《Miz Mwngz Miz Gyaez》 souj go neix youq ndaw soujgih gou baedauq boqciengq, gou ninz youq gwnzmbonq gekliz, raemxda gag doek lumj fwn.

Bineix 6 nyied, dahlwg dayoz bizyez lo, de siengj daengz Bwzhaij aen gunghswh ndeu guhhong, 7 nyied 10 hauh aeu bae daengz gunghswh yawjyawj.

Dahlwg iugouz buenx de bae Bwzhaij, lwg bae gyae bohmeh sim mbouj onj, gou baenzlawz hix aeu caeuq de bae. Ngoenzhaenx, song bohlwg dou daj Sihlinz Yen naengh banci daengz Bwzswz Si, caiq daj Bwzswz naengh ci daengz Bwz- haij.

Youq gwnzloh, gou baez naemj daengz dahlwg bizyez couh ra ndaej hong, roxnyinh angqyangz raixcaix, bonjlaiz gij va nywj gwnzbya mbouj miz maz geizheih, hoeng seizneix youq ndaw lwgda gou hix bienq ndaej hoenghhwd hwnjdaeuj lo, gou daj conghcueng ndawci yawj gij gingjsaek baihrog, mbouj rox naetnaiq saekdi.

Lajbyonghngoenz seiq diemj lai cung, dou daengz Bwzhaij Si lo.

Aen dieg Bwzhaij neix, gaenq dwg giz dieg gou nanzlumz. Bi 2007, gou daiq lwg daiq yah bae Bwzhaij Si rogsingz ndaem byaek, seizde dahlwg ngamq ndaej roek bi, hix gaen caekhaex bouxlaux bae dap bungz、vat reih, guh ndaej ndang uq naj ndaem.

Saedceij gvaq ndaej gig bingz- ciengz, moix ngoenz couh caeuq byaekheu raennaj, caeuq rumzhaij gangjgoj, bouxlawz cungj liuh mbouj daengz miz maz saeh fatseng.

Gvaq mbouj ndaej geij ndwen, raq daizfungh cibngeih gaep gig vaiq cung gvaqdaeuj, hwnz ndeu bongj laemx le gij diengzbyaek gou, gak cungj sezbei cungj deng rumz hung gienj bae liux, gou umj dahlwg youq ndawrungj daej lo.

Gou ngamq ndaem byaek, lij caengz ndaej saek faen ngaenz, mbwn couh mbouj nyiengh lo. Yienghneix, gou sam bohmeh lwg couh gienj buhvaq, dauqma ranzmbanj, daj neix caiq hix mbouj dwen daengz giz dieg siengsim neix.

Ngoenzneix youh caiq daeuj daengz Bwzhaij, aen sim gou siengj daengz haujlai saeh, gou caenhda bae ra giz diegyouq seizde doengh ndaem byaek, hoeng dangqnaj bienq ndaej gvangqyubyub, baenzlawz ra hix ra mbouj raen lo.

Dangngoenz, cejngeih daeuj ciep dou, youq mwh byaij gvaq diuzroen sohsad, cejngeih naeuz:“Gizneix couhdwg giz dieg sou gaxgonq ndaem byaek, seizneix gaenq dwg laeuz sang rimradrad lo.” Gou song da cimyawj, roxnyinh gizneix fazcanj daih vaiq lo, gamjdoengh raixcaix.

Dahlwg mienhsawq sat le, 7 nyied 12 hauh banhaet cib’it diemj, dou naengh hwnj ci dauqbae Sih- linz lo.

Banhaemh, cejngeih daj denva hawj dou naeuz:“Bwzhaij lajbyongh- ngoenz seiq diemj lai miz boux ndeu gij hwzsonh dwg yangzsing, seizneix gaenq dawz bae gekliz, siujgih cienz- bouh gyonjcomz guh hwzsonh genj- cwz……” Dou doeksaet yat, ngoenz daihngeih couh caeuq dahlwg daengz veiswnghyen guh hwzsonh genjcwz caeuq bau hawj baihgwnz.

Boux lingjdauj ndawcin fucwz fuengzraq cibfaen yawjnaek, sikhaek daengz ranz heuh dou youq ranz gekliz, husw cienmonz haeuj ranz daeuj guh hwzsonh genjcwz.

Dou youq ndawranz gekliz seiq ngoenz, aenvih binghraq Bwzhaij yied daeuj yied youqgaenj, yienh fuengzre binghraq cungsim youh heuh gou daengz ndawyienh doxcomz gekliz. 7 nyied 18 hauh lajbyonghngoenz, ndawyienh couh baij ci daeuj ciep dou, guh baez daihngeih gekliz.

Ciuhvunz baez daih’it bungz daengz gij saeh neix, hawj gou gig mbeilek, gou gaen canghyw daeuj daengz ranzgekliz, ndawde hoengq- fwkfwk.

