Vunz majhung le, lumj gofaex sanq nga maj mbaw, mboujlwnh bae daengz gyawz, byaij geijlai gyae, cungj mbouj lumz mbanjranz diuz raggoek neix. Youq rog nanz le, gou seizseiz niemh mbanjranz, niemh gij vunzcaen mbanjranz, niemh gij byabya raemx- raemx mbanjranz. Baez dauqranz, gou cungj gyaez boux ndeu haeuj ndaw- ndoi bae youzbyaij.

Ndawndoi faex ndaetfwdfwd、mwncupcup, gogut gohaz baenz benq baenz benq nyaengqsaengsaeng, vunz nanz yamq din haeujbae. Gij loh ndoi ngutngeuj haenx, youq ndaw ndwen- ngoenz gaxgonq doxdaeb miz cien fanh aen rizdin gou.

Gou gyaep vaiz daeuj gizneix langh, gou caeuq gyoengq nyezdoih daeuj neix mbaet makndoi, gou caeuq daxmeh rap fwnz byaij gvaq gizneix, gij saehgonq youq ndaw uk gou gvaenx- gvax, ciemhciemh fouz youq baihnaj.

Seizhaenx, ranzranz cungj miz haujlai lwgnyez, gyoengq bouxlaux hix mbouj rox bae gyawz dajgoeng. Gyoengqvunz ngoenznaengz cawj gwn、cawj mokmou、ndat raemx dajcaemx cungj aeu coemh fwnzhaz, ranzranz hoenzfeiz biufefe. Ranzranz aeu fwnzhaz dajcawj, ndawndoi fwnzhaz cungj mbouj gaeuq aeu, gizgiz ndoqndatndat, gij nye gocoengz maj di raemj di, gogo cungj raemj daengz byainyod bae, gogut gohaz caengz maj sang geijlai, gyoengqvunz couh gaem liemz bae gvej, dak saek song ngoenz bienq roz le, couh gwed hanz bae rap. Ngoenzngoenz miz vunz gwed hanz haeuj ndoi raemj fwnz gvej haz, gofaex gohaz bae lawz maj ndaej baenz vaiq, gyoengqvunz mizseiz mbouj ndaej mbouj bae mbiengj lueg haenx gij mbanj wnq aeu fwnz. Gij mbanj ndawlueg haenx mbouj miz geijlai ranz, caemh mbouj miz geijlai vunz, haujlai nyefaex roz doek roengz lajfaex daeuj nanupnup cungj mbouj miz vunz gip, gij vunzmbanj dou ngah fwnzhaz neix couh angqvauvau gwed hanz bae gizhaenx rap. Seizhaenx roxnyinh gyoengqvunz ndaejhoengq saekseiz cungj sij mbouj ndaej yietnaiq, laux nyaeq cungj gwed hanz hwnjbya haeuj ndoi bae aeu fwnz. Gyoengq bouxlaux naeuz, sou lwgnyez hix bae aeu fwnzhaz, rap ndaej di gaeuq cawj saek rek ngaiz hix baenz.

Gyoengqvunz ndaem doenghgo cij ndaej gwn, fwnzhaz caeuq gij gwn doxdoengz, noix yiengh lawz cungj mbouj ndaej. Liggaeuq ndwenloeg caeuq ndwencieng, dwg gyoengqvunz youq bi ndeu ndawde song duenh seizgan aeu bwh ndei fwnzhaz. Lig- gaeuq ndwenloeg sou haeuxgok caeuq haeuxyangz ndaej le, lij aeu ndaem miuzngeih, ca mbouj lai guh song ndwen hong cij guh ndaej sat, aeu bwh miz haujlai fwnzhaz roz cawj gwn; ndwencieng gyoengqvunz baedauq doxcunz, hix aeu bwh miz fwnzhaz lai cij ndaej, gyoengqvunz loengh gwn gangjgoj cij ansim. Ranzranz aen ranzcauq、lajroq caeuq henz ledsuen cungj baij miz haujlai fwnzhaz. Mbouj miz baenzlai dieg baij fwnzhaz, mbangj ranz lij daegdaengq dap aen bungz he daeuj cuengq fwnzhaz.

Seizhaenx daxmeh gig nienzoiq, ndang reux noh hau, yienznaeuz maj baenz yienghneix, de lumjbaenz daengx ndang miz rengz yungh mbouj caenh nei, hix dingj ndaej sinhoj.

Daxmeh ngoenznaengz cawj hawj dou gwn imq、gueng doihduz ndaej le, couh daenj aen mauhnyangj he, gyanghwet raek fag cax he, gwed diuz hanz byai hanz heux miz geij diuz duknaeng, haeuj ndoi bae raemj fwnz roxnaeuz gvej haz lo. Baenz buenq ngoenz, daxmeh gig mbouj ngaih raemj ndaej song gwed fwnzheu, youh rap gvaq gij loh ndoi ngutngut ngeujngeuj, yietnaiq haujlai baez cij daengz ranz. Daengz ranz daxmeh gaenq baeg ndaej naj hoengz- gyoenggyoeng, hanh dumz buhvaq, gou muengz daek vanj souh haeux- yangz he, ndenq daengz gyangfwngz daxmeh bae.

Cuengqgyaj roxnaeuz ngoenz- singgeiz, daxmeh mizseiz hix heuh gou caeuq de caez haeuj ndoi aeu fwnz. Daxmeh naeuz, mwngz rap ndaej geijlai suenq geijlai, ndaw ndoi fwz lai, song vunz doxbuenx gangjvah, mbouj roxnyinh mbwq, mbouj rox- nyinh dwglau.

