Daegfuz nienzgeij gaenq mbouj oiq lo, youq ndawmbanj dou lumj de yienghneix gaenq baenzgya miz lwg- nyez lo, vihneix daxmeh de miz di simgaenj, lau de aeu mbouj ndaej baz, couh dak gizgyawj geij yahmoiz bang Daegfuz bae cam le geij baez yah. Hoeng Daegfuz cungj dwg genj bae genj dauq, mbouj dwg yiemz naeuz dah neix biz lai, couhdwg yiemz naeuz dah haenx daemq di, yawj mbouj hwnjda.

Daxmeh de hozndat raixcaix, naeuz:“Duzfangz byaiz mwngz, mwngz naemj mwngz lij oiq lai ha, mbouj rox ciuq gingq yawjyawj swhgeij baez he, naj nyaeuq liux mbouj caengz, lij yiemz dah neix biz dah de daemq dem, gou lau mwngz ciuhneix yaek dang vunzgyonz lo.”

Youq ranz cungj deng bohmeh gyaep heuh aeuyah, Daegfuz roxnyinh fanzsim dangqmaz, hixnaengz buet bae Guengjdoeng dajgoeng lo.

Bi daihngeih ndwencieng, Daeg- fuz couh daiq dahsau ndangdaej liengjreux ndeu maranz lo, coh heuh- guh Cing’vah.

Ndawmbanj gyoengq bouxlaux raen le cungj naeuz:“Boux guhnaz aeu miz yienghsiengq bouxguhnaz cij baenz, sou yawj diuz hwet de raez lumj hwet ngwzdangh nei, daengzcog baenzlawz guhnaz cae reih ha?”

Meh Daegfuz naeuz:“Yo ho! Aeu yah mbouj rox bae ra dah ndang maengh di he daeuj? Mwngz yawj de ndang baenzneix reux, rumz baez baet cungj yaek deng laemx bae, daengzcog miz mbouj miz lwg cungj nanz gangj ne!” Gangj le, ngeng gyaeuj yawj gvaq henz bae.

Daegfuz naeuz:“Gou couh haengj aeu dah hwet raez lumj hwet ngwzdangh neix daeuj guh yah, sou yaek baenzlawz?”

Daj seizhaenx hwnj, gyoengq vunz ndawmbanj youq baihlaeng cungj heuh dahsau haenx guh “Hwet Ngwzdangh”.

“Hwet Ngwzdangh” ngamq haq daeuj mbouj geijlai nanz couh bungz daengz seiz sou haeuxnaz lo. Seizhah, ndit ndat ndaej gwnznamh lumj dawz feiz yaek byaeu vunz nei, de daenj mauhdangjndit caeuq haizgiujsang bae gvej haeux.

Bohmeh Daegfuz song gvanbaz youq baihlaeng mbwnjbak naj nyaeuq, sing daemq damzbyoedbyoed naeuz:“Caen dwg mbouj miz lwgda yawj lo, yienghneix gyawz lumj bouxguhnaz ha?”

Aen mauhdangjndit haenx yeb hwnj yeb roengz, diuz hwet raez Cing’vah lumj hwet ngwzdangh nei bi bae bi dauq, ngwtnget ngwtnget, fagliemz ndaw fwngz de youq laj goek gohaeux dwk fet dwk fet, ndonj bae ndonj ma, lumjnaeuz diuqfoux nei. Byawz cungj siengj mbouj daengz, “Hwet Ngwzdangh” gingqyienz gvej haeux gvej ndaej baenzneix riengjret, baij youq boux daih’it. Daegfuz youq baihlaeng diemcaw fofo, hanh dumz hanh lae baenzlawz hix gyaep mbouj hwnj Cing’vah.

Bohmeh Daegfuz youq baihlaeng yawj ndaej ngawh bae, gag ngaek- gyaeuj dedded.

