Mbanjnazsa geij ngoenz neix ci haeuj ci ok, byaij ndaej gig deih, cungj yaek hoengh dangq gwnzgai bae. Bineix nyinh ndwenloeg, gij lwgmbwk haq okbae de doxcanj cawx haiz soengq dauqma hawj bohmeh. Naeuz maz “lwgmbwk soengq gouh haiz, muengh fouz cai fouz nanh, bohmeh ndaej ndangcangq, angqlag gvaq ndwenngoenz”.

Mehvaz naj saepsat, gik yamq ok bakgvaengh, ranz de gyawj bakmbanj, raen dahlwg ranzwnq cungj ndaej cawx haiz moq dauqma hawj bouxlaux, hoz genx ha. Dahlwg de Dahvaz geij bi mbouj dauq lo. De hix mbouj gamj maqmuengh Dahvaz ndaej cawx gouh haiz hawj de.

Dahlwg haq baih “Deih”,

Rox capheiq geijlai,

Muengh mbouj ndaej gouh haiz,

Yawz ndaej dai dalaep.

Dahvaz haq baihhaenx gangj “Deih”, “Vunzdeih” dwg Bouxgun, cienz naeuz gij cojcoeng gyoengqde dwg daj baihbaek daeuj, mwh Soengciuz riengz bouxciengq Diz Cingh daj Sanhdungh daeuj dwk Nungz Cigauh, dwk hingz le couh mbouj dauq lo, louz youq Guengjsae guhgwn, sanj lwg sanj lan. Ciuhciuh daihdaih roengzdaeuj, Vunzcuengh mbouj haengj aeu lwgsau “Deih” guh bawx, hix mbouj haengj haq lwgsau bae baih “Deih”. Dahvaz cix bienbien haq baih “Deih”, hai, gangj daeuj caen couj naj couj ndaeng.

Ranz Bohvaz ndaem oij lai, bi ndaej geij bak dun, Mbanjnazsa suenq ranz de oij lai. Bohvaz gyaez dahlwg, “yawj dangq roeg gyangfwngz, ngoenzhwnz roengz sim naek, cuengq mbin lau deng saet, gaem ndaet lau deng dai.” Dahvaz doeg cuhcungh sat le gauj mbouj hwnj gauhcungh couh dauqranz, hix mbouj bae baihrog dajgoeng. Mbanjnazsa nazreih lai, ndaem maz ndaej maz, ndei guhgwn, vunz mbouj haengj okrog dajgoeng. Seizde Bohvaz Mehvaz engq mbouj cuengqsim hawj Dahvaz okbae. Mwh hong nyaengq, Dahvaz caemh rox bae reih bae naz. Bi daengz cawz raemj oij, doengh ranz oij lai mbouj ndaej gag guh nyaenx lai, cungj goq vunz daeuj raemj oij. Ranz Dahvaz bibi cungj goq bang “Deihlaux” Saendangz baih Ginhcouh daeuj raemj oij, ranghdieg Mbanjnazsa heuh vunz baih “Deih” guh “Deihlaux”. Bang “Deihlaux” bi daeuj raemj oij geij ndwen, nem vunzmbanj cungj sug.

Bang “Deihlaux” daeuj raemj oij miz daegcoz heuhguh Fanzme, sangsed haemq baenzmbauq, dingqnyi naeuz de doeg daconh gvaq, ra mbouj ndaej hong guh couh riengz daeuj raemj oij. Banneix vunz doegsaw ha, “ra hong hoj guh dai, ma lai cix haex noix, cijndei daeuj raemj oij, cimh doih ra geij maenz”. Ngoenz bae raemj oij, Dahvaz haengj dep gyawj daeg de, songde doq miz gangj miz riu doq raemj oij fifi fwtfwt, mbouj rox baeg mbouj rox naiq, caen dwg “mbauq sau caez guhhong, guh ndaej yongz ndaej ak”. Banhaemh gyoengqvunz souhong dauqranz, Dahvaz caeuq Fanzme cungj haengj youq gwnzreih caebliemx yiengh dem yiengh, mbwn fuemxfub cij baema, haemhhaemh yienghneix. “Mbauq gvai nem sau lengj, caez doxsiengj ndawhoz, guhdoih song bouxcoz, heuh daeggo dahnuengx.”

