Ngoenzneix hwnj dangz go coz- vwnz, daezmoeg dwg 《Boux Lauxsae Ndawsim Gou》. Gou ngamq gangj it ngeih aen iugouz raiz cozvwnz, couh mizmbangj hagseng youq baihlaj cici coco gangjsebseb. Gangj sat, gou hawj gyoengq hagseng doxgangj gij seiloh cihgeij gonq, caiq doengh bit sij gauj.

Raen gyoengq hagseng mwngz coenz gou gawq, gangj ndaej hoengh lumj gwnzhaw nei. Gou byaij roengzbae dingqdingq. Miz di gig rox naemj: Dingh ndei sij boux lauxsae lawz, caiq gangjgangj bouxde maj ndaej baenzlawz yiengh, gij saeh de youh miz di lawz…… Hix miz doengh boux lij caengz ra ndaej roenngeix, naengh youq gwnzeij song fwngz dengj hangzgauq cingq yawj dienvabanj ngaengxngwdngwd. Gou byaij gvaqbae daezsingjnaeuz:“Naemjnaemj miz boux lauxsae lawz hawj mwngz yaenq- siengq ceiq laeg? Bouxde bingzseiz maij guh maz, lumjnaeuz lauxsae yijvwnz bingzseiz miz cungj biujcingz lawz?” “Fatheiq!” Boux doengzhag baihlaeng yot han sing ndeu, gij sing de youh hung youh coiq. Fwt gou nyinhnaeuz coenz vah coiqcwtcwt neix, couh lumj fag cim soemset coeg haeuj ndawsim gou daeuj.

Ngeihcib bi gonq, gou ngamq yamq hwnj gyangjdaiz sam cik dang lauxsae, daxboh couh daengq sam daengq seiq:“Gaiq faexbien ndeu, song diuz faenjbit, sam cik gyangj- daiz…… Baezlaeng aeu caeuq gyoengq hagseng caemh hag caez lienh, nem faenh hong sonhag doengz maj nw!” Gou geiq- maenh gij vah daxboh, mbouj lumz aen sim hainduj gou vihmaz dang lauxsae, itcig youq diuz roen sonhag haenq guh gaenx guh.

Seiz lij caengz dang lauxsae, gou hix dwg boux hagseng, youq ndaw hagdangz fouz you fouz lawq, caenh- guenj yiengjsouh gij gyaez daxboh daxmeh diemzsubsub; dang lauxsae le, aen hagdangz dwg giz dieg gou byaij hwnj byaij roengz, caemh lij causim doengh gij saeh hung saeh iq hagseng. Caengz dang lauxsae seiz, gou dwg lwglwnz ndaw gyangfwngz bohmeh; dang lauxsae le, ndaw gyangfwngz gou miz gyoengq lwglwnz caj gou bae ganq. Caengz dang lauxsae seiz, baez daengz ok dou cungj sien ciuq gingq cang ndang, ndawgingq yienh’ok faj naj riunyum le couh okdou; dang lauxsae le, loenglauq ndaej ciuq gingq saek baez, fatyienh boux ndawgingq faj naj lumj riu mbouj riu, caemh lumj seiznit naj gyaengj noh heu. Yi? Vihmaz gou bienq lo? Gou youq ndawsim cam cihgeij.

Go cozvwnz roengzdangz lo, boux hagseng dawz bonj cozvwnz ngamq sij ndei diuqbumbum daeuj daengz dangqnaj gou, yienh bonj cozvwnz gvaqdaeuj hawj gou yawj:“Lauxsae, gou dwg sij mwngz ne.” Raen de naj riunyumnyum, gou fan hai bonj cozvwnz daj goek yawj roengzbae. Ngamq yawj ndaej song sam rangh, gou caen daejriu mbouj baenz ne—— “Yijvwnz lauxsae gou rox bienq, ngoenz bienq geij baez, mizseiz riu, mizseiz heiqgaenj ndaej dingjgyaeuj hwnj feiz…… De miz ‘sam aen gyaeuj roek cik gen’……” Gou ndawsim ngeix hwnj ngeix roengz:“Neix dwg sij gou ha?” Gou cienq gvaqbae cam bouxde:“Mwngz neix mbouj dwg sij Sunh Vugungh ha? Miz sam aen gyaeuj? Roek cik gen?” Boux hagseng iet fwngz gag lumh- lumh laenggyaeuj, gazdwddwd gangj:“Daxmeh gangj lauxsae caeuq de doxdoengz miz sam aen gyaeuj roek cik gen.”

