Baihnamz bineix seizdoeng gangj daengz couh daengz lo. Ngoenzlwenz nyaengz daenj mehmuh gen duenh roxnaeuz daenj mehvinj mbinfifi, cij raq rumz liengz ci gvaqdaeuj, caiq raq fwn ndeu doek roengzdaeuj, gij heiqndat lumj baez yaepda nei couh mbouj miz ngaeuz lo. Hai cueng, gij rumz ci haeuj gwnznaj daeuj, daengx ndang couh liengz ndaej hwnj naenggaeq bae, banhaemh haeuj mbonq ninz couh aeu goemq bunz moeg na’noeknoek. Gou lumj bi gax- gonq nei, cungj gyaez dawz bunz songzmoeg baengzdoj haeuj mienzdoi daeuj goemq.

Bouxgvan gou hainduj mbouj nyienh goemq bunz songzmoeg baengzdoj. De gangj naeuz:“Maz seizdaih lo, bouxlawz lij yungh songzmoeg baengzdoj dem?” “Mwngz loek le, gyoengq vunz seizdaih neix gvai lai lo, ndang daenj roxnaeuz gwnz mbonq goemq, cungj gyaez yungh baengzdoj lai, aenvih baengzdoj mbouj caengq ndangnoh.” Gou han de naeuz. “Gij baengzdoj bouxwnq dwg lumj neix nyapnyotnyot ha?” “Bunz neix dwg daxbuz gou aeu cien fanh geu cim mae daemj okdaeuj, mwngz miz ngaenz cien ngaenz fanh lij cawx mbouj ndaej dem.”

Daxbuz ciuh vunz dwgrengz lai. Daxgoeng ndaej samcib roek bi couh biek daxbuz bae le, gvenggvak sam daeglwg caeuq dahlwg ndeu hawj daxbuz. Seizde ngaiz mbouj gaeuq gwn, mizseiz cij ndaej gwn mbawfaex roxnaeuz ragfaex. Daxbuz bouxdog gwn haemzhoj ciengx geij boux lwg. Vunzmbanj gangj daengz daxbuz gou cungj haenh de.

Buenq lai ciuh vunz gvaqbae, daxbuz yawjraen gyoengq lwglan rim ranz, faj naj de ngoenzngoenz hai baenz va. De ciengzseiz gangj:“Sou gyoengq lwglan gvaq ndaej ndei, gou couh mbouj miz maz simnyap lo.”

Daxbuz ndangdaej lij ndei seiz, bibi youq ndawreih ndaem gofaiq. Daengz seizcou, ngoenz mbwn- gvengq, gij faiqaen lumj baj fwjhau nei youq ndawreih dek ndaej hausaksak, daxbuz couh daiq dou gyoengqnyez dawz daeh dawz loz bae gip faiq, gaiq reih doek gaiq reih gip gvaqbae, daxbuz doq gip doq eu fwen:

“It naed haeux dwg it caek hanh,

Haeuxgwn ndawranz mbouj gag daeuj,

Mbaet gwn mbaet yungh geiq simdaeuz,

Ranz raeuz hwngvuengh cienz baengh de.”

Daxbuz eu, dou hix riengz de eu, de eu coenz dou riengz coenz, gwnzbya ndawlueg couh lumj doxbeij eu fwen nei, nauhyied lailai.

Daxbuz aeu faiq daeuj dak ndit, caj daengz gij faiq mboengmbupmbup hwnjdaeuj, canghdajmienz hix daeuj daengz lajmbanj lo. Seizde, lajmbanj mbouj doeng ci, siengj bae haw saek mbat couh aeu byaij bae, sojmiz gijgwn gijyungh aeu mbaq rap bae ranz. Boux guh seng’eiq lumj canghdajmienz、canghguhdoz、boux- gairek cungj louz mbanj gaicawx. Canghdajmienz bang daxbuz daj baenz faiqgung, de aeu mbangj daj baenz mienzdoi, mbangj daz baenz mae. Daxbuz ciengzseiz gyanghaemh youq laj daeng’youz daz faiq, gij sing daz faiq lumj go coi ninz nei, buenx dou haeuj ninz.

