广西民族大学推出两款语言文字处理“利器”

实现多民族文字互译 方块壮字也能检索、输入

Mboengqneix, Gvangjsih Minzcuz Dayoz lwnh vunzlai rox, aen bingzdaiz lai cungj vah doxhoiz caeuq aen yonjgen coqhaeuj Sawcuengh aen hagdangz neix camgya yenzgiu haifat haenx cingqsik goengbouh, aen bingzdaiz lai cungj vah doxhoiz gwnzsienq doxhoiz Cuengh、 Gun daengj lai cungj saw ndaej, aen yonjgen coqhaeuj Sawcuengh comz miz Sawcuengh gyoepyaem caeuq Sawndip song loh, diemjra caeuq coqhaeuj Sawndip ndaej.

Aen yonjgen coqhaeuj Sawcuengh dwg aen yonjgen yungh daeuj cawqleix saenqsik cihsaw ndeu, vih riengjret coqhaeuj Sawcuengh gyoep- yaem、cingjleix vwnzyen sawgaeuq Sawndip daengj bae yenzgiu haifat okdaeuj. Aen yonjgen neix comz miz Sawcuengh gyoepyaem caeuq Sawndip song loh, baez naenx couh vuenh loh, coqhaeuj baez aen yinhcez, couh miz lai aen sawloih okdaeuj, caiq mbouj lumj gaxgonq nei coqhaeuj baez cih baez cih, doengzseiz gangj Vahcuengh yaem biucinj coqhaeuj de hix rox ndaej, doenggvaq Sawcuengh gyoep- yaem、bitveh gonqlaeng song loh fuengfap diemjra caeuq coqhaeuj Sawndip ndaej.

4 hauh, gicej hwnj gwnz muengx Aen Bozvuzgvanj Vahgangj Gvangjsih Minzcuz Dayoz yawjraen, aen bingzdaiz lai cungj vah doxhoiz、aen yonjgen coqhaeuj Sawcuengh gaenq yungh ndaej, bouxdoeg doiq neix mizyinx, hwnj gwnz muengx Aen Bozvuzgvanj Vahgangj Gvangjsih Minzcuz Dayoz（http://languagemuseum.gxun.edu.cn/）bae yawj bae ra.(Luz Caudwz)