8 nyied 12 hauh daengz 13 hauh, Nanzningz Si Vwnzva Gvangjden Caeuq Lijyouz Giz youq Nanzningz Vansiengcwngz banh aen hozdung Nanzningz Si vwnzva lijyouz haeuj diuzgai gai huq·lijyouz hawsingz seizhwngq 2022 nienz “lauxyoux doxduenq youz Nanzningz”. Hozdung hopheux “lauxyoux Nanzningz” vwnz- lij binjbaiz, doiok doigvangq gaisau vwnzlij Nanzningz、yienjheiq、baij gai huq lai yiengh daengj hozdung, cienzndenq gij yinxdaeuz hawsingz Nanzningz.

Hozdung geizgan, Nanzningz Si Vwnzlij Giz cujciz Vansiengcwngz、Byacinghsiusanh、Nanzningz Yenz- bozyenz daengj gingjgih giyez, ciuq sujgyaj lijyouz aeuyungh, cinjdeng doigvangq gaisau hozdung nauhyied、huq cawjdaez、gai cienh, caemhcaiq guh dangciengz dox siugai, soengq fei dou mbouj aeu cienz、bohlwg yenzgiu hagsib lijyouz、huq vwnzcang miz daegsaek daengj huq hawj bouxyawj.

Daj 3 nyied 13 hauh cingqsik hainduj guh hozdung doxdaeuj, daengz ndawcib 8 nyied, Nanzningz Si gaenq gonqlaeng banh 9 ciengz hozdung doigvangq siugai vwnzva lijyouz haeuj diuzgai gai huq、yienj 85 ciengz heiq haeuj diuzgai gai huq, ca mbouj geijlai 250 aen vwnzlij giyez camgya hozdung, gaenxmaenx coengh vwnzlij siuhfei.

Ciuq cam rox, Nanzningz Si Vwnzlij Giz youq 8 nyied daengz 12 nyied geizgan, yiemzgek doeksaed fuengz binghraq doengzseiz, laebdaeb giethab “lijyouz+yienjheiq+gai huq”, dajveh youq Veicanj·Hangzyangz- cwngz、Nanzningz Yinsiengcwngz、Sienghswh Siujcin daengj dieg miz daegsaek, guh 10 ciengz doxhwnj hozdung, hawj vunz bae lijyouz, doidoengh vwnzlij swhyenz caeuq gai huq doxyungz hwngfat.

(Cau Ginhlingz)