Daxbuz daz mae heux youq aen lwgfaiq, heux baez aen doek aen, heux liux le, aeu aen fangzci fwngz ngauz de daeuj hai mae, hai baez haujlai gyoengx, gyoengxgyoengx miz cien fanh diuz mae. Ra ngoenz mbwn- gvengq ndeu, dawz naed haeuxyangz daeuj dumq cug dumq dek, caiq coq gij mae gyoengx roengzbae doengzcaez dumq. Vihmaz aeu naed haeuxyangz dumq mae? Daengz ngoenzneix gou hix mbouj rox, seizde hix mbouj geiqndaej cam daxbuz gvaq. Hoij gij mae dumq gvaq youq gwnz gaqcuk dak ndit, byaij gvaq henz lij nyouq ndaej gij heiq naed haeuxyangz dem.

Daxbuz aeu geu faexcuk iq ndeu dub gij mae neix, caj daengz bomj haeuxyangz doek liux, gij mae neix hix sauj lo. Gij mae neix buenq ndeu cimq haeuj ndawraemx gofog, nyumx baenz mae ndaem, buenq ndeu mbouj hwnj saek, neix couhdwg mae hau.

Nyumx mae ndei, couh daemj baengz lo. Daemj rok gaxgonq, aeu hoij rok. Hoij rok aeu miz song boux vunz, boux ndeu aeu mae, saekhau caeuq saekndaem doxgek, ndaw uk de lumj miz fuk veh ndeu nei, aen gek lawz dwg saek lawz, aen gek dem aen gek miz geijlai gvangq, de cungj rox caez, baez aeu loek, dozanq couh bienq lo, gij baengz daemj okdaeuj couh mbouj gyaeundei lo. Ndigah, boux aeu mae itdingh dwg boux cangh’aeumae. Lingh boux aeu yawj mae, doxheux couh hai, goenq le couh ciep. Song boux vunz siuj boux lawz cungj guh mbouj baenz hong.

Seizde, ranz dou mbouj yungh cingj vunz daeuj bang, daxmeh gou caeuq daxbuz songde couh rox guh. Hoij rok seiz, youq doulaeng baiz geij aen gyaek, dounaj baij aen rok, daxmeh gou song fwngz cou mae byaij daengz dounaj youh byaij daengz doulaeng, baebae dauqdauq, ca mbouj lai guh baenz ngoenz cij guh ndaej liux. Miz geij lwgnyez cabheiq yawjraen daxmeh byaij haeuj byaij ok, couh diuq haeuj gyang bae, gauj ndaej gij mae miz giz goenq, miz giz doxgeuj, hawj daxmeh hozhwnj ndaej yaek hut yaek dub.

Hoij rok le couh daengz daemj rok lo. Daxbuz geq le ndangdaej mbouj daih ndei, mbouj bae guh hongreih hongnaz lo, couh guh hongranz, cawj ngaiz ciengx gaeq gueng mou, guh gij hong neix liux, de couh daemj baengz. Aen lwgdaeuq youq ndaw fwngz de lumj duzbya youz raemx nei cin gvaq ndawmae, daj baihgvaz cin daengz baihswix, youh daj baihswix cin daengz baihgvaz, baebae dauqdauq, nyinhcaen dangq- maz.

Mbouj geij nanz, bunz songzmoeg baengzdoj couh daemj baenz lo.

Bi dem bi, daxbuz bibi daemj baengz. Ndawranz gak boux lwglan dou cungj miz songzmoeg daxbuz daemj. Dou naeuz de wngdang yietnaiq lo, bouxlawz rox de mbouj daengx din fwngz, ciuqgaeuq bibi ndaem faiq, bibi daemj songzmoeg. Dou cam de:“Buz ha, ndawranz bouxboux miz gij songzmoeg mwngz daemj lo, mwngz daemj hawj bouxlawz dem?” Daxbuz riunyumnyum naeuz:“Lansau ha, daxbuz ngoenz beij ngoenz geq lo, ngoenzlawz dai bae couh mbouj ndaej raen sou baehaq, seizneix da lij yawj raen, lai daemj geij bunz hawj sou.”

Daengz ngoenzneix, gij baengz lai cungj lai yiengh guh baenz songzmoeg, seiznit goemq cungj, seizhah goemq lingh cungj, hoeng, gou itcig gyaez goemq bunz songzmoeg baengzdoj daxbuz daemj.

Daxbuz dai bae cib geij bi lo, baez ndaej lumh bunz songzmoeg baengzdoj neix, couh lumj ndaej gaemh gij fwngz daxbuz nei, ndawsim raeujrubrub.