Aenvih okdou gipmuengz, gij doxgaiq ngoenznaengz sawjyungh gou mbouj ndaej bwh ndei, couh lienz gij ceij uet bak uet fwngz hix lumz bae lo. Mbouj miz banhfap, gou cijndaej dwk denva hawj Loz Hauhij boux baengzyoux youq Gungh’anhgiz hwnj- ban bang gou cawx. De ciep ndaej denva gig doeksaet, cam gou dwg maz saeh. Gou menhmenh caeuq de gangjmingz.

Ngoenz daihngeih, Loz Hauhij couh cawx daeh makbingzgoj ndeu、daeh makit caeuq haujlai mienh- gvaicanh gvaqdaeuj, hawj boux vunz- hong soengq daeuj hawj gou.

Doxgaiq soengq daengz lo, gou baez yawj, baenzlawz cawx baenzlai? Gou caiq dwk denva hawj Loz Hauhij, de riuhwhw naeuz:“Beix- nuengx, mbouj miz maz ne.” Gou fwngz riuj gij doxgaiq neix, vah youq ndawbak gangj mbouj ok, ndawsim roxnyinh raeujrubrub.

Dwen daengz Loz Hauhij, geij bi neix daeuj, gij siujsoz de raiz, cungj youq《 Cozgyah Bouxcoz》《Gvangjsih Vwnzyoz》《Nanzfangh Vwnzyoz》daengj ganhvuz fatbiuj, dwg Sihlinz Yen boux canghraiz loq soem ndeu. Aenvih diuz sienq vwnzyoz daeuj yinx, gou caeuq de baedauq goj ndaej gaenjmaed, mbouj miz maz mbouj gangj. Lauheiq ndaej de doxbang doxfuz, gou hix engq gyaez raiz faenzcieng, ndaejhoengq couh raiz.

Haetromh, gou hwnq le couh sou ndaej veihsin Loz Hauhij, baez yawj, de sij souj go, coh heuhguh《Miz Ranz Mbouj Ndaej Ma》, gou diemj sawq- dingq, soujgih couh boq hwnj- daeuj——

Baezneix youh mbouj ndaej buenx daxboh daxmeh gwn haemh- ndaep lo.

Byawz rox ndawsim gyoengqde dwg maz feihdauh?

Banhaemh soengq daengngoenz doek, haemh laep ciep ronghndwen okdaeuj.

Raeuz youq gwnzloh gouqmingh mbouj ndaej doiqlaeng.

Bineix youh mbouj ndaej buenx vunz ndawranz gwn caeuz lo.

Gou rox ndawsim gyoengqde dwg maz feihdauh.

Seizdoeng daeuj youh doek nae, seiqgeiq youh lwnz dauq.

Raeuz youq gwnzloh siumied binghraq mbouj ienqhoij.

……

Baez dingq sat, gij raemxda gou gaenq venj rim faj naj song mbiengj.

Neix dwg souj go soengq hawj gyoengq guh gij hong dingj binghraq daengx guek. Dwg ha, dou dwg boux gekliz, gyoengq canghyw cungj mbouj vut dou、mbouj yiemz dou, gij gwn dou cwngfuj mbouj sou cienz, dou youh miz maz mbouj nyienh gekliz、mbouj boiqhab ne?

Ngamq ngeix daengz neix, daeglwg daj denva daeuj lo, de naeuz:“Daxboh, seizlawz cij dauqma ne? Singhgiz roek gou caj mwngz guh byaek, gij byaek mwngz guh couhdwg rang lai.” Gou naeuz:“Lwg ha, daxboh mbouj rox seizlawz ndaej dauq, aeu dingq gij vah baihgwnz ha.” Vah baez okbak, raemxda couh yaek doek lo.

Roxnaeuz Loz Hauhij lau gou youq ndaw ranzgekliz mbwq lo, de aeu go daeuj nai gou, moix ngoenz cungj fat geij souj go daeuj hawj gou dingq, gou moix ngoenz cawz le sij faenzcieng, baeg le couh dingq gij go de fat daeuj.

Ngoenzneix banhaet, gou hai cueng, mbouj rox doiqnaj ranz bouxlawz cuengq souj go《Caj Binghraq Gvaqbae Gou Siengj Okbae Byaijbyaij》:

Caj binghraq gvaqbae, gou siengj okbae byaijbyaij.

Yawj bya yawj raemx yawj va, yawj vunzcaen baengzyoux.

Ingj mbawsiengq vunz daengx ranz, gwn geij cenj laeuj doxcomz.

Duet aen goujcau roengzdaeuj, gij najriu de dwg mbouj dwg ciuq- gaeuq.

……

Gou fwngz gaem gvaengh cueng, hawj sing go gveuj rim ndaw ndang gou.