Gou fwt saemxsax, lwgdinmeh dik deng duenh ragfaex loh youq gwnznamh, ndang baez coemj coh naj, cij roxnyinh fajnaj cungj laep, aen aek baez oet, gou deng laemx lo, sikhaek dangqnaj ndaundeiq luenh mig, diemheiq mbouj ndaej, hoeng gou vanzlij riengjret bin hwnjdaeuj couh buet……

Ndawmbanj miz aen hagdangz he, heuhguh “Hozdaeuz Yozdangz”, gizdieg hagdangz yienzlaiz daengj miz aen miuhvwnzcangh, yienznaeuz seizneix gaenq cuengq sujgyaj, ndaw hagdangz mbouj miz saek boux vunz lawz, mboujgvaq yaucangj gig yiedsim fucwz, lij ciuqgaeuq ngoenznaengz daengz hagdangz. Bohgoux gou caeuq de gig ndei, ndigah bohgoux gou ciengzseiz daeuj hagdangz caeuq de dwkgeiz、cimz caz、gangjgoj. Gou gaemz heiq ndeu roemx haeuj bakdoulaux hagdangz, cigsoh bongh coh bangunghsiz yaucangj youq baihlaeng haenx, daiq gangj ndaej deng dahraix, bohgoux gou cingq caeuq yaucangj dwk geizciengh ne!

“Bohgoux! Vaiq bae, vaiq bae——” Gou baegfofo heuh.

Songde cungj deng gou hwk lo, fwngzgvaz bohgoux lij dawz aen lwggeiz ndeu, baenq naj gvaqdaeuj cam gou:

“Maz saeh baenzneix foengx? Hix mbouj rox hawj yaucangj hengz- laex?”

Gou rubrab baez gungj hwet coh yaucangjlaux, gip ndaej mbouj ngeix couh naeuz:“Ahveij deng ngwzdoeg haeb lo——”

“Ha!” Bohgoux caeuq yaucangj doeksaet ndaej doengzseiz hemq le sing ndeu.

“Gwn le gij ywdoj Aulungzgveiz, seizneix dungx in hwnjdaeuj lo.”

“Dauqdaej fatseng maz saeh?” Yaucangj cam.

(caengz sat)