Seizgan: Ngoenz sujgyaj banngaiz

ndeu

Dieg: Bakmbanj aen Mbanj-

cuengh

Bouxvunz: Daegmingz、Dahfangh、Dahlanz、Daeggvangh

Daegmingz (Gaem aen gien- gouqmingh doq gangj doq okdaiz): Haxbaenh, gou caeuq gij nyezdoih gou guh’angq mizyinx raixcaix. Hoeng, aenmbwn hwngqfwngfwng, hanh lae hanh roenx, daengx ndang niunetnet, youh haeu youh soemj, hojsouh lai lo.

Daengngoenz hwnjdaeuj daengz gyangmbwn,

Ndit ndat lumj feiz dak dai vunz,

Doengzcaez guh’angq daengx ndang hanh,

Mbouj daemx youzraemx doiq ndangraeuj.

Dahfangh (Naeuz): Yozyau hanz gangj gij saeh ancienz, Daegmingz vihmaz hengzvang ni? Ei! Nanz lo, nanz lo, gou bae laengz de cij ndaej. Daegmingz, caj gou gonq.

(Daegmingz dingqnyi, couh cacaemj ra giz dieg ndeu caeu aen giengouqmingh hwnjdaeuj.)

Dahfangh (Doq gangj doq buet daengz baihnaj Daegmingz, naeuz): Daegmingz, gaej caeu lo, gou cam mwngz, mwngz gaem aen gien- gouqmingh bae guh maz?

Daegmingz (Riumbwtmbwt naeuz): Gou……Gou mbouj……mbouj guh maz?

Dahfangh (Cingqging naeuz): Gaej yaeuh lo. Yozyau gangj gij saeh ancienz, mwngz lumz la?

“Loeg mbouj cinj” gvidingh,

Hoh diuzmingh,

Aeu caen guh dahraix;

Leihhaih aeu faencing,

Raemx fouzcingz,

Siengj mingzbeg cij ndaej.

Daegmingz (Dasang naeuz): Daiq aen giengouqmingh roengz raemx ancienz dangqmaz. Caiq gangj, youzraemx mbouj dwg saehvaih, mwngz gaej yienghneix yousim! Aenmbwn hwngqfwngfwng, ndit ndat dak dai vunz lo, gou bae youzraemx liengzledled.

Dahfangh (Rag fwngz Daeg- mingz, yenzsuz naeuz): Mbouj ndaej bae bw! Yienznaeuz youzraemx mbouj dwg saehvaih, hoeng, miz bouxhung rox raemx caeuq bae cij ndaej ha! Mwngz gag bae, mbouj dwg ra dai ha?

Daj iq guh saehcingz,

Aeu siengj cing,

Ancienz ceiq aeu geiq;

Bak gangj dauq yungzheih,

Daengz ok saeh,

Bouxlaux heiq hix dai.

Daegmingz (Dacaengz naeuq naeuz): Hw! Gangj gij vah gitleih mbouj ndaej ha? Nyapnyuk lai lo! (Youh hozhwnj naeuz): Youzraemx ndaej lienhndang, vihmaz mbouj angq hawj gou guh ni?

Youzraemx ndang bienq cangq,

Vih aen ndang,

Raeuz wngdang caeuqfaenh;

Roxraemx bouxboux haenh,

Mbouj angjmaenh,

Hix aeu gaenx lienhndang.

(Ciep ciengq):

Diuqraemx miz boux Cenz Hungzcanz,

Youq ndaw Auyin cingzcik ak,

Cibseiq bi couh ndaej gvanginh,

De dwg yienghndei gyoengq nyez raeuz!

(Youh ciengq):

Gonq lau manaez laeng lau guk,

Baenzneix guh saeh dwg vunz huk,

Iq miz cauhmoq gij cingsaenz,

Daengz hung guh saeh mbouj ndupdauq.

Dahlanz: Mwngz yawj, Daeg- mingz gaem aen giengouqmingh siengj bae dajcaemx bw, raeuz bae laengz de cij ndaej.

Daeggvangh: Deng, raeuz bae caeuq Dahfangh doengzcaez laengz.

Dahlanz (Najriu naeuz): Lienh- ndang dwg saehndei, danghnaeuz youq ndawsingz bae gvanjyouzraemx daj- caemx, ndawde miz bouxroxraemx youq henz dawz, baenzneix mbouj miz byawz laengz mwngz. Hoeng, seizneix mwngz gag boux ndeu bae ndawdah youzraemx, baenzlawz dawz mwngz ni? Siengj lienhndang mwngz bae buet bae diuq hix baenz ha.

Gag roengz dah caemxndang,

Couhdwg hangz raemxdah,

Cungj mbouj dwg gangj gyaj,

Mwngz gaej dasang lai.

Daeggvangh (Yamq coh baihnaj naeuz): Mwngz buet bae youzraemx, gij lwgnyez hix gaen mwngz bae, yungzheih oksaeh, mwngz gaej bae bw!

(Ciengq):

Hengzmanz mbouj gangj leix,

Bohmeh heiq lailai,

Yienghneix mbouj wnggai,

Mboetraemx dai lawz banh?

(Youh ciengq):

Faex iq goz mbouj euj,

Hung le niuj gag lau,

Muenz loek haenh dungxnyauz,

Byoemgyaeuj hau lij ienq.

Dahlanz (Huzngaeh naeuz): Raeuz dwg hagseng iq, aeu geiq maenh gij vah lauxsae daengq, guh daengz giz bae. Caemhcaiq raeuz cungj dwg sausenhduiyenz, ndigah, engq wngdang guh yienghndei doengz ban.

Daeggvangh、Dahfangh (Caez naeuz): Dwg ha, raeuz dwg hagseng iq, aeu dingq gij vah lauxsae, roxsoq roxleix, mbouj beg’iemq mbouj cauh- hux.

Daegmingz (Najmong naeuz): Sou gangj ndaej deng, mboujnex, gou cauhhux lo, docih daihgya!

(Caez eu):

Diuzmingh cij baez ndeu,

Gaej bae ciu huxhaih,

Miz loek couh aeu gaij,

Gunggan ngaiq mizyinx.

Vih guek vih yinzminz,

Hanqbungz mbin fanh leix,

Daj iq hag bonjsaeh,

Roengzrengz geiq ndawsim.

Daeggvangh (Angq naeuz): Raeuz baema guh’angq, ndei mbouj ndei ha?

(Gyoengqvunz doq gangj doq dauqma): Ndei! Baema guh’angq lu.