“Byawz cungj nyinhnaeuz swh- geij dwg vunzndei.” Daiq nyinhcaen naeuz, “mboujguenj de baenzlawz gangj, de vanzlij mbouj ndaej duet ‘vunzrwix’ aen mingz neix bae, gij saeh de cij ndaej saenq dingznoix ndwi.”

“Gou saenq de mbouj yaeuh gou, gij saeh de gangj cungj dwg caen.” Gou gwq euq, daiq doiq Aulungzgveiz miz cwngzgen, gou mbouj doengzeiq gij yawjfap de.

“Nanzdauh mwngz saenq Lungz- byauh cix mbouj saenq daiq?”

“Mwngz doiq Aulungzgveiz miz cwngzgen.”

“Aenvih de dwg boux vunzrwix.” Daiq euqgeuz naeuz, “mwngz mbouj rox, gou dwen song gienh saeh mwngz couh rox lo. Bonjlaiz bakdoulaux ranz Ahveij miz seiq go faexnganx hung, moix bi cungj baenz haujlai mak- nganx, daj Lungzbyauh ndaej cuengq dauq bi daihngeih, seiq go faexnganx haenx sawqmwh youq ndaw bi ndeu couh dairoz sam go lo.”

“Gofaexnganx dairoz le baenz- lawz ndaej gvaiq Aulungzgveiz ne?” Gou bang Aulungzgveiz gangj vah.

“Neix mwngz couh mbouj rox lo, Lungzbyauh haemz dai vunz ranz Ahveij lo, seiq go faexnganx haenx gvendaengz gij minghsoq ranz de, Lungzbyauh loengh dai gofaexnganx, caen dahraix, mbouj gvaq song sam bi, ranz Ahveij gonqlaeng couh dai bae le geij boux vunzsai, goeng de、lungzlaux de、lungzngeih de caeuq boh de, mwngz naeuz Lungzbyauh baenzneix guh doegsieb lwi?”

Daiq gangj daengz coenz laeng seiz, gig gikdoengh, youq henzdaiz byaij le song yamq, youh cienq ndang naengh youq gwnz eijgvaengx, youh cam gou coenz ndeu:

“Mwngz naeuz Lungzbyauh baenzneix guh saedcaih cietdoh lai luba!”

“De baenzlawz loengh dai go- faexnganx ne? Aeu faggawq bae gawq?” Gou lij dwg mbouj saenq geijlai.

“De aeu fagdauz dauz gvaengx naengfaex ganjfaexnganx bae, couh lumj gvej hop naeng hoz bouxvunz bae nei, baenzneix gofaexnganx couh menhmenh reuqroz dai bae lo.”

“Baenzneix——” Gou gaxgonq lij caengz ndaej dingqgangj gvaq gij saeh neix, gvaiq mbouj ndaej bak- doulaux ranz Ahveij seizneix cij lw go faexnganx hung he ndwi lo, sam gofaexnganx dairoz aiq deng gawq bae vat deuz lo, caiq ndaem roengz haj roek gofaexnganx iq. Buqvaih gij fungsij ranz Ahveij, danghnaeuz caen dwg Aulungzgveiz guh, de hix siengj ndaej giuj, ca mbouj geijlai dwg de gaj le bouxvunz ranz Ahveij lo, baenzneix guh doeg lai lo!

“Caeklaiq doq baenranz bae, lungzsam Ahveij cij ndaej lix, gizyawz sam ranz miz vunz dai, miz vunz bingh, ca mbouj geijlai goenq rag lo.”

“Aulungzgveiz daiq haemz gyoengqde lo.”

“Aeu haemz, ceiq lai haemz bohmeh Ahveij couh ndaej lo, youh gvendaengz gizyawz sam ranz maz saeh ne?”

(caengz sat)