhmenh caemyaenz, de naemj, bouxsai wnggai yaek dauqma lo

Roxnyinh miz di najnyaenq、simvueng

De yawj hamqdah doiqnaj mok- hau sanq bae

Bouxsai cug ga haenx cingq riuhehe coh de

Sam

Daxmeh geq lij fuz bogdou deq dai deq ndiu. De mbouj siengj buen deuz

Lau daeglwg dauqma ra mbouj raen ranz

Haeuxyangz ndawreih maj gvaq geij miuz

Aenranz yied ngoenz yied daemq lo

Ndaundeiq daj conghroh ciuq roengzdaeuj. De siujsim lumh aen vujgozsingh aeu baengzhoengz raed baenz

Baenzlai bi, de liuh mbouj daengz

Daeglwg de, youq ndaw congh- yiuz dieg baihbaek sij saenq fung dem fung

Cix mbouj miz banhfap geiq okbae

Seiq

Yaek miz vunz soengq duj vahoengz ndeu hawj gou lwi?

Raemxfwn gyoetgyat, doek youq gwnzndang gou

Dauqngeix bihaenx, henzhamq Dahsienghgyangh mok hausaksak

Daxmeh couh youq seizhaenx, ciuqseiz okdou hwnj bya

De aeu raetndoeng, youq ndaw guenqvax aeuq danggaeq

Baez gaemz baez gaemz bwnq boux caeuq daxboh daenj buhbing doxdoengz de

Caen lau goengqbya yawjraen

Gij conghgumz mbouj dingz aeu mbawcoengz caeuq namhdoem dienz- moek haenx

Caen lau lwgda de

Aenvih raemxda lae caez bienqbaenz ndaekrin caepcat

Haj

Youq Dahsienghgyangh, gou caeuq daxmeh dingq fwn doek baenzhwnz

Caj goengqbya hoengzndaem bienq ndaej heuswdswd

“De yaek dauqma luba!”

Binaengz, daxmeh cungj baenz- neix naeuz

Gwnz reihndoi rog ranz, dou ndaem le haujlai gomanh

Baez okdou, gou couh yawjraen baenz benq hoengzgywg

Gig lumj gij lwedndat saemqboh youq gwnz dieg hoenxciengq lae saj

Roek

Gou mbouj siengj dauqngeix seizdoeng, mwh daxboh byaij coh doiqhamq Dahsienghgyangh

Aenmbwn nitnatnat

De aeu lwgmanh raeujraeuj, aenndang caeuq doengh boux caez hojsouh haenx

Daxmeh mbouj oksing, youq diegsang vat ok maenzdoengzlingz ndaej dienz dungx

Ngoenznaengz haetromh miz mok

De cungj bae henzdah muengh- yawj, gizhaenx, miz feiz dawzyubyub

Caet

Naed haeux ndeu ndaej youq gyanghwnz, ciuqrongh goetndok ba

Ndongjndatndat, lumj gocoengz ndaw ndoeng daengjsoengsoeng

Gou nyouq daengz gij heiq haemzswd

Daxboh bihaenx gaenq daeuj gvaq, de couh caeuq gyoengq vunz daenj buhmong gwed cungqraez

Ndoj youq ndaw ndoengfaex nyasaegsaeg, ruenzrux baenaj

Gvaq haujlai bi le, miz vunz vixvix aen’gyaeuj ndaw roengq gwnz laeuzsingz

“Daxboh mwngz, mbouj youq lo!”

Fwnzsauj daxmeh raemj dauq doi sang’vidvid

“Mwngz aeu roengzrengz doeg- saw, majhung le henhoh guekgya!”

Youq gyanghongh, gou gaem fag cungqboggog aeu faex guh de

Hag rox onjdwtdwt liuq simbaj

Bet

Daxboh gou caeuq daxboh gyoengqvunz neix doxdoengz

Youq gwnz Dahsienghgyangh fouzmiegmieg

Cij dwg baez de roengz raemx gaxgonq

De daengq gou aeu guenj ndei aen vujgozsingh saekhoengz gwnz mauh

“Riengz gungcanjdangj mbouj deng dai”, Dahsienghgyangh lwed nyumx hoengzfwgfwg

Gou yawj mbouj cingcuj fajnaj byombyet giendingh mbouj utfug de

Gouj

Binaengz, gou riengz daxmeh、caeuq doengh boux daxmeh gyoengq- de doxdoengz

Bae gwnzbya, benq faexcueng heusausau hawj vunz siengsim haenx

Daxboh ninz le geijcib bi lo

Nditrongh ciuq mbawfaex go- nywj engq lwenqda

Gou dauqngeix gij vah de gangj, raemx caepcatcat, hoeng daihdeih onjdupdup

Cib

Gij gikcingz bak bi gaxgonq, gij saenqyiengj giendingh

Bienqbaenz nditromh con fwjmok

Ginglig fwnrumz, lawh baenz cungj saekdaej moq seizdaih hung

Hoengzgywggywg、gyaeulili, daiz- heiq iq aen rangh aen

Gyoengqraeuz gig vaiq haeuj ndaw giek

Cingq lumj raeuz maqmuengh nei

Youq hawsingz、youq ndawcangj, fajnaj coznomj cingsaenz gvaekgvaek

Youq lajmbanj, gou itdingh ingj mbawsiengq

Youq gwnz deihdoz Cungguek lumj yiengh gaeqboux haenx

Byaengqda cimyawj aen seiq- gyaiq hoengzfwg neix

Ciengz binghraq hung ngamq- ngamq hoenx hingz ndeu

Lij miz gij ciengq baet gungz duet hoj baenzbaenz aeu haenqrengz dwkhingz

Mbouj miz geijlai goj bae haenh ciengq yienghsiengq gungcanjdangj- yenz

Cawzliux seizcoz rengzhoengh bae gienhawj

Cib’it

Lizsij itdingh geiqmaenh, dou youq moix gaiq sigbei hungsang siengjniemh gyoengq lezsw

Doenghboux naj laemx laeng swnj miz saenqyiengj doxdoengz de

Gaenriengz diuz lohsienq aendangj dazyinx, gaenriengz aen fuengyiengq aendangj ceijmingz, haenqheiq baenaj

Youq benq dieg rom lai ok noix neix

Cingq cauh ok goengcik noixraen aen dem aen

Bak bi fwnrumz mboujcaengz gatduenh gvaq

Diuz roen majhung gizgiz dwg gumzgumz gamxgamx

Vujsingh Hungzgiz youq gwnz najriu vunzlai mbinmieg

Gou yawjraen nditromh mizmuengh, gaenq menhmenh hwnj sang

Doenghgij geiqhauh neix, youq baez banringz lawz ndaej supaeu

Cungj gyaeundei ciengxlwenx youq. Caemhcaiq youq seizneix

Duz lungz hungloet cingq yathwnj ndeu daengj gyaeuj sang- ngaungau

Ndwn youq seiqgyaiq baihdoeng gyae’gyanggyang

“Gou youq gizneix vuenyungz dangqmaz”, seizneix aen ndaundeiq moq ndeu doekseng

Gou gaemhdawz gij saekhoengz ciengxlwenx lwenqmyanz