“Daxdaiq naeuz de deng Aulungzgveiz dwk ywdoeg lo.”

“O?” Yaucangj caeuq bohgoux sawqmwh ndwn hwnjdaeuj lo, bohgoux baez cuengq lwggeiz ndawfwngz, cienq ndang couh byaij, de caeuq yaucangj naeuz:

“Gou aeu ganj gvaqbae yawj- yawj.”

Gou riengz bohgoux buet ok bakdoulaux hagdangz, songdou gwnz- roen cungj mbouj gangj saek coenz, bohgoux byaij ndaej gig vaiq, gou buet riengz youq laeng, ndawsim niemh Ahveij, couh lumz bonjfaenh baedauq buet le leix lai roen, gaenq miz di naetnaiq lo.

Baez amq haeuj bakdoulaux ranz Ahveij, couh ndaejnyi saek raq Simjmehveij daejfwtfwt, aen sim gou lumj doq deng riuj hwnjdaeuj nei, Ahveij oksaeh lo?!

“Seizneix mbouj dwg mwh daej——” Gij vah daiq deng gij sing bohgoux yamqdin dajduenh lo, gou bongh haeuj ndawrug gonq, cigsoh buet coh aen congz Ahveij, goq mbouj ndaej bae dingq daxdaiq caeuq bohgoux gangj maz lo.

Ahveij lumj duznyauh deng cawj sug nei, ndang de goz dwk, ning hix mbouj ning gutgungq youq gwnz- congz.

Bohgoux riengz haeujdaeuj, daxdaiq sing daemq daengq naeuz:“Gaej gauj yiengj lai, de ngamq ninz ndaek.”

“Dungx mbouj in la?” Bohgoux cam Simjmehveij.

“Haxbaenh swenj sing ndeu, seizneix aiq ndei di lo.”

Simjmehveij ngamq gangj sat, Ahveij youh rouxringx hwnjdaeuj lo, diemheiq dwddwd caemhcaiq mbouj miz saekdi rengz heuh’etet.

“De couhdwg baenzneix daengx yaep youh in yaep.” Daiq gangj.

Bohgoux gaemhdawz fwngz Ah- veij, nyaenx gyaeuj de, fanfan buengzda de. Sing daemq gangj:“Dwg deng doeg lo.”

“Dwg gij doeg ngwzdoeg rox- naeuz gij doeg ywdoj?” Daiq cam.

(caengz sat)