Mboengqneix, Liujcouh Si Minzcunghveij caeuq Yungzsuij Myauzcuz Swciyen Yenveij Dungjcanbu youq dieg buen senj youq banh aen hozdung saedguh cawjdaez gyauyuz cukmaenh gij eiqsik caezcaemh Cunghvaz Minzcuz caeuq aen ban son song vah bangrengz saenqhwng lajmbanj cukmaenh gij eiqsik caezcaemh Cunghvaz Minzcuz Liujcouh Si bi 2022.

Youq aen hozdung saedguh cawjdaez gyauyuz cukmaenh gij eiqsik caezcaemh Cunghvaz Minzcuz, fat swhliu 200 faenh, guh hozdung ciengjdap cihsiz cukmaenh gij eiqsik caezcaemh Cunghvaz Minzcuz, guh hozdung hag song vah ndaej faen caujvuenh. Vunzlai ndaw segih dieg buen senj youq doenggvaq aen cwngzsi iq veihsin youq gwnz de hag Vahbujdungh caeuq vah siujsoq minzcuz, aeu ndaej faen camgya caujvuenh huqlaex.

Youq aen diengzhong bangfuz couhnieb dieg buen senj youq, banh le aen yizsiz haiban aen ban son song vah bangrengz saenqhwng lajmbanj cukmaenh gij eiqsik caezcaemh Cunghvaz Minzcuz Liujcouh Si bi 2022. 50 boux yozyenz dieg buen senj youq caeuq vunz youq henzgyawj youq haenx daeuj camgya, gyoengqde nienzgeij youq duenh 16 bi daengz 55 bi, aen ban neix son 《100 Coenz Vahbujdungh》、 cwngzsi iq veihsin hag song vah、son dinfwngz dajsiuq doxgaiq Myauzcuz daengj.

(Lij Yinzciz Siz Sanh)