Mwh Bohvaz Mehvaz yawj ndaej ok di, Dahvaz nem Fanzme cix “ndiep lumj caet lumj geu, doxnem niunwknwk” lo. Song bouxlaux heiqhwnj daengz byai byoem bae, ndaq ndaej Dahvaz gyaeuj yaek naeuh. Saendangz aen mbanj baenzlawz yiengh Bohvaz cungj rox caez, mbouj yaeuh ndaej de. 20 sigij 70 nienzdaih Bohvaz bae camgya haepfai guh Saendangz Suijgu, ndaej youq aen mbanj doekgungx hojndoq haenx baenz bi lai. Saendangz liz haw gyae’gyanggyang, aen mbanj youq ndaw ndoenglaeg, doekgungx mbouj miz roen doeng ci, nazreih cungj seb youq gij lueg gaebgeb nga’nga ngangqngangq, nou lai roeg lai, dajndaem souhaeuj noix, ranzranz hojndoq, boux mizrengz cungj ciengzgeiz okrog bae guhhong. Laenzgaenh gak mbanj ranz miz lwgmbwk cungj yiemz Saendangz hoj lai, mbouj hawj caeuq daegmbauq mbanj de damzyoux, lij naeuz “ningznyienh cimh gaujvaq, hix gaej haq Saendangz”.

Haemh haenx fuemx lo, gwnzmbwn fwj laepdik, baih dinmbwn byajmyig yabyab, ndawmbanj nyi sing Bohvaz ndaq dai ndaq lix, hemq gaj hemq faeg.

“Daxboh, Fanzme vunz lauxsaed, gaenx guh- hong, gou gyaez de……” Dahvaz lae raemxda naeuz.

“Boh’au ha, dou dwg caensim doxgyaez ha……” Fanzme caemh hai bak naeuz.

Bohvaz nyinzhoz raengbingj, heiqhwnj fwfw, rongx naeuz:“Mwngz duz maraq neix, gou mbouj dwg boh’au mwngz, mwngz deuz vaiqdi, caiq daengx yaep ndeu gou couh moeb dai mwngz bae.”

“Boh, gou gouz mwngz gaej ndaq lo.” Dahvaz youq naj Bohvaz gvih roengzdaeuj daejww naeuz, “Gou…… gou hwnjndang lo, dwg lwg Fanzme ha!”

“A!” Bohvaz fwtfwh lumj byajraez dwk deng nei, ceng di ngunh laemx roengzbae. De yaengx fwngz hwnjdaeuj laepda laeprwz haenqrengz fak coh Dahvaz. “Mwngz, mwngz gingqyienz guh ok cungj saeh neix, daengx ranz cungj deng mwngz dawz naj caemj roengz haex bae lo. Mwngz deuzbae, ranz gou mbouj miz cungj lwgmbwk goetcienh neix……”

Dahvaz song fwngz goemq naj daejfwtfwt, rag fwngz Fanzme saemxsaemx saxsax buet ok bak- gvaengh, lienzhwnz deuzbae Saendangz. Mbwn laepdingh lo, yawj mbouj raen saek yiengh, lij lon fwn mwtmwt dem, songde byoemgyaeuj buhvaq mbaeqmbatmbat, gwnznaj Dahvaz engq dumz, de bonjfaenh cix mbouj rox dwg raemxfwn roxnaeuz raemxda.

Gvaq geij ngoenz, Bohvaz Mehvaz lij daiq daeglwg Daegvuengh bae daengz Saendangz ranz Fanzme yaek ragdawz Dahvaz dauqma, naeuz mbouj dauq couh moeb de ga raek bae. Seizde Fanzme okdaeuj, gvih youq dangqnaj Bohvaz naeuz:“Boh, seizneix Dahvaz re ndang youqgaenj, sou yaek moeb couh moeb gou ba!” Dahvaz swngzgei deuzbae ranznden ndoj, Bohvaz gyoengqde geij boux mbouj gamj youq neix moeb Fanzme, hix mbouj ndaej baenz ranz baenz ranz bae viq ra Dahvaz, caj baenz byonghngoenz mbouj raen ngaeuz, cijndei naiqnueknuek deuz dauqma. Doeklaeng gyoengqde caiq bae ra, vunz ranz Fanzme couh naeuz songde mbouj youq ranz, okrog bae dajgoeng lo, mbouj rox daengz gyawz bae.

