Gou miz haujlai “gim”, dwg gou gyanghaemh youq ndaw “ranz gim” ra ndaej……

Moix haemh, gij daeng gwnz gai ngamq rongh, gou couh gaenjvaiq guh hongranz seuq, youh seuqdangq bang lwgnyez bwnq gwn swiq ndang le, couh caenx di seizgan hawj swhgeij, ndonj haeuj fuengzsaw bonjfaenh bae, dinghsim roengzdaeuj bae ra “gim” lo. Neix dwg gienh saeh mizyinx youh habhoz ndeu! Gou muengh daj neix ra ndaej “gim”, hix hawj bonjfaenh ra ndaej gaiq dieg gaij gij simgaenj bae, mbouj hawj swhgeij youq ndawbiengz laicab haenx byaij loeng, hawj seiqvunz gvaq ndaej engq fungfouq、engq baenz.

Daegbied dwg youq gyanghwnz gyoengqvunz ninzcaem seiz, baihrog seiqhenz cungj caemrwg, mbouj miz maz cauznauh, gou couh haengj ndwn youq henz gyaqsaw ra “gim”. Cig- daengz genj aeu “ranz gim” sim gyaez ndeu, cij onjsim youq laj daeng bae cimhra “gim”. Gou couh yienghneix damsim caenhrengz gip aeu gij “gim” ndaw “ranz gim”, mbouj dingz mbouj duenh youq ndaw “gim” cimhra aen daeng ndawsim ceiq rongh haenx.

Gangj daengz neix, sou wnggai rox diuz loh ra “gim” gou couhdwg doegsaw loba?

Gyoengqvunz cungj rox, seizneix saedceij miz gwn miz daenj, vangjloz fatdad, dou boux cunghnienz gwnzlaj miz bouxlaux lwgnyez duengh galaeng, gunghcoz youh nyaengqfoedfoed, daengx bi daj gyaeuj daengz byai nyaengq mbouj ndaej hoengq gvaq. Daegbied dwg seizneix cinwngz soujgih haujlai vunz cungj miz, hwng gij vwnzva gvaicanh, gyoengqvunz cungj nanz ndaej miz seizgan caeuq cinglig dinghsim bae doegsaw yawj bauqceij lo. Danghnaeuz miz byawz guh ndaej daengz, lij ngaiz vunz riu dwg boux linghloih daihsaengq dem.

Gou lij raen henzndang miz haujlai vunz doiq gij saw caeuq bauqceij danhvei dungjyiz fat haenx cungj mbouj leix mbouj langh, engq miz vunz dawz doengh gij saw caeuq bauqceij caengz yawj dangguh ceijfeiq gai bae, hawj gou sim’in dangqmaz.

Gyaez saw haengj doegsaw, dwg aen sibgvenq gou ndeu. Gaxgonq, baengzyoux dingjlingz bungz gou ndwn youq dangqnaj dan saw, geiz- heih dangqmaz. Aenvih gyoengqde rox gou mboujlwnh seizlawz cungj gig insik seizgan, seizhaenx gingqyienz sij ndaej yungh seizgan dijbauj daeuj genj saw cawx saw…… Gyoengqde caen nanz siengj ndaej daengz, daengxda yawj gou.

Gou cij riuhehe, fwngz bungj bonj saw, gyaez mbouj sij cuengq, doq mbon ngaenz cawx le coq saw haeuj daeh bae. Couh vihliux gyanghaemh ndaej daj ndawde ra ndaej “gim”——Saeh angq ceiq hung ciuhvunz gou couhdwg yawj saw, cij mboujguenj bouxwnq baenzlawz yawj ne!

Hwnz diemj daeng doegsaw aen sibgvenq neix, gou dwg seiz iq da raen daxboh gaenx yawj saw seiz couh menhmenh baenz gvenq.

Daxboh dwg bouxguhnaz, miz seiz youh bae bang vunz veh doz、hwnq ranz, gaenx guh dangqmaz. Dou lij iq seiz, doegsaw caengz yungh maz cienz, de mbaet gwn mbaet yungh, gij cienz mbaet roengzdaeuj cungj aeu bae cawx saw caeuq dingh bauqceij. Aen gyaqsaw daxboh dwg aen gvih iq daxgoeng doq hawj, ndawde cungj cang rim baenz baiz baenz baiz saw caeuq baenz daeb baenz daeb bauqceij. Daxboh moix ngoenz bae guhhong dauqma yietnaiq seiz, cungj haengj ninz youq gwnz eijfaexcuk yawj saw, seizhaenx gij naetnaiq de couh hoenz siu fwj sanq lo.

Doeklaeng, dou geij beixnuengx cungj okrog bae doegsaw, moix hag- geiz cungj aeu yungh haujlai cienz, daxboh mbouj caiq rom ndaej cienz bae cawx saw lo. Raen gij saw caeuq bauqceij daxboh mbouj vuenh moq, ciemhciemh bienq gaeuq hwnj mwt, lumj boux baenz bingh noh heu noh henj, mbouj miz saekdi senggei, dou cungj sim’in dangqmaz.

Gou bae doeg swhfan seiz, ceiq haengj bae duzsuhgvanj cimq, ndaej youz youq ndawhaij cihsiz cij onjsim. Couhdwg mwhhaenx gou rom ndaej haujlai saw cih miz yungh, vih baihlaeng dang lauxsae caeuq sij faenzcieng dajgiek.

