Ngoenzlwenz lajbyonghngoenz, gou youq ranzdajcawj swiq duix, lwgnyez ndaej haj bi gou dawz denva buet gvaq daeuj naeuz:“Daxmeh, miz vunz ra mwngz.”

Gou dingz fwngz roengzdaeuj baez yawj, laxlawz dwg Dahbingz dwk gvaqdaeuj. Gou miz loeklak ciep denva naeuz:“Vei, Dahbingz, baenz- lawz yiengh……”

Lij caengz caj gou gangj sat, Dahbingz couh sikhaek angqvauvau hemq naeuz:“Luz lauxsae—— gou gauj ndaej hwnj lobw! Gou haxbaenh youq gwnz goenggauq raen coh gou lo! Mwngz seizlawz ndaejhoengq? Gou itdingh cingj mwngz gwn haeux cij baenz! Docih mwngz baenz nyaengq, vanzlij baenz caenhsim son gou!”Vah de lumj bauqbej nei coeg haeuj rwz gou daeuj.

“Yo, caen lwi? Mwngz caen ak! Mwngz baizmingz dwg baenzlawz?”Gou hix angq ndaej “bang” sing he cuengq duix diuq hwnjdaeuj, lumj boux gauj ndaej haenx dauq dwg gou bonjfaenh nei!

“Aeu cibcaet boux, gou baiz mingz cibhaj.” De youh riugekgek.

“Hoeng, gou guenj de baiz youq gyawz, couhcinj dwg baiz daengz doeklaeng, gou hix mbouj youqgaenj, cij aeu gauj ndaej hwnj couh baenz!”Yawj dah fangz neix geijlai dwggyaez ha!

Dou cungj doiq soujgih caez riu- haha! Danghnaeuz caez youq dangq- naj, dou itdingh doxgot ndaetndaet bae lo!

Saeh neix caen siengj mbouj daengz, sam ngoenz gaxgonq, dwg ngoenz mensi de. Banhaemh, mwh gou cam de gij cingzgvang mensi baenz- lawz yiengh, de gig siengsim, naeuz gou:“Luz lauxsae, gij cingzcik mensi ngoenzneix gauj sat couh goengbouh lo, gou baiz mingz daengz cibgouj bae. Gou guj swhgeij nanz ceng ndaej haeujbae lo! Ngoenzneix mensi dwg gij fwensei ciuhgeq dou cungj mbouj haeujsim haenx. Gou hix yungh gij fuengfap mwngz son haenx lo, hoeng……”Dingq gij cihsaw siengsim de, gou hix sim’in dangqmaz. Gou cij nai de gaej doeknaiq, laebdaeb roengzrengz bae gauj dieg wnq.

Dahbingz dwg mehmbwk haux- seng ndeu, daj diegrog haq daengz yienh neix. Daeglwg de dwg boux hagseng ban nden gou, doeg it nienzgaep. De dayoz bwnjgoh bizyez le youq Gvangjcouh gunghcoz, guh gij hong son yijvwnz. Daeglwg okseng le, vihliux lwgnyez, vihliux ranz iq bonjfaenh, de couh gaen gvan de dauq daengz yienhsingz iq neix caezyouq lo.

De bingzseiz haeuj gyauyuz gih- gou bae dang lauxsae yijvwnz. Baez gaenh gauhgauj seiz, de couh bae daengz gak si gak dieg bae hawj hagseng gauhcungh son yijvwnz. Moix baez gauhgauj gvaq, de youh hoengq roengzdaeuj. Hoeng, cungj saedceij seiqlengq youzlangh neix, de rox baeg lai lo. Raen daeglwg ciemhciemh majhung, de engq roxnyinh yousim lo.

Yienghneix, de couh siengj bae guh siujyoz lauxsae, muengh miz faenh hong onjdingh ndeu, youh ndaej buenx lwgnyez lai di, hawj de maj ndaej engq vaiqvued.

