Caeklaiq baengh daxboh, gou ciuhneix cij rox Sawcuengh.

Bihaenx gou ndaej roek bi buenq, ngoenzhaenx guhcaemz haeuj ranz couh caeuq daxboh naeuz:“Boh, ngoenzneix gou raen meh Dahciu bae haw cawx aen daehsaw moq he hawj de, naeuz haihag couh hawj de aemq bae hagdangz doegsaw lo. Gou mbouj siengj boux ndeu youq ranz guhcaemz, gou hix aeu caeuq Dahciu guhdoih bae doegsaw.”

Daxboh muenghmuengh gou, ngaemgyaeuj naemj yaep ndeu, naeuz:“Lwg ha, dingqnaeuz bimoq haeujhag ndaej doeg Sawcuengh, caeuq Sawgun doengzseiz hag, mwngz bineix ngamq ndaej roek bi buenq, bimoq haeujhag hix mbouj suenq geq.”

Dingq daxboh baenzneix naeuz, gou ngoenzngoenz muengh bimoq daeuj daengz vaiqdi. Lwgnyez mbouj rox guh maz hong, bingzseiz daxmeh heuh gou dawz buhvaq cihgeij bae henzmboq hag saeg buh, mizseiz hix gyaep cib lai duz hanq bae henz goengloh gwn nywj. Daxmeh naeuz:“Lwgnyez daj iq aeu gaenxguh, vunz iq guh hong iq, mwngz ngoenznaengz hag saeg buhvaq cihgeij gonq, caeuq gyaep duzhanq bae ciengx couh ndaej lo.”

Ngoenzngoenz hag saeg buh, ngoenzngoenz gyaep bang hanq he bae ra gwn, gijneix cungj hawj gou roxnyinh gig mbwq, gou seizseiz naemj bae hagdangz doegsaw, naemj bae hag Sawcuengh.

Hagdangz couh youq bakmbanj, gyoengq bouxlaux ngoenznaengz guh- hong haeuj ok cungj aeu gvaq gizde, gou ngoenznaengz bae henzmboq saeg buh, roxnaeuz gyaep gyoengq hanq bae henz goengloh ra gwn hix aeu byaij gvaq gizde. Lwgnyez rengz iq, gij buhvaq saeg ndaej nyaenj mbouj ok raemx geijlai, riuj aen doengjbuh gig naek, youq gwnzloh mbouj rox yietnaiq geijlai baez cij daengz ranz. Mizseiz riuj doengjbuh daengz hag- dangz, dingqnyi gyoengq hagseng youq ndaw gyausiz doegsaw、ciengq go sing goksadsad, gou baez vut doengjbuh couh buet gvaqbae, song fwngz gaemdawz sejcueng, ndiengq byaidin muengh haeuj ndaw gyausiz bae. Raen Dahciu caeuq gyoengq doengzhag de naengh youq gizhaenx dingq lauxsae gangjgoj, gou hozhaenz raixcaix.

Raen gou boemz youq gwnzcueng haujlai nanz mbouj deuz, lauxsae byaij gvaqdaeuj naeuz:“Dahnyaeq, mwngz baema ranz gonq, daengz bimoq couh ndaej haeuj hagdangz doegsaw lo.”

Dingq lauxsae baenzneix gangj, gou engq muengh ndwenngoenz gvaqbae vaiqdi, muengh bimoq vaiqdi daeuj daengz.

