Bonjbauq siusik （gicej Cau Dwzfeih） 8 nyied 4 hauh, Aen Hoih Fatbouh Saehmoq Gvangjsih Boux- cuengh Swcigih Gaiq Daihcibhaj Yindungvei youq Nanzningz hai. Mizgven lingjdauj lwnh vunzlai rox, Gvangjsih Bouxcuengh Swcigih Gaiq Daihcibhaj Yindungvei youq bineix 11 nyied 11 hauh daengz 23 hauh youq Gveigangj Si banh. Gaiq gih yindungvei neix dwg Swcigih Yinzminz Cwngfuj cawjbanh, Swcigih Dijyuz Giz caeuq Gveigangj Si Yinzminz Cwngfuj doengzcaez ciep- banh.

Gaiq gih yindungvei neix faen aen hanghmoeg dijyuz doxdax caeuq hozdung vunzlai guh gak cungj doxdax, ndawde aen hanghmoeg dijyuz doxdax gungh miz 31 aen hangh hung, 817 aen hangh iq, caeuq gaiq gonq gih yindungvei 22 aen hangh hung 704 aen hangh iq doxbeij, gyalai le gvihmax、vad ruznaeng、benz dat daengj 9 aen hangh hung. Hozdung vunzlai guh gak cungj doxdax laeb baenz cuj goenghai caeuq cuj hangzyez doxdax, cuj goenghai laeb 15 aen hanghmoeg doxdax caeuq 5 aen hanghmoeg biujyienj, gungh 20 aen hangh hung 115 aen hangh iq; cuj hangzyez laeb 13 aen hangh hung 15 aen hangh iq. Ciuq gyoebsuenq, yindungyenz camgya gaiq gih yin- dungvei neix yaek mauhgvaq 10000 boux, lai gvaq gaiq gonq 20%.

Gaiq gih yindungvei neix gungh nangqdaengz 28 aen dijyuzgvanj, ndawde, Gveigangj Si bonjdieg 18 aen, mbouj youq Gveigangj Si 10 aen, cujyau faen youq Nanzningz、Liuj- couh、Bwzhaij daengj dieg. Gaiq gih yindungvei neix Gveigangj Si gaijgvangq hwnq ciengzdieg gungh 4 aen, ciengzdieg hwnqmoq 2 aen, buedcienz daih’iek 3 ik maenz, sojmiz ciengzdieg cungj banh doxdax ndaej.

Ciuq cam rox, Gveigangj Si gonqlaeng goengbouh le veiveih、veigoh、duzgikleih、cawjdaez goujhau caeuq benqsenhconz gaiq yindungvei neix. Gveigangj Si yaek dawz ndei mbat neix, lai gaijndei vanzging hawsingz lajmbanj、cauh aen yienghndei hawsingz、gaijndei aen goengnaengz hawsingz, lai guenj ndei hawsingz, hawj siminz lai miz suciz, hawj gyoengq siminz dijyuz lienh- ndang、guh’angq、youqndwi lijyouz daengj aeuyungh ndaej habhoz.