“A?” Gou ngeixvaeg laebdaeb yawj roengzbae—— “Lauxsae ngoenz- naengz aeu guh haujlai hong: Hawj dou hwnjdangz、bang dou gaij cozyez、roengzdangz le lij aeu guenj dou gaej luenh gyaep luenh buet…… De couh gaen daxmeh gou doxdoengz, ngoenz- ngoenz aeu guh haujlai hong, fwngz ga mbouj ndaej dingz, lij mbouj rox baeg mbouj ndaej yiet”. Yienzlaiz gij hong gou moix ngoenz guh, doengh boux hagseng mizsim cungj ngonz youq ndawda, geiq youq ndawsim.

Gou hix geizheih cihgeij moix ngoenz guh ndaej baenzlai hong, boux vunz ndeu gingqyienz guenj ndaej ndei roekcib boux hagseng. Doengh- baez guh hagseng, gou boiqfug gvaq lauxsae yienghyiengh guh ndaej diuzleix faenmingz, dang lauxsae le, gou guh saeh hix mbouj vueng mbouj muengz, guenj ndaej gijliz, leix ndaej hagsib. Mizseiz haeuj ban, soengz hwnj gyangjdaiz, song da baez “sauq” gvaqbae, aen ban hoenghhwdhwd sikhaek bienq ndaej caemrwgrwg. Vihmaz gou bienq lo? Gou youq ndawsim cam cihgeij.

Ndwenngoenz gou bienq lo. Yienzlaiz cij miz bohmeh daeggo dahcej, seizneix cungj dwg gou caeuq gyoengq hagseng. Doenghbaez yaek dang lauxsae, gaen bohmeh gangj ndei moix ngoenz cuengqhag dauqranz loengh ngaiz caj gyoengqde dauqranz, couhmoz buenx gyoengqde bae haw…… Dang lauxsae le, cuengqhag le ciengzciengz mbwn laep cij dauqranz, daengz ranz couh naengh haeuj daiz gwn caeuz. Ngoenz couhmoz, gou mbouj dwg bwh go couhdwg guh gogen, nyaengq neix nyaengq de, hix mbouj miz seizgan buenx bohmeh okdou. Aeu gij vah bohmeh gangj, gou dang lauxsae le, gyoengq hagseng ndawban cungj ciemq rim gij ndwenngoenz gou: Hagseng cinbu gou sim’angq, hagseng famh loek gou simgip. Ngoenznaengz gou cungj lauheiq hwnjdangz mbouj gangj liux gyoengqde hag mbouj ndaej, cozyez gaij mbouj liux mbouj ndaej gibseiz rox gyoengqde hag ndaej baenzlawz, gijliz mbouj guenj ndei gyoengqde roengzdangz doxgyaep loengh sieng lune……

Ndangfaenh gou bienq lo. Caengz dang lauxsae cij rox lauxsae son hagseng hag cihsiz couh ndaej lo. Seizneix dang lauxsae le, gou cij nyinh cihgeij couhdwg bohmeh daihngeih gyoengq hagseng, yienghyiengh re, lohloh guenj. Boux neix baizdoih seiz gyaeuj ngunh daengxlaemx ra yenzyinh, boux haenx bae lah raemx buhvaq dumz aeu rieg, songde vih di saeh nyangqbak caemh doenghfwngz hwd hwnjdaeuj aeu cek, bouxde bit coq youq ndawban mbouj raen aeu ra…… Gij simvuen sim’angq simnaiq simyou gyoengqde, gou aeu rox aeu guenj, caemhcaiq riengz seiz riu seiz you.

Seiz mbwq caeuq doengzsaeh ndaw bangunghsiz dwen gij saeh gyoengq hagseng sij gij cozvwnz, gyoengq doengzsaeh cungj naeuz gyoengq hagseng neix caen rox siengj. Gou rox dwg gyoengq hagseng ndawban hawj gou bienq lo, gou cij maj ok “sam aen gyaeuj, roek cik gen” daeuj; dwg faenh hong lauxsae hawj gou bienq lo, gou cij mbouj rox naetnaiq. Baezlaeng gou aeu laebdaeb guh ndei faenh hong neix, cengdi youq gwnz diuzroen sonhag caeuq gyoengq hagseng doengzcaez bienq hung bienq ak.