Bizyez le, gou couh ndaej faenboiq daengz ndawyienh aen Mbanjcuengh iq gyae’gyae ndeu bae dang lauxsae. Mwhhaenx gaenq dwg 21 sigij lo, hoeng gizhaenx dwg mbanj iq ndawbya, caengz ndaej doeng raemx doeng dienh, gwn raemx aeu bae henzdah song bak mij gyae rap, gyanghaemh diemj daeng’youzhaeu.

Ndawmbanj gij ranzyouq Boux- cuengh cungj dwg 20 sigij 50 nienzdaih hwnq baenz, dwg ranzvax daem ciengz. Ranzranz bakdou rox- naeuz mbaeklae cungj dap miz gij rinheu raezrangrang youh gumh- gumh gemxgemx. Bouxcuengh cingh- seuq lauxsaed, gij swnghhoz fuengsik genjdanh.

Mwhhaenx gou youq ranzvax ndaw hagdangz. Gyangngoenz hwnj- dangz, gyanghaemh rap raemx、gwn ngaiz、 swiq ndang le, couh diemj daeng’youzhaeu bei go、 gaij cozyez. Danghnaeuz lij miz di seizgan, couh ra gij saw duzsuhsiz daeuj yawj——Neix dwg aen fuengfap gaen ndaej seizdaih, mbouj caeuq sevei duet hoh ndeu, hix dwg aen fuengsik gag diuzcez bonjfaenh, gaij mbwq youh cungsaed.

Cungj saedceij neix, baez yaep da, couh gvaqbae roek bi. Gij sibgvenq gou hix yingjyangj daengz haujlai hagseng. Gyoengqde roxnyinh doegsaw gig mizyinx, cij aeu miz di seizgan, couh geuj humx gou gangjgoj, mizseiz raen gou miz gij saw mizyinx, lij gouz gou ciq yawj, haeuj maez、vaiqvued dangqmaz.

Mbouj geij nanz, gou diuh daengz aen hagdangz moq, gunghcoz vanzging caeuq diuzgen cungj ndei lai lo. Dang hagdangz lingjdauj le, hong lai nyaengq lai, gij hong yienghyiengh cungj aeu yungh dennauj daeuj guh. Gou couh haeujsim hag yungh dennauj, ciengzseiz lij aeu gyaban dem, caen mbouj miz banhfap faen ndang bae yawj saw lo.

Doeklaeng, vih fuengbienh gou youq ranz gyaban guhhong, gvan gou couh cawx aen dennauj ndeu hawj gou yungh. Daj seizde hwnj, gij gunghcoz caeuq swnghhoz sibgvenq gou cungj bienq lai lo. Haujlai cihsiz cungj doenggvaq vangjloz cazyawj、liujgaij、hagsib、ra aeu…… Gij cihsiz maz cungj miz, fuengbienh dangqmaz.

Gyoengqvunz yied daeuj yied baengh dennauj gunghcoz caeuq gvaq ndwenngoenz, danghnaeuz yaepyet mbouj ndaej yungh, couh lumj sawqmwh byaij roen loeng, roxnaeuz saet bae maz doxgaiq nei, gig mbouj cwxcaih.

Hoeng, doiq gou daeuj gangj, nanz mbouj ndaej doegsaw, aen hoenz couh lumj seiqlengq fouzyouz nei, engq hojsouh.

Couhcinj dennauj caiq fueng- bienh, hix dingjlawh mbouj ndaej gij saw naekna. Doegsaw mboujdan hawj gou cungsaed vuenheij, daezsang naengzlig, lij hawj gou sim dingh ndaej cingh, coih ndang ciengx ndang. Ndigah, baez ndaej hoengq, gou lij haengj bae yawj saw. Aen sibgvenq gyanghwnz doegsaw youh genhciz roengzdaeuj lo. Couh lumj bungz daengz baengzyoux ndei lai bi mbouj raen nei, habhoz youh angqyangz.

Sevei cingq fazcanj cinbu, seizneix vunzcaiz lai, ginghci hwng, doxceng hix yied daeuj yied haenq, simcingz hix gig yungzheih fouzfed mbouj onj.

Gou rox doegsaw ndaej hawj vunz guh vunz yied daeuj yied hableix, bungz saeh mbouj vueng. Ndawsaw sij naeuz “boux vunz gaijbienq mbouj ndaej vanzging, couh bae gaijbienq swhgeij; gaijbienq mbouj ndaej doenghbaez, couh bae gaijbienq seizneix; raeuz mbouj ndaej rox ngoenzcog, couh gvaq ndei ngoenz- neix; guh saeh mbouj itdingh yienghyiengh swnhleih, hoeng saeh- saeh caenhsim bae guh……” Caen dahraix, danghnaeuz byawz cungj guh daengz neix, aiq yienghyiengh swnhsim, saehsaeh habhoz lo.

Danghnaeuz mwngz ndaej hoengq couh lai doegsaw ba. Vunz ciuhgonq naeuz “ndawsaw gag miz ranz gim”, vah neix caen mbouj gyaj, gou couhdwg youq ndaw “ranz gim” neix mboujduenh ra ndaej “gim”, ndaej yiengjsouh gij vuenyungz seiqvunz. Gij “gim” neix youh lumj aen daeng yinx loh ndeu, mbouj dingz mbouj duenh ciuq rongh diuz loh seiqvunz gou!