7 nyied 1 hauh, beixnuengx Yanghgangj youq Hocouh youq Cunghsanh Yen Hungzvah Funghgyangh Swnghdaiyenz caeuq vunzlai dangdieg doxcomz giz ndeu, guh hozdung haenh aencingz dangj、lwnh cingzngeih、naeuz hwngfat, ciengq go diuq foux angqhoh laeb dangj 101 hopbi caeuq Yanghgangj gvidauq 25 hopbi.

Mwh hozdung, aen doih foux saeceij bouxcoz Hungzvah Cin biujyienj 《Saeceij Diuq Foux Haenh Biengz Hoengh》, Hungzvah Cin Baujloz Youwzyenz biujyienj lwgnyez diuq foux 《Nyezrauh Cungguek》, aen duenz caijdiu Mwzlingj Cunh biujyienj 《Liuz Sanhcej》 daengj cezmuz ndei yawj, hawj bouxyawj yienhciengz dopfwngz haenh ndei. Beixnuengx Yanghgangj youq Hocouh caeuq vunzlai gak cuz Cunghsanh habciengq 《Gou Gyaez Mwngz Cungguek》 《Naedcaw Baihdoeng》 hawj hozdung yienhciengz gyalai nauhyied.

Gouj bi gaxgonq, Hungzvah Funghgyangh Swnghdaiyenz dieg youq Hungzvah Cin Mwzlingj Cunh lij dwg gaiq dieg fwz ndeu, seizneix gaenq bienqbaenz aen dieg lijyouz lajmbanj seiq singgaep Gvangjsih comz yawj gingjsaek、youqndwi gvaq ngoenzgyaj、 youzraemx、 gai gaiqgwn guh’angq、lienhndang ciengxndang youq itheij. “Daengz Cunghsanh Yen cauhnieb yaek gouj bi lo, dou caeuq vunzlai dangdieg cingzngeih ndei dangqmaz, gizneix couhdwg aen mbanjranz daihngeih dou, mboujlwnh bungz daengz hojnanz geijlai lai, dou cungj miz saenqsim bae gaijgez de. ” Boux giyezgyah mbwk Yanghgangj、Cunghsanh Yen Veilungz Nungzyez Fazcanj Youjhan Gunghswh Hungzvah Funghgyangh Swnghdaiyenz cungjginghlij Vei Sienghbingz naeuz, de yaek daiq engq lai boux giyezgyah Yanghgangj daengz Cunghsanh Yen roengzgoek, guh hung guh ak “vwnzlij+nungzlij” canjnieb, hawj engq lai vunz dangdieg ndaej gwn duix haeux lijyouz, byaij hwnj diuz roen baenzmiz.

(Liu Cauhvwnz Mingz Mingz)