Gaej yawj de dwg dah nyieg, lumj raq rumz ci couh laemx, hoeng de siengj daengz couh guh. De yungh geij ndwen seizgan nyinhcaen bae hagsib. De miz caizhag, youh gaenxguh, mbouj geij nanz caen gauj ndaej mbaw cingq swhgwz siujyoz lauxsae lo.

Mwh de fwngz bungj mbaw cingq neix seiz, de gikdoengh dangqmaz, geij hwnz ninz mbouj ndaek. De siengj: Danghnaeuz swhgeij caen gauj ndaej hwnj hagdangz ndawsi rox- naeuz ndawyienh, dang boux lauxsae he, couh ndaej daiq lwgnyez gaen bae doegsaw, buenx de majhung lo!

Yienghneix, de sikhaek hwnj vangj cazyawj gij saenqsik ciu siujyoz lauxsae Gvangjsih gak si gak dieg. De daegbied maqmuengh bineix ndawyienh hix ciu vunz. Danghnaeuz caen gauj ndaej aen siujyoz bonjdieg daeglwg doegsaw neix engq ngamj lo. Aenvih neix dwg aen hagdangz moq: Gij laeuz sang laeuz moq sezgi hableix, gyaeundei dangqmaz.

De guh saeh siengj ndaej gyae, raen bonjdieg mbouj ciu vunz, de couh genj sam aen si ceiq gaenh bauqmingz lo.

Ciep roengzdaeuj, de couh doq bae gauhcungh hwnj dangz son yijvwnz doq yawj saw. Daengzseiz couh nyinhcaen bae camgya bitsi sam aen si haenx. Dah neix caen maenh- ak, sam dieg bitsi, de cungj aen dem aen gauj ndaej gvaq lo. Ndawde miz aen ndeu vanzlij gauj ndaej mingz daihngeih dem.

Gaujsi lij miz aen gvan ceiq doeklaeng ndeu couhdwg mensi. Bitsi caeuq mensi cungj aeu ciuq bijli suenq haeuj cungjfaen bae. Daj boux faen sang aeu roengzdaeuj.

Bi’gvaq de hix camgya gvaq cungj gaujsi neix, hoeng aenvih swhgeij gingniemh siuj, youh mbouj daihdamj geijlai, ndigah gauj mbouj ndaej. Ndigah, de gietdingh baezneix aeu ra lauxsae cijdauj cijndaej.

Bineix de baez daih’it mensi dwg bae Fangzcwngzgangj Si. Hainduj, de gig siengj bae camgya gij beizyinbanh. Hoeng, youh roxnyinh sou cienz bengz lai, vunz youh lai, hix mbouj hag ndaej maz. Ndigah, de gietdingh ra boux lauxsae ndei he son swhgeij. Yienghneix boux doiq boux cijdauj engq ndei.

Hoeng, Dahbingz daj dieggyae haq daeuj, mbouj rox gyoengq lauxsae bonjdieg, ranz gvan de youh mbouj miz saek boux caencik baengzyoux dang lauxsae. Mwh de cingq simgip mbouj rox baenzlawz guh seiz, dingjlingz raen daeglwg cuengqhag dauqma, de couh fwt siengj daengz cingj lauxsae daeglwg son swhgeij lo. De rox yienghneix gig mbouj roxsoq, hoeng caen mbouj miz banhfap lo.

Doeklaeng, lauxsae lwg de mbouj ndaejhoengq, couh dawz veihsin gou doi hawj Dahbingz lo.

Mwh gou doenggvaq veihsin Dahbingz, gou cingq camgya aen hoih yinzda ndawyienh.

Duenh seizgan haenx, gou youh camgya Gyauyuzdingh Minzcuz Mingzswh Banh gwnzvangj hagsib. Baez hagsib neix gonqlaeng miz cib ngoenz, go lai, cozyez lai. Hagsib liux le, gou youh aeu guh gij hong bouxbien sanjvwnz ndawyienh. Youh aeu sij song bien faenzcieng cijndaej. Bet nyied youh guh caizliu gungh- cozsiz……Seizgan cungj mbouj gaeuq yungh gvaq.

