Simjmehveij mwhneix gaenq rwngh caez, ing youq gwnz congz, rag vengqbuh goemq bak doek raemxda.

“Gij ywdoj haxbaenh de gwn ne.” Bohgoux cam.

“Youq ndaw ranzcauq.”

Gou rag bohgoux byaij coh ranzcauq.

Gou biengj hai farek gwnzcauq, naeuz:“Gij ywdoj neix aeu aeuq gwn, haxbaenh gaenq hawj Ahveij gwn vanj he gvaq.”

Bohgoux dawz gouh dawh deuq nyinghfaex ragnywj ndawrek, gungj hwet di he di he menhmenh cimyawj, ndawbak namnam niemh gij cohyw:“Neix dwg mbawcukoiq, neix dwg golae, neix dwg……maz? Neix dwg cehgocoengh ha? Yi?!”

“Baenzlawz?” Gou maeuq youq henz yawj bohgoux, gou cij rox bohgoux rox di yw, aenvih de seiziq gaenq youq ndaw bouqyw guh lwgsae, ngoenzneix cij rox de caen miz bonjsaeh bw.

“Cehgocoengh, van manh miz doeg, ndaej vaq nong siu doeg, yw baez ceih foeg, mbouj ndaej seizbienh gwn haeuj bak……” Bohgoux sawq- mwh gveng dawh, ndwn hwnjdaeuj naeuz, “Lungzgveiz baenzlawz ndaej yienghneix guh, cehgocoengh baenz- lawz ndaej dap golae gwn ne? Caiq mbouj doq gouq dungxsaej cungj yaek naeuh bae lo.”

“Bohgoux!” Gou lau ndaej nyengh lo, fwngz ndeu rag genbuh bohgoux cam:“Dwg gij ywdoj miz doeg? Aulungzgveiz daegdaengq yaek haih Ahveij?”

Bohgoux fid gengoenh, yamq hung byaij ok ranzcauq, gangj coenz vah ndeu:“Lwgnyez rox maz?”

Gou ndwn youq henz loz iq, itseiz mbouj miz cawjeiq lo.

(caengz sat)

红水谣