Gaxgonq miz Mbanjcuengh ndeu, ndawmbanj miz dahsau gyaeu- ndei ndeu. Dahsau neix mboujdan gyaeundei, dinfwngz hix lingzleih, rox siuq va, rox daemj baengz, guh fwen caemh ndeidingq. Gyoengq mbauq ndawmbanj caeuq mbanjnden, cungj ceng gonq lau laeng heuh mehmoiz hwnj dou bae cam de guh yah, hoeng, dahsau neix cungj mbouj yawjngamj saek boux, seizneix lij dwg ndang dog.

Ngoenz ndeu, dahsau bae henz- dah saeg buhvaq, doq saeg doq guh fwen, gij sing de ndeidingq raixcaix.

Ndawraemx miz duzngieg ndeu, duz de dwg duzsien guenj raemx. Duzngieg baez dingqnyi gij fwen dahsau eu couh dwkmaez, nyaenx mbouj ndaej siengj yawjyawj dah guh fwen, ndigah de bienqbaenz daeg- mbauq ndeu ok najraemx daeuj.

Dahsau fwt raen daegmbauq ok najraemx daeuj, doeksaet liux. Daegmbauq neix noh hau mbauqndei, dahsau yawj ndaej maezmwdmwd.

Daegmbauq riunyumnyum yawj coh dahsau, menhmenh byaij hwnj gwnzhawq daeuj, daengz henzndang dahsau le naeuz:“Sau, gij fwen mwngz caen ndeidingq!”

Dahsau naeuz:“Docih mwngz haenh gou. Gou dwg mbwq le luenh hemq song coenz ndwi.”

“Ranz mwngz youq gyawz?” Daegmbauq cam.

“Ranz gou gyawj dah ne. Ranz mwngz ni, youq gizlawz?” Dahsau cam.

“Ranz gou hix gyawj dah ne.” Daegmbauq naeuz.

“O! Yienzlaiz raeuz dwg vunz mbanjnden ha!” Sau naeuz.

“Fwen mwngz ndeidingq lai lo!” Mbauq naeuz.

“Danghnaeuz mwngz gyaez dingq, gou ngoenzngoenz daeuj neix eu hawj mwngz dingq.” Sau naeuz.

“Ndei lai lo! Sau, cam mwngz coenz vah he, mwngz miz cawj caengz?” Mbauq cam.

“Caengz, gou lij dwg ndang dog.” Sau naeuz.

Couh yienghneix, songde ngoenzngoenz doxiu daeuj henzdah guh fwen、 gangjgoj. Mbouj rox mbouj nyinh, songde doxgyaez lo.

Ngoenz ndeu, dahsau launyaenq naeuz daegmbauq:“Gou gyaez mwngz, siengj caeuq mwngz guh gvanbaz. Hoeng, bohmeh gou cij miz gou dahlwg dog, mwngz nyienh daeuj ranz gou guh lwggwiz lwi?”

Daegmbauq naeuz:“Gou ei.”

“Yienghneix, daj haemhcog hwnj, caj bohmeh gou ninz le, mwngz daeuj ranz gou, caeuq gou doxyouq.” Dahsau naeuz.

Daegmbauq dingq le simvuen raixcaix.

Daj seizhaenx hwnj, moix hwnz caj vunz ninz dingh le, duzngieg cungj bienqbaenz daegmbauq bae caeuq dahsau caemhyouq. Gaeq baez haen duzngieg couh dauq ndawdah bae.

Mbouj geij nanz, dahsau miz- ndang lo. De angqvauvau lwnh hawj daegmbauq nyi, liuh mbouj daengz, daegmbauq dingq le, naj heu liux.

Seizneix de cijndei gangj saed- vah, naeuz:“Gou doiq mbouj gvaq mwngz, gou mbouj dwg bouxvunz, gou dwg duzngieg ndawraemx. Gou mbouj ndaej youq gwnzhawq gvaq ndwen- ngoenz, danghnaeuz gou youq gwnz- hawq nanz lai, naj gou couh bienq raiz, ndang gou caemh dawzgyaet, yienghsiengq yakyawj dangqmaz, gou mbouj ndaej caeuq mwngz guh gvanbaz.”

Dahsau dingq le, daej lo, doq daej doq naeuz:“Seizneix baenzlawz guh?”

Duzngieg nai naeuz:“Hix mbouj lau lwi. Ngoenzlaeng lwg raeuz okseng le, danghnaeuz dwg lwgmbwk, couh heuhguh Vangzyez, lwgsai coh heuhguh Vangzcauz. Gou hawj cik naq ndeu hawj mwngz, mwngz dawz naq venj youq gwnz ringjduix. Danghnaeuz ngoenzlaeng lwg raeuz miz maz hojnanh, hawj de dawz naq bae henzdah, dwk naq roengz dah bae couh ndaej lo.” Duzngieg gangj sat couh dauq ndawraemx bae lo.

Mbouj geij nanz, dahsau seng daeg lwgsai ndeu, coh heuhguh Vangzcauz.

Vangzcauz ndaej cibbet bi bihaenx, ngoenz ndeu, Langzgyangh (hakdoj) heuh Vangzcauz caeuq gyoengqde haeuj ndoeng bae dwk- nyaen. Ngoenzde Vangzcauz dwk ndaej duzgij hung ndeu. Gyoengqde ram duzgij dauq ndawmbanj gaj, faen noh faen ndok, hoeng, mbouj faen hawj Vangzcauz saekdi. Langzgyangh lij naeuz Vangzcauz:“Mwngz mbouj miz boh, dawz noh dawz ndok dauqranz hawj byawz gwn.”