Lauxsaed gangj, gou caen nanz faen ok seizgan bang de, lau nguh de, ndigah couh mbouj siengj dapwngq cijdauj de, heuh de lingh ra lauxsae.

Mwh de rox gou cuengqgyaj hix baenz nyaengq, cungj doeksaet liux. Byawz rox, hix aenvih yienghneix, de engq muengh gou ndaej cijdauj de:“Luz lauxsae, gou dwg vunz diegrog, youq gizneix ra mbouj ndaej saek boux lauxsae cijdauj. Mwngz naengzlig giengz, dwg lauxsae ndei, gou vanzlij caensim muengh mwngz yot di seizgan bang gou baez he, geij ngoenz couh ndaej, ndei lwi?”

Raen de dawz vah gangj baenz caen, gou youh sim unq lo. Yienghneix gou cijndei dapwngq hagsib sat le, cijdauj de geij ngoenz, caiq guh saeh wnq lo.

Geij ngoenz cijdauj de sawq- gangj, de daegbied roengzrengz. Moix haemh cungj gyaban sij song bien gyauan daengz gyanghwnz, ngoenz- laeng gou couh bang de coihgaij, caiq son de lienh sawqgangj.

De gig coengmingz lingzleih, baez diemj daengz couh rox, sikhaek dawz gij guh mbouj ndei haenx niujcingq gvaqdaeuj. Sawqgangj ngoenz daihngeih gaenq cinbu haujlai lo. Gaijbienq gij yienghsiengq mbeiiq gaxgonq, bienq ndaej gagsaenq、daihfueng、habngamj, dawz boux lauxsae yienghndei lienh okdaeuj lo. Geij ngoenz roengzdaeuj, yawj de baenzneix gaenxguh, gou sim’angq raixcaix. Gou roxnyinh de baezneix mensi haengjdingh gvaqgvan.

Ngoenz banhaemh de mensi, gou baez nyaengq liux, couh sikhaek fat saenqsik cam de baenzlawz yiengh. Yienznaeuz gou daj ndawsim hix roxnyinh de mbouj naeuz gou gonq, aiq dwg gauj mbouj ndei lai. Hoeng, gou niemh lai, nyaenx mbouj ndaej aeu cam de baez he cij sim’onj.

De naeuz:“Luz lauxsae, mensi mbouj ndei, aeu cibcaet boux, gou baiz daengz cibgouj mingz bae……” Yienznaeuz dou rox, doeklaeng lij aeu dawz bitsi caeuq mensi ciuq bijli suenq faen, cij ndaej ok cungjfaen. Hoeng, seizneix hix mbouj onjdangq lai lo, dou ndawsim cungj gig nanz- gvaq.

Byawz rox, gou ngamq nai de geij coenz, de dauqfanj nai gou naeuz:“Mwngz gaej you, Luz lauxsae, danghnaeuz caen gauj mbouj hwnj, gou couh laebdaeb bae gizwnq gauj. Saedcaih mbouj ndaej, gou couh laebdaeb guh faenh hong gaxgonq! Guh saeh neix, yienznaeuz mbouj dwg lauxsae cingqsik, hoeng hix ndaej di cienz!”De geij coenz vah sikhaek hawj gou sim’angq hwnjdaeuj lo. Gou daj neix yawj daengz gij simhai simgvangq de!

Siengj mbouj daengz, ngoenz- lwenz fat gauqseih seiz, de youh daiq siusik ndei daeuj hawj gou! Dou doiq soujgih cungj caez angqhemq!

Gij angqhemq neix, dwg hoh de saedyienh maqmuengh, hix dwg hoh boux roengzrengz doek hanh buekguh cungj ndaej gvaq gij ndwenngoenz bonjfaenh siengj!