Youq ndaw ranzcauq song aen rek iq doxdax hwnj fwi, faj naj Simjmehveij deng gij mokfwi gyuemluemz, gou laeglemx yawj de baez ndeu, gig siengj daj gwnz naj moengzloengz haenx ra ok gij saenzcingz cib lai bi gaxgonq de youq gwnzbya gvej nya roxnaeuz youq henzdah guhsaeg, hoeng gou ra mbouj raen gij saek riz ndeu, aiq hix cijmiz Aulungzgveiz yawj ndaej ok lo. Gou cij yawjraen de nyaeuq bwnda gig yousim, hawj gou hix yousim hwnj- daeuj lo.

Couh yienghneix mbouj oksing yawj rek biu fwi, doeklaeng nyaengq- nyatnyat bang Simjmehveij ndingq ywdoj ndaw rek iq hawj Ahveij gwn, gij yw naengj fwngz gwnz rek aeu baengz goemq le, hawj Ahveij cuengq lwgfwngz deng haeb haeuj ndaw bae naengj.

Ahveij ndawbak gyangz, mbouj dingz heuh “meh”, gou ndwn youq dangqnaj de, de yawj ndaej lumj beij gou lij iq geij bi nei, gizsaed gou caeuq de doengz bi cij ca geij ndwen ndwi.

Daihngeihngeih Fwt Bungz Yungyiemj

Daj ranz Ahveij byaij okdaeuj, simdaeuz gou lai soeng lo, ywdoj Aulungzgveiz hawj gou gig miz saenqsim, gou nyinhdingh Ahveij mbouj deng dai lo, ndigah yamqdin daegbied mbaeumbeng, yamq buet yamq diuq maranz, gou miz gij vah rim dungx aeu sikhaek lwnh hawj daiq, gou lwnh gij goj Aulungzgveiz gonq.

Daiq ndaejnyi gij goj gou gangj, riunyumnyum ngauzngauz gyaeuj, naeuz:

“Lungzbyauh caen rox bien goj.”

“Neix dwg gij saeh de ginglig gvaq ha.” Gou gangj.

“Mwngz hix gangj ndaej gig dawzyinx bw.”

“Daiq, neix mbouj dwg gangjgoj, cix dwg gangj gij saeh caen hane.”

“Gou mbouj saenq!”

“Mwngz mbouj saenq? Daiq!” Gou swenj hwnjdaeuj.

(caengz sat)