Sanhgyangh Dungcuz Swciyen Bazgyangh Cin Dangjveij、Cwngfuj haeujlaeg vatcimh caeuq fatyiengz minzcuz vwnzva yisuz, hawj minzcuz vwnzva hoenghhwd bangdoi minzcuz doxgiet.

Henhoh ndei minzcuz vwnzva, doidoengh minzcuz vwnzva cangqheiq hwngfat. Aen cin neix yawjnaek hong hwnqguh feihvuzciz vwnzva yizcanj mingzloeg, aeu caij din venz Dungcuz gonqlaeng bauq le yienh gaep、si gaep、swcigih gaep feihvuzciz vwnzva yizcanj mingzloeg, guh hung aen mingzdaeuz caij din venz Dungcuz. Haenqrengz doicaenh hong senhconz langhbaij, gujli caeuq boiqhab gak mbanj guh hozdung caij din venz、cujciz aen doih venz okrog camgya gak loih hozdung, cungfaen langhbaij gij rengzhoengh caeuq yinxdaeuz caij din venz Dungcuz.

Hwnqguh ndei minzcuz vwnzva, doicaenh minzcuz vwnzva hwngfat riengjret. Aen cin neix laebbaenz aen hezvei venz ndawbiengz, dingh aen cidu cienzswnj caij din venz Dungcuz, hawj caij din venz Dungcuz miz bouhloh cienzswnj. Aen cin neix lij yawjnaek guh ndei giek dem, couz cienz hwnqguh daizheiq、gvangjcangz, gunghawj aen dieg guh hozdung minzcuz vwnzva, hawj “cunh cunh miz gvangjcangz、mbanj mbanj miz daizheiq”, doicaenh minzcuz vwnzva hwngfat riengjret.

Cienzswnj ndei minzcuz vwnzva, doicaenh minzcuz vwnzva hwngfat mwnhoengh. Giethab Bazgyangh Cin Cunghsinh Hagdangz、gak mbanj siujyoz daengj aen bingzdaiz sonhag hagdangz, gungganq bouxcienzswnj minzcuz vwnzva. Aen cin neix gaenxmaenx banh gak loh hozdung doxdax vwnzyi, hawj aen dieg vwnzva lajmbanj hoenghhwd, baengh “yezyej”“lwgsau dauq ranz”“caij din venz” daengj cienzdoengj Dungcuz vwnzva, cunh caeuq cunh、mbanj caeuq mbanj guh hozdung doxgyau, cauh gij heiqfaenh hwngfat ndei minzcuz vwnzva yisuz.

(Gun Yicungh Veiz Lanzcauh)