Sai:

Cin daengz bak va hai,

Raeuz dap daiz ciengq go,

Cinglienz bouxboux rox,

Raeuz doq fwen daeuj haenh.

Mbwk:

Cin daengz bak va hai,

Raeuz dap daiz eu fwen,

Caiq mbouj rox lawz dwen,

Fwen cinglienz geij coenz.

Sai:

Gaxgonq gou lij nyez,

Couh dingq bouxgeq naeuz,

Gwnzbya duzmaxlaeuz,

Saeklaeuq rox doek dat.

Mbwk:

Gaxgonq gou lij iq,

Nyi bouxlaux hai sing,

Meuzgeq rox doek ringj,

Lingzgeq rox doek dat.

Sai:

Miz gwn caiq siengj daenj,

Miz ngaenz caiq siengj gim,

Guh vunz miz lai sim,

Haeuj ninz hix mbouj onj.

Mbwk:

Miz gwn naemj aeu daenj,

Miz ngaenz naemj aeu ranz,

Guh vunz sim daiq dam,

Famh saeh ienq mbouj gib.

Sai:

Byaij loh mbouj yawj roen,

Saekngoenz rox daemjndoet,

Guh saeh naemj deng loek,

Cij mbouj doekcoih vunz.

Mbwk:

Byaij loh mbouj yawj roen,

Din coeg oen mbouj rox,

Guh saeh dawz hawj hoz,

Cij mbouj rox doekcoih.

Sai:

Vaiz mouz nywj doek lag,

Vunz mouz bak doekcoih,

Guh saeh doiq mbouj doiq,

Lainoix vunz rox bingz.

Mbwk:

Bouxgeq miz vah naeuz,

Lij noix aeu fagcim,

Langh mbouj gaij aen sim,

Geq aeu gim couh nanh.

Sai:

Moed dwk daihliengz nduk,

Byuk dwk va couh byaiz,

Raeuz mbouj dam cienzcaiz,

Vunzlai bouxboux angq.

Mbwk:

Moed dwk faexhung nduk,

Byuk dwk va couh byaiz,

Boux mbouj dam cienzcaiz,

Daihdaih ndaej vunz haenh.

Sai:

Bya lawz mbouj gwn nyaez(mez),

Sae lawz mbouj gwn namh,

Vunz guh saeh daiq hamj,

Damj hung lai vaih ciuh.

Mbwk:

Bingh iq aeu yw ndei,

Gvaq seiz couh hoj coih,

Rox byaij roen rox doiq,

Lainoix mbouj oksaeh.

Sai:

Ciuhgonq mbangj bouxdaeuz,

Sim mbaeu vunz youh soh,

Vihliux gouq bouxhoj,

Bohmeh dawz gvaq henz.

Mbwk:

Ciuhgonq mbangj bouxdaeuz,

Mbouj ngah ngaenz dam gim,

Vihliux guh gwzming,

Lwgcing hix mbouj goq.

Sai:

Ciuhgonq gyoengq hungzginh,

Ce mingh youq ndawbya,

Dungx iek gwn raghaz,

Daraiz lumj loek baenq.

Mbwk:

Ciuhgonq gyoengq hungzginh,

Bin gvaq dat gvaq bya,

Dungx iek gwn raghaz,

Caux dienyah hawj raeuz.

Sai:

Baihgwnz daihbauq hoenx,

Gwnzroen vunzdig laeh,

Mbouj buet hix mbouj ndaej,

Ngeix gijmaz ngaenzcienz.

Mbwk:

Baihgwnz feihgih hoenx,

Gwnzroen vunzdig laeh,

Mbouj goq aen ndangdaej,

Mbouj ngeix ngaenz ngeix

cienz.

Sai:

Ganbu aeu guh ndei,

Cosim geiq ndawdungx,

Song gen seuq lumj rumz,

Vunzlai bouxboux haenh.

Mbwk:

Ganbu aeu guh cingq,

Cosim geiq ndawdungx,

Gaej naemj gwn amq hung,

Cij ndaej vunzlai haenh.

Sai:

Dangjyenz aeu daiq ndei,

Rox aen gveih aen gij,

Guh saeh baengh fazliz,

Mbouj miz bouxlawz lwnh.

Mbwk:

Dangjyenz aeu daiqdaeuz,

Mbouj ndaej mouz cienzcaiz,

Lauz ngaenzcienz daiq lai,

Ngoenz dai caj mwngz daengz.

Sai:

Raeuz dwg boux ganbu,

Guh saeh aeu roengzsim,

Boux dam ngaenz dam gim,

Mbouj dai sim hix naeuh.

Mbwk:

Raeuz dwg boux dangjyenz,

Gingz gaemxgienz mieng gvaq,

Bak yied gwn yied ngah,

Rox dai gaj saek ngoenz.