Youq gwnz dieg fad haeux, “Hwet Ngwzdangh” engq dwg mbouj saw byawz saekdi. Daeh haeuxumj、aeu din yunghrengz caij dajguzgih、raz fiengz、baeuh haeux daengj, yienghyiengh guh ndaej haeuj fwngz haeuj din caez. Daehbaengz haeuxgok he rimmwtmwt, de gingqyienz ndaej mbat ndeu gwed hwnj mbaq bae, mbouj rox seizlawz, gouh haizgiujsang de gaenq vuenh baenz haizbaengz giuj bingz lo.

Meh Daegfuz bak aj, lwgda de haep lumj diuzmae nei, naeuz:“Bohfuz ha, gaxgonq dwg mbouj dwg raeuz lwgda fangz la?”

Gvaqlaeng geij bi le, “Hwet Ngwzdangh” seng lwg lo, mbwk miz sai miz, bohmeh Daegfuz song bouxlaux ngoenznaengz daiq song laeq lan youq ndawmbanj gvaq ranz neix ranz haenx bae youz, ndawsim angqfwngfwng. Cing’vah hix nyaengq ndaw nyaengq rog, hongranz hongnaz cungj guh liux, yiengh he cungj mbouj doeklaeng gvaq vunz. Gyoengq vunz ndawmbanj cungj daengj fwngzmeh hwnjdaeuj naeuz:“Ai, caen dwg siengj mbouj daengz ha, yawj vunz mbouj ndaej cij yawj yiengh ndwi bw!”

Mbouj rox daj seizlawz hwnj, aen hwet ngwzdangh Cing’vah gaenq mbouj raen lo, bihaenx aen ndang- daej de baenzlai reux, vunz baenzlai saundei, seizneix gaenq bienq maenghmwd lo, ndaek hwet de hung lumj ndaek doengjraemx nei.

Yawjyawj song laeq lwg dwg- gyaez swhgeij, ndawsim Daegfuz lumj gwn dangzrwi nei diemzsubsub, baenzngoenz najrongh riunyumnyum, hoeng caiq yawj ndaek hwet maengh- mwd Cing’vah, de lumjnaeuz riu mbouj ok lo.

Geij bi neix daeuj, Daegfuz youq baihrog guh gunghcwngz, menhmenh fatcaiz lo, Cing’vah lij dwg lumj yienzlaiz nei youq ranz guh hongreih hongnaz, dawz lwgnyez, ciuqgoq bohmeh Daegfuz.

Daegfuz caeuq Cing’vah gangjriu naeuz:“Vah ha, mwngz yawj ndaek hwet mwngz seizneix lumj ndaek doengjraemx nei, dwg mbouj dwg hawj gou daj ndawsingz daiq dah hwet ngwzdangh he maranz daeuj bang mwngz guhhong ni?”

“Ndei ha, yienghneix baezlaeng gou couh ndaej soeng ndang lo.” Cing’vah riunyumnyum naeuz.

Daxmeh Daegfuz youq henz dingqnyi le, nyignaj hwnjdaeuj hwk naeuz:“Lwgfangzraq mwngz baenzbag ha? Gaej gangj bamz gangj huk, mwngz ragraix gou ndaek ndang geq neix couh mbouj nyinh mwngz guh lwg!”

Gvaqlaeng, daxboh Daegfuz deng mauhfung ninz youq gwnzcongz mbouj ndaej hwnq, Daegfuz youq baihrog guhhong nyaengq lai gig noix ndaej maranz. Cing’vah guh hongranz hong- naz le, vanzlij nyaengq bang daxmeh Daegfuz ciuqgoq daxboh Daegfuz dem.

Miz ngoenz he, daxmeh Daegfuz caeuq de veihsin sibinz, Daegfuz gag dwk mbat fak haenq ndeu, naeuz:“Gou mbouj dwg vunz, dwg duznyaen.”

Ndaw sibinz baihde, Cing’vah cingq gaeuz aen ndang bizbwd de, dwgrengz daj gwnzcongz umj daxboh Daegfuz hwnqdaeuj, menhmenh cuengq roengz ndaw daengq miz loek bae.