Seizgan dangq raemx lae, ndwenngoenz bae fwdfwd. Baez yaepda bi ndeu couh gvaqbae lo, Bohvaz Mehvaz mbouj rox mbouj nyinh heiq ciemhciemh roengz lo, haethaemh gag ngeix daengz Dahvaz, “lwg dwg noh simdaeuz, cungj gag you gag heiq, lwg bae guh bawx ‘Deih’, ndaej gwn haemz lailai”. Baez ok haw bae, Bohvaz cungj lauh gwnz lauh laj, ndomqra yawj miz mbouj miz vunz Saendangz de roxnaj haenx daeuj haw, yaek camcam Dahvaz gvaq ndaej baenzlawz.

“O, Saendangz seizneix guh ndaej ndei lai lo, roen haeuj mbanj bu suijniz bingzlwd sohsup, doengxhaemh baenz baiz daeng daiyangznwngz ronghsag, gizgiz seuqsingj lumj ndawsingz…… Fanzme ha, de song gvanbaz uk gvai, bi daengz byai yinx lauxbanj diegrog daeuj soucawx lwgfaeg、lwgmanh、lwgcei、lwgmoed doengh gijneix, fatcaiz lo, bae Namzningz cawx ndaej ranz cawx ndaej ci, laeq lwg de youq gyaenx haeuj youwzyenz……” Goeng Saendangz doenghbaez caeuq Bohvaz haemq gangj ndaej daeuj lwnhbyoegbyoeg naeuz.

Ngoenzneix mbwn sangsad, gvengqyauyau, aen ciiq ndeu vaehvaeh hai haeuj mbanj ma. “Cid——” Dingz youq naj bakgvaengh ranz Bohvaz. Daegcoz ndeu roengzci baenq gvaq lingh mbiengj bae hai douci, boux mehmbwk coz daenj ndaej lengjlili umj laeq lwgnyez ndeu cimh roengzci. Daegcoz daj laengci riuj song aen daeh okdaeuj, nem mehmbwk coz umj lwg boux gonq boux laeng byaij haeuj ranz Bohvaz bae.

“Hou! Houhou……” Duzma lamh gungx daizhongh fwt cak raeuq hwnjdaeuj.

Bohvaz ok daizhongh daeuj baez yawj, youh angq youh doeksaet, hemq naeuz:“Dahvaz?”

“Boh, dou dauqma lo!” Dahvaz hemq naeuz, daegcoz hix riengzbak heuh naeuz:“Boh!”

Mehvaz nyi sing caemh ok daizhongh daeuj yawj, “Dahvaz! Dahvaz gou dauqma la?” Riengz dwk couh buet gvaqdaeuj gotdawz Dahvaz daej saekwk bae.

“Yawj, lanvaihseng nyaenx hung lo cungj mbouj dauqma saek mbat……” Mehvaz doq daej doq mboen naeuz. Hwk ndaej lwgnding ndang cungj geng liux, hix daejnga’nga hwnjdaeuj.

Dahvaz guhmuengz daeuh lwgnding naeuz:“O, lwggvai gaej daej, dwg goengda yahdaiq hane, raeuz ma daengz ranz yahdaiq lo, gaej daej, o, gvai……”

Bohvaz youq henzrik ngawzngwd yaep he le, naeuz:“Dahvaz, mwngz lij haemz daxboh lwi?”

“Boh, saeh cungj gvaqbae baenzlai bi, couh gaej dwen lo.” Dahvaz uetseuq raemxda, fwngz vax gvaq laeng Fanzme bae aeu aen daeh ndenq hawj Mehvaz. “Meh, gou caeuq Fanzme cawx ndaej song gouh haiz ma hawj mwngz caeuq daxboh!”

Mehvaz guhmuengz ciep gvaq daehhaiz, angqfwngfwng dawz haeuj ndawrug ma. Duzma lamh gungx hongh haenx caemh bi gyaeuj bi rieng, diuq hwnj diuq roengz.