Vangzcauz dingq le gig vei, maranz lwnh hawj daxmeh nyi, doq lwnh raemxda doq doek, naeuz:“Meh, gyoengqvunz naeuz gou mbouj miz boh, naeuz gou dwg lwgndai, cungj yawjsiuj gou……” Daxmeh dingq le hix daej lo, naeuz:“Lwg ha, mwngz miz boh, boh mwngz youq laj- raemx gvaq ndwenngoenz. Ngoenzcog mwngz dawz cik naq gwnz ringjduix bae henzdah, dwk naq roengz dah bae, mwngz couh ndaej raen boh mwngz lo.”

Ngoenz daihngeih haetromh, Vangzcauz dawz naq daengz henzdah, raen seiqlengq mbouj miz vunz, de couh dwk naq roengz dah bae. Yaepyet, ndawdah ok bouxsai he daeuj, de byaij daengz gwnzmboek henzndang Vangzcauz, cam:“Mwngz dwg Vangzcauz ha?”

“Dwg ne.” Vangzcauz han naeuz.

“Meh mwngz ndei lwi?”

“Ndei ne. Ndangdaej lij cangq, hix lij guh ndaej hong.”

“O! Ndei lai lo. Mwngz ni, gvaq ndaej ndei lwi?”

“Gou ndangdaej caemh ndei ne, hoeng, vunz cungj naeuz gou mbouj miz boh, dwg lwgndai, cungj yawjsiuj gou.”

“Lwg ha, gou dwg boh mwngz. Gou dwg boux youq lajraemx, mbouj ndaej caeuq sou youq gwnzhawq gvaq ndwenngoenz. Gyoengqvunz yawjsiuj mwngz mbouj youqgaenj ndwi. Daj ngoenzcog hwnj, mwngz daeuj henz- dah, swnh mbouj miz vunz youq seiz, boh son mwngz goengfou, lienh gienz, lienh giemq, lienh dwk naq. Goengfou ak le, couh mbouj miz vunz gamj hangz mwngz lo.”

Vangzcauz dwg boux vunz coengmingz ndeu, hag maz rox maz, lienh maz ndaej maz. Mbouj geij nanz, de hag ndaej goengfou lo, baenz bouxvunz ak ndeu, dangdieg mbouj miz byawz beij ndaej de.

Langzgyangh dwg boux hakdoj, de dam gwn dam cienz, dungx iq heiq dinj, cungj hangz unq lau geng.

Langzgyangh rox gij goengfou Vangzcauz ak, couh siengj gaj de bae. Ngoenz ndeu, Langzgyangh naeuz Vangzcauz:“Goengfou mwngz baenz- neix ak, mbouj bae dwknyaen, hojsik lai lo, raeuz bae dwknyaen ba.”

Vangzcauz naeuz:“Mwngz naeuz bae couh bae.”

Ngoenzde, Vangzcauz byaij youq baihnaj, Langzgyangh caeuq gyoengqvunz lajfwngz de byaij youq baihlaeng. Byaij daengz buenqloh, Langzgyangh laeglemx yut naq okdaeuj dwk coh baihlaeng Vangz- cauz bae. Cik naq swenj “ciu ciu” bongh coh Vangzcauz bae.

Duj rwz Vangzcauz cinglingz, fwt dingqnyi baihlaeng miz sing, sikhaek nyeuxgyaeuj dauqlaeng, doengzseiz fwngz de riengjret gaem- dawz ndaej cik naq bongh coh de, caemhcaiq fwt roxsingj ok maz saeh lo. De dawz cik naq haenx cang haeuj gung cihgeij bae, dawz naq dwk coh Langzgyangh. De dinfwngz gig linj, gyoengqvunz mbouj rox maz cingz- gvang, Langzgyangh couh deng naq dwk laemx lo.

Langzgyangh laemx gwnznamh, rouxringx geij mbat couh dai lo. Gyoengqvunz lajfwngz de gvaqdaeuj caeuq Vangzcauz buekmingh, Vangz- cauz fwngz ndeu dawz cax, fwngz ndeu gaem giemq, raemj swix raemj gvaz, yaepyet couh raemj dai gyoengqvunz rwix neix seuq bae.

Gyoengqvunz dangdieg rox Langzgyangh caeuq vunz lajfwngz de cungj deng Vangzcauz gaj dai lo, vuenheij dangqmaz. Aenvih geij ndaek vunz neix saeh rwix saeh yak guh doh guh caenh, beksingq dangdieg haemz youq ndawsim, bak mbouj gamj gangj. Seizneix miz Vangzcauz lawh gyoengqvunz gaj bae, daihgya sim’angq raixcaix.

Gvaqlaeng, gyoengq vunzlai senj Vangzcauz guh boux hakdoj dang- dieg. Vangzcauz dang daeuz le, mboujguenj dwg guh vunz roxnaeuz guh saeh, cungj aeu ndaej simvunz, vih beksingq gangj vah, vih beksingq guh saeh, gij saeh de guh haenx hableix habdangq. Bouxboux haenh de dwg boux hakdoj goengcingq ndeu. Gij saedceij beksingq dangdieg an- onj youh vuenyungz.