(Youh eu):

Bouxdoeg ngoenz mbouj you,

Diegyouq dangj guh hawj,

Gemjnoix gij hojcawq,

Hix mbouj lawq saek vunz.

Luz Hungzlingz (dingq ndaej ngaezngwd- ngwd, naeuz): Seizneix seizdaih moq, gaenq byaij haeuj hwngfat lajmbanj, gvaq mbouj nanz, lajmbanj engq gyaeu!

(Ciep eu):

Yamq haeuj seizdaih moq,

Guekcoj lajmbanj gyaeu,

Yawjyawj aen mbanj raeuz,

Va’ngaeux hawj vunz maez.

Lij Hungz (najhai eu):

Ranzranz miz ci miz laeuz youq,

Raemxsaw ndoi gyaeu gyoengqvunz maij,

Vwnzdij sezsih caez youh lai,

Bouxboux najhai riunyumnyum.

Yangz Ginh (sim’in naeuz): Binghraq gyuek lajmbwn gwnzbiengz, rogguek dai le haujlai vunz. (Dingz yaepyet, cij naeuz) Hoeng, guek raeuz aen- dangj fuengzre eiqsik giengz, banhfap lai youh ak, yw ak vunz engq ak, dieg raeuz cungj caengz miz saek vunz deng gyuek ne, neix gangjmingz aendangj raeuz caen hungmbwk ha!

(Ciep eu):

Beixnuengx mbouj simvueng,

Caezhoz fuengz binghraq,

Bakmbanj miz diemjgaz,

Gizgiz caz ndaej ndei.

Hauhlingh fat ok seiz,

Guh ndaej ndei dahraix,

Bouxboux mbouj doeknaiq,

Seiqgyaiq haenh mbouj dingz.

Yangz Siengz (angq ciep gangj): Gij banhfap hoenx binghraq gangj hawj rogguek, gij yizmyauz dingj binghraq soengq daengz rogguek. Neix hix gangjmingz aendangj raeuz caen hungmbwk ha!

(Ciep eu):

Lajbiengz gyuek binghraq,

Fuengzre ca ndaej ndei,

Hoenxciengq binghraq ndei,

Lwgminz meiz(miz) maqmuengh.

Yangz Gvangh (angq naeuz): Dangj raeuz guh ndaej ndei raeuh ha!

(Ciep eu):

Bak bi guek bienq fouq,

Mbouj you gwn caeuq daenj,

Maenh’ak gyoengq vunz raen,

Ruz youq mbwn cwxcaih.

Yangz Ginh (ngaekngaek gyaeuj, eu):

Dangj hwngfat lajmbanj,

Lwgminz angq dangqmaz,

Ndaem faex youq gwnz bya,

Ndaw dah bya hix angq.

(Ngeix le ngeix, youh eu):

Seiqgyaiq gvi bouxcoz,

Vih guekcoj hwnghoengh,

Aeu noix byaij roen loeng,

Cungj aeu riengz dangj byaij.

Yangz Siengz(simhai naeuz): Daxgoeng mwngz gangj ndaej ndei.

(Gangj sat youh eu):

Vih cienzmienh fukhwng,

Wng roemx baefofo,

Daengx guek caez cauhmoq,

Guekcoj dingh fouqgiengz!

Luz Hungzlingz (riunyumnyum naeuz): Daeggvangh, roengzrengz doegsaw, vih guek cauh ngoenz moq bw.

Yangz Gvangh(angq naeuz): W! Ndei.

(Hab eu):

Vih guekcoj fouqgiengz,

Comz rengz roemx baenaj,

Raeuz miz aendangj daz,

Diemj namhsa bienq gim.

（2 sat）