Vih caenh’itbouh guh ndei hong bauq doigawj Guengjsae buek daih- roek guekgya gaep feihyiz daibyauj- sing bouxcienzswnj caeuq buek daihgouj swcigih gaep feihyiz daibyaujsing hanghmoeg, mboengq- neix, Swcigih Vwnzva Caeuq Lijyouz Dingh baij lai aen cuj guhhong bae gak dieg guh diuyenz. Ciuq gyoebsuenq, seizneix Guengjsae guekgya gaep feihyiz daibyaujsing hanghmoeg miz 70 hangh, guekgya gaep daibyaujsing bouxcienzswnj miz 49 boux（40 boux lij lix）, swcigih gaep feihyiz daibyaujsing hanghmoeg miz 914 hangh, swcigih gaep daibyaujsing bouxcienzswnj miz 936 boux.

Diuyenz doenggvaq daengz dieg yawj、haihoih、yawj dangciengz yienj、yawj bozvuzgvanj、camlwnh gangjgoj daengj fuengsik, roxyiuj boux yaek bauq daibyaujsing bouxcienzswnj guhlawz guh hozdung cienzswnj, caeuq aen hanghmoeg bauq youq dieglawz lai、miz maz lizsij、cujyau dwg gaiq vunz lawz cienzswnj、miz maz daegdiemj、miz maz gyaciz youqgaenj daengj, daezok mizgven yigen caeuq genyi, gikcoi caeuq coi hawj gak dieg guh ndei hong bauq doigawj bouxcienzswnj feihyiz caeuq daibyaujsing hanghmoeg.

Geij bi neix daeuj, Guengjsae gaenxmaenx doidoengh cienzswnj baujhoh feihyiz, gonqlaeng guh caemhcaiq guhsat hong bauq doigawj guekgya gaep daibyaujsing boux- cienzswnj haj buek caeuq bauq bingzdingh swcigih gaep daibyaujsing hanghmoeg bet buek, hwnqguh aen dijhi baujhoh mingzloeg guekgya、swcigih、si、yienh seiq gaep gaenq laebbaenz caemhcaiq onjyamq guh baenaj.

(Linz Seznaz Cangh Ciuhveij Goz Sanhminj)