Sai:

Bouxgeq miz vah naeuz,

Vunz mbouj ndaej mouz lai,

Vunz dam caiz rox dai,

Roeg dam gwn rox mued.

Mbwk:

Bouxgeq naeuz mbouj loek,

Goek faex aeu hoh ndei,

Non gwn mbouj liuhleix,

Laemx seizlawz mbouj rox.

Sai:

Gofaex youq bakgeuq,

Rox bungz rumzgeujgaeq,

Youq danvih dangsaeh,

Bouxboux gyaez daeuj ra.

Mbwk:

Gofaex youq bakgeuq,

Rumzgeujgaeq mbouj lau,

Raeuz aen ndang mbouj ngaux,

Mbouj lau laemx roengz namh.

Sai:

Go’ngaeux hwnj ndawnamh,

Mbouj samj(uq) nyap samj(uq) boengz,

Raeuz guh deng guh loeng,

Miz cik goengbingz dag.

Mbwk:

Go’ngaeux hwnj ndawdaemz,

Mbouj samj(uq) raemx samj(uq) namh,

Raeuz aen sim mbouj dam,

Mbouj rox famh gijmaz.

Sai:

Ndaem faex youq bakgeuq,

Rox deng rumzgeujgaeq,

Cinglienz guh mbouj ndei,

Saehsaeh guh mbouj baenz.

Mbwk:

Ndaem faex youq bakgeuq,

Rox deng rumzgeujgaeq,

Cinglienz guh ndaej ndei,

Saehsaeh guh swnhleih.

Sai:

Bouxdaeuz aeu cinglienz,

Mbouj yungh gienz guhsaeh,

Raemxmboq saw raen daej,

Cij ndaej gwn gvaq ciuh.

Mbwk:

Bouxdaeuz aeu cinglienz,

Gaem gienz aeu yungh ndei,

Langh doeng dam sae ngeix,

Yungzheih famh daihcoih.

Sai:

Dang guen vih lwgmaenz(lwgminz),

De cij baenz bouxdaeuz,

Dang guen mbouj gyaekgyaeu,

Dang duzmou ndaw hog.

Mbwk:

Dang guen gaenx guh saeh,

De cij ndaej hwnj hung,

Dang guen dam coq dungx,

Vunzlai bouxboux lwnh.

Sai:

Cinglienz dwg aen daeng,

Ciuq daengz gwnz daengz laj,

Bouxlawz guh lujlaj,

Byaj rox bag saek ngoenz.

Mbwk:

Cinglienz dwg aen daeng,

Ciuq daengz gwnz daengz laj,

Bouxlawz mbouj dingq vah,

Mbouj deng gaj hix gyaeng.

Sai:

Mbaw liz nye couh nyaeuq,

Daeuz liz maenz(minz) couh baih,

Byuk liz namh couh dai,

Boux dam caiz vaih ciuh.

Mbwk:

Mod dwk goek faex dai,

Byuk dwk fai hung doemq,

Boux dam caiz sim ndaem,

Laemxhoemj vunz mbouj nyiengh.

Sai:

Faex baengh rag cij maj,

Bya baengh faex cij loeg,

Vah dangj gangj mbouj loek,

Goeksim mbouj ndaej lumz.

Mbwk:

Cinglienz gangj ok bak,

Dang cag cuengq doiqnaj,

Bouxlawz mbouj dingq vah,

Cug ga caiq cug hoz.

Sai:

Guh lienzcwng gensez,

Rubrex ndei lwgminz,

Gungcanjdangj cizcing,

Raeuz youq bingzlele.

Mbwk:

Ndaem faex mbouj dok rag,

Bak go hix mbouj mwn,

Mbouj guh ndei lenzcwng,

Gwnz laj mbouj vuenyungz.

Sai:

Cinglienz gangj okdaeuj,

Raeuz gangj sim couh ciuq,

Vah mbouj dwg gangj riu,

Ciuq fazliz guh saeh.

Mbwk:

Cinglienz gangj ok bak,

Gag boux sim aeu hengz,

Yienghlawz guh mbouj deng,

Ceng dauqlaeng vaiqdi.

Sai:

Raemxdah miz goek lae,

Faex hung miz rag ciengx,

Gungcanjdangj dang biengz,

Siengj vaih mbouj gvaq ciuh.

Mbwk:

Va gyaeu baengh gaenx ganq,

Ranz seuq baengh dajleix,

Lenzcwng gensez ndei,

Fukheiq daih cienz daih.

Sai:

Cinglienz youq ndawsim,

Lwgminz bouxboux angq,

Guhdoih byaij siujgangh,

Riu angq gvaq ndwenngoenz.

Mbwk:

Cinglienz youq ndawsim,

Lwgminz bouxboux angq,

Byaij diuzroen siujgangh,

Angqyangz gvaq ndwenngoenz.