Ndawlueg yienznaeuz ndoqndat- ndat, hix miz saek giz faex mwncup- cup miz fwnzhaz lai, dingqnaeuz gizhaenx cungj dwg moek gij vunz dairwix haenx, mbouj miz geijlai boux gamj haeujbae raemj fwnz. Miz baez ndeu, daxmeh youh heuh gou caeuq de caez haeuj ndawlueg bae aeu fwnz, daxmeh naeuz gvaiz lo, couh bae mbiengj ndoi haenx aeu fwnz.

Baez yamq din haeuj mbiengj ndoi haenx, dou mehlwg couh mbouj gangj vah lo, daxmeh heuh gou naengh youq gizhaenx, de gag boux ndeu raemj fwnz. Gou dinghdingh yawj daxmeh raemj fwnz, lwgda mbouj gamj luenh muengh gizwnq. Yaepyet, daxmeh couh raemj ndaej haujlai fwnz, de cug ndei fwnz, aeu hanz mbongq ndei, dou couh rap fwnz dauqma. Byaij gvaq henz aen moh ndeu seiz, gou miz di simyup, cik din’gvaz deng nyumq gohaz he laeuz dwk, boemzhoemj laemx youq gwnz- namh, song gwed fwnz gwnzmbaq hix gyod ok byai hanz, doek daengz gwnz aen moh haenx bae.

Daxmeh cuengq diuz rap de roengzdaeuj, dawz song gwed fwnz gou cug maenh, caiq aeu hanz mbongq ndei, heuh gou byaij youq baihnaj, de youq baihlaeng rap gij fwnz gou daengz lajndoi diuz loh gvangq he, baenqndang youh bae rap gij fwnz duh de. Daxmeh baebae dauqdauq, baenz- lawz cungj mbouj raen de lau saekdi.

Gvaqlaeng, mbouj lwnh baenz- lawz, daxmeh caiq hix mbouj daiq gou bae benq ndoi haenx aeu fwnz lo. Hoeng saedceij aeu gvaq, mbouj bae gizneix couh bae gizhaenx aeu fwnz. Baez he, daxmeh daiq gou bae mbiengj lueg mbanj wnq haenx aeu fwnz.

Ngoenzhaenx ndit ndatfwgfwg, daengz benq ndoi aen mbanj haenx, gou gaenq diemheiq baegfofo, hoz- hawq dangqmaz, aen bingz cang souh haeuxyangz haenx gaenq deng gou ndoet bae dingzlai lo.

Mbanj haenx miz vunz ngamq raemj faexcoengz gai, gij byaifaex、ngafaex vangvang raehraeh baij rim ndoi.

Daxmeh riu caeuq gyoengqvunz doxdongx. Daxbuz ndeu riunyumnyum byaij daeuj coh dou, caeuq daxmeh gangjgoj, daxbuz naeuz fwnzheu naek lai, heuh daxmeh aeu di fwnzroz, yienghneix rap mbaeu di.

Dou mehlwg dingq daxbuz baenzneix gangj, angq raixcaix, sik- haek bae ra fwnzroz. Gou raen daxmeh hanh roenx rim ndang, naj hoengzfefe, ganjvaiq dawz aen bingz souh ndenq hawj daxmeh. Daxbuz raen le, naeuz ranz de liz gizneix mbouj gyae, daj neix muengh bae couh raen, heuh dou bae ranz de gwn souh.

Seizneix hozhawq youh dungx iek, daxmeh caeuq gou hix mbouj caiq euq, couh gaen daxbuz bae lo. Daxbuz cawj di byaekheu caeuq ceuj di rangzsoemj hawj dou soengq souh haeuxyangz. Gwn imq le, roxnyinh daengx ndang miz rengz lo. Daxbuz dawz aen bingz souh haenx aeu raemx riengx seuq le, caiq cang bingz souh haeuxyangz ndeu hawj dou, naeuz dou mehlwg youq gwnzloh yietnaiq seiz, hozhawq ndaej ndoet di.

Daxbuz soengq dou okdou seiz riu coh gou naeuz:“Dahnuengx ha, aen dieg dou gizneix maz cungj mbouj miz, fwnzhaz cix ceiq lai, mbouj hoj fwnzhaz hoj aeu bawx, gou miz daeglan he caeuq mwngz nienzgeij mbouj ca geijlai, maqmuengh daengz- cog majhung le, haq daeuj guh lan- bawx gou bw.”

Seizhaenx gou gaenq roxyiuj lo, gij vah loenghriu daxbuz hawj gou najnyaenq ndaej mbouj rox gangj maz ndei, daxbuz caeuq daxmeh muengh coh gou, cungj riu lo.

Ndwenngoenz ciemh bae, gou majhung le hix biek mbanjranz, biek bohmeh bae rog ra gwn lo. Moix baez dauq mbanjranz, cungj roxnyinh mbanjranz baez beij baez bienq lo, baezneix dauq raen ranznamh naeuh bienq ranzlaeuz moq, baezlaeng dauq raen lohnamh bienq lohsuijniz bingz- rwgrwg……

Ceiq hawj vunz roxnyinh ranz- ranz aen ranzdajcawj hix cungj bienq lo, baez muengh bae seuq- saksak, mbouj caiq baij rim fwnzhaz, gyoengqvunz yungh dienh roxnaeuz yungh heiqmeiz cawj gwn, mbouj caiq raen hoenzfoiz, byabya gofaex heu lo, ndoindoi ndoeng mwncupcup, gij ndwenngoenz gaxgonq soemj van haemz manh cungj riengz rumz mbin bae gyae lo.