Sai:

Gofaex youq ndawndoeng,

Daiqnanz roengz bak fouj,

Haujlai boux saefouh,

Daeuj yawj youh dauq deuz.

Mbwk:

Bakdou miz faex hung,

Louz hawj vunz yiet raemh,

Daengq beix gaej bae raemj,

Louz haethaemh yiet liengz.

Sai:

Haeuj bya ra baengzyoux,

Raen golaeux gwnzrin,

Gou siengj bae yiet yim(yaem),

Lau gaenglingz daeuj nauh.

Mbwk:

Gwnzbya miz faex hung,

Deng gorungz lai raemh,

Mbouj dwg bouxlawz ndaem,

Miz raemh caez yiet liengz.

Sai:

Gofaex sang goq sang,

Nanz ndaej dang dienyah,

Gwnzmbwn mbouj roengz raq,

Raemx ndawdah hawq caez.

Mbwk:

Ndawndoeng miz faex lai,

Raemx gag baiz okdaeuj,

Dangh aenmbwn mbouj caeuh,

Ndawhaij raemx hawq caez.

Sai:

Gomienz cib caengz byak,

Guhmaz bak daengz ndaw,

Aenruz deng vunz caeu,

Gou guhlawz gvaq haij?

Mbwk:

Gofaex youq henzbya,

Baengh gijmaz ciengx rag?

Gohaeux yaek daihat,

Mbwn mbouj fat raemxraiz.

Sai:

Gofaex youq henzdat,

Baengh diuzrag biu ngaz,

Mbouj nanz roengz fwnraq,

Haeux hai va miz ngveih.

Mbwk:

Gofaex youq dathau,

Song fwngz ngauz mbouj doengh,

Siengj raemj ma doq loengx,

Gwed mbouj doengh hix nanz.

Sai:

Raemj aeu duenh cungqgyang,

Song raeuz gang aen gyaeuj,

Caez gwn dangz gyaux haeux,

Mbouj cinj bouxlawz haiz.

Mbwk:

Doengzcaez ram faexhung,

Ram daengz gwnz yietnaiq,

Dwg bouxvunz seiqgyaiq,

Lauhoengj vaih goengrengz.

Sai:

Song vunz ram song gyaeuj,

Caez gwn haeux gyaux dangz,

Raeuz fukheiq goj ngamj,

Cancan dangz riengz noh.

Mbwk:

Bakdou miz gocoengz,

Muengh fungh roengz dak fwed,

Muengh song da ok lwed,

Rox duz roengz dieg lawz?

Sai:

Bakdou miz gocoengz,

Fungh rox haengj ma douh,

Mbouj yungh leux baengzyoux,

Fungh daeuj douh gwnzdingj.

Mbwk:

Ndawndoi miz faex lai,

Dan gofaiz cuengq sienq,

Langh ndaej fungh ma ciengx,

Byaleix cienz bienq lungz.

Sai:

Ndawndoi miz faex lai,

Dan gofaiz hwnj hoh,

Ndaej beix daeuj ciuqgoq,

Bak yiengh hoj cienz lumz.

Mbwk:

Song gofaex doxap,

Rag doxgap cij ndei,

Siengj riengz nuengx doxgyaez,

Youh lau miz vunz hah.

Sai:

Song gofaex doxap,

Byaj bag mbouj faenhai,

Doengz Sanhboz Yinghdaiz,

Daengz dai caez caemh moh.

Mbwk:

Ndawndoi faex baenz baiz,

Dan gofaiz caux ceij,

Mboujguenj dai naeuz leix(lix),

Mbouj gvengq beix saek seiz.

Hab:

Song gofaex bingz baiz,

Rumz lai ngauz mbouj ning,

Beixnuengx it diuz sim,

Caez doengz sim doengz youq.