8 nyied 4 hauh, Aen Minzcuz Yozdonz Bouxcoz Nyezrauh Gvangjsih youq Nanzningz cingqsik laebbaenz. Haemhhaenx youq Gvangjsih Yinh- yozdingh banh aen yizsiz laebbaenz, gwnz aen yizsiz, 60 boux bouxcoz nyezrauh gyaez minzcuz yozgi haenx ginggvaq senj baez dem baez, cingzcik ndei gvaq vunz, baenz boux cwngzyenz buek nduj Aen Minzcuz Yozdonz Bouxcoz Nyezrauh Gvangjsih.

Aen Minzcuz Yozdonz Bouxcoz Nyezrauh Gvangjsih youz Swcigih Dangjveij Senhconzbu、Swcigih Vwnzva Caeuq Lijyouz Dingh cijdauj caeuq haeujcoengh, Aen Minzcuz Yozdonz Gvangjsih baihlaj Gvangjsih Yenjyi Cizdonz gyoebcomz baenz, muzdiz dwg fatyiengz caeuq cienzswnj gij vwnzva yaem’wenq cienzdoengj maenhndei Cunghvaz Minzcuz, gikfat bouxcoz nyezrauh daihneix gagsaenq minzcuz vwnzva, daezswng gij yisuz suyangj bouxgyaez minzcuz yozgi bouxcoz nyezrauh, doicaenh hwngfat gij saehnieb yisuz yaem’wenq minz- cuz gih raeuz.

Aen Minzcuz Yozdonz Gvangjsih 1957 nienz laebbaenz, dwg aen cizyez yozdonz miz siujsoq minzcuz daegsaek, aen yozdonz neix cujyau dwg Bouxcuengh、yungzhab aen lai minzcuz. Yozdonz dingjmaenh minz- cuz daegsaek, gag gaij le lozlez、ngeihyienzndokmax、aenvenz、gimz- yienzdog daengj yozgi siujsoq minzcuz Gvangjsih daegbied gagmiz haenx, caemhcaiq cauh comz le buek cozbinj funggek mbouj doengz、youq rog gih ndaw gih miz di yingjyangj ndeu, lumjbaenz: Habyienj 《Aeu Man- cuengh Hawj Mauz Cujsiz》、caezrag ngeihyienzndokmax 《Mbanjcuengh Haicin》、 gagboq aenvenz 《Haemh Angq Mbanjdung》 daengj. Ndawde dingz cozbinj ndeu youz Cunghyangh Densidaiz daengj daegbied iucingj loegguh boq hawj daengx guek, caemhcaiq lai baez ndaej gak hangh ciengj hung daengx gih、daengx guek. Lij banh baenz le aen hoih yaem- wenq minzcuz cienciengz funggek mbouj doengz、hingzsik mbouj doengz, ndaej haenhndei lai.

Geij bi neix daeuj, Aen Minzcuz Yozdonz Gvangjsih haenqrengz guh hozdung goeng’ik, gaenxmaenx vat- cimh caeuq gungganq vunzcaiz yisuz bouxcoz nyezrauh maenhndei. Gyoeb- comz baenz Aen Minzcuz Yozdonz Bouxcoz Nyezrauh Gvangjsih, yaek laebdaeb ciuq aen vunqsik guenjleix ciennieb、gvenqsug caeuq cujciz lienhguh, haenqrengz cauh aen doih yisuz minzcuz yozgi bouxcoz nyezrauh ciennieb suijbingz sang、gveihgwz sang ndeu, vatcimh caeuq gungganq vunzcaiz yienj minzcuz yozgi suciz sang、 suijbingz sang, hawj de baenz mbaw mingzben hawsingz vwnzva ndeu daiqbiuj vwnzva yaem’wenq minzcuz bouxcoz nyezrauh Gvangjsih、langhbaij yienghndei bouxcoz nyez- rauh Gvangjsih.

(Cau Genh)