Cungj muengh ndaej haeuj hagdangz doegsaw lo, caen lumj daxboh gangj yienghhaenx, lauxsae son Sawgun, hix son Sawcuengh dem. Doengxhaet romhdoeg, lauxsae son dou doeg Sawcuengh singmeh caeuq yinhmeh. Lauxsae naeuz:“Raeuz hag rox doeg sug gijneix gonq, gvaqlaeng cujswz、cauxgawq couh ngaih lo.” Haethaet cuengqsing doeg, ngoenz- ngoenz gaem bit lienh sij, mbouj rox hix rox lo. Hwnj dangz yijvwnz, lauxsae heuh dou dawz Sawgun Sawcuengh song bonj saw caez baij youq gwnz daizsaw dox doiqciuq, son dou rox Sawgun aen swz neix、gawq vah neix Sawcuengh baenzlawz doeg baenzlawz sij; roxnaeuz Sawcuengh aen swz neix、gawq vah neix Sawgun baenzlawz doeg baenzlawz sij. Ngoenznaengz hwnjdangz guh song yiengh hong, gou roxnyinh lauxsae gig sinhoj.

Gou haeujhag ndaej doeg Saw- cuengh, seizhaenx hix miz Sawcuengh hagdangz lauxsae roengz mbanj daeuj, doengxhaemh son gyoengq bouxlaux ndawmbanj hag Sawcuengh, naeuz hawj lajmbanj bouxboux rox Saw- cuengh. Daxboh hix angqfwngfwng bauqmingz bae hag Sawcuengh, baez daih’it gaujsi couh ndaej goujcib roek faen, de roxnyinh engq miz yinxdaeuz lo. Daxboh ciengzciengz dawz bonj Sawcuengh lauxsae fat hawj haenx, heuh gou doeg hawj de dingq.

“Duznou lau duzmeuz, vaiqvaiq deuz bae ndoj, duzmeuz riuhoho, haeuj gyawz ndoj ndaej ndei. Gizneix lij miz vahbeij ne, gvaq giuz gaej lumz dwngx, gvaq dwngj gaej lumz so……” Doeg sat, daxboh lumhlumh aen gyaeuj gou, riu naeuz:“Lwg ha, Sawcuengh dwg cihsaw Bouxcuengh raeuz, mwngz aeu nyinhcaen bae doeg bae hag bw.”

Doeg daengz ngeih nienzgaep, gou caeuq dah doengzhag he ndaej camgya aen doxdax doeg Sawcuengh ndawcunh, doeklaeng youh ndaej bae yienhsingz camgya doxdax. Daxboh gig angq, daegdaengq gwih danci doz gou bae haw cawx dauq buhvaq moq he hawj gou daenj bae yienhsingz. Geu vaq saeklamz, geu buh saekhoengz, geu buh najaek lij siuq miz song duj va, ndeiyawj raixcaix.

Youq yienhsingz camgya doxdax doeg Sawcuengh seiz, gou ndawsim miz di gaenj, doeg mbouj ndaej baenzlai cih, mbouj ndaej bae Namzningz camgya gij doxdax doeg Sawcuengh lo. Hoeng gou mbouj doeknaiq saekdi, gvaqlaeng laebdaeb roengzrengz hag Sawcuengh.

Lauxsae ciengzciengz fat《Sam Nyied Sam 》caeuq 《Gvangjsih Minz- cuz Bau》 hawj dou yawj, lij doeg gij faenzcieng ndei hagseng iq ndaw《Gvangjsih Minzcuz Bau》hawj dou dingq. Gou naemj: Bouxwnq baenz- lawz rox sij gijneix, caiqlix sij ndaej baenzneix ndei ne? Mbouj nanz gou hix aeu hag sij di cijndaej.

Ngeih nienzgaep haggeiz Saw- cuengh gaujsi, mbaw gienj baihgwnz gij daezmoeg ciemq roekcib faen, gou cungj guh sat lo, baihlaj miz diuz daez ndeu dwg sij cozvwnz, heuh sij 《Ranz Gou》, ciemq seiqcib faen. Gaxgonq lauxsae yienznaeuz nanz mbouj nanz doeg gij faenzcieng ndei Sawcuengh hawj dou dingq, hoeng cix caengz son dou baenzlawz sij cozvwnz gvaq. Seizneix, gou mbouj rox baenzlawz guh, naemj haujlai nanz, da yawj couh yaek daengz seizgan lo, couh youq gwnzde sij hangz cih ndeu——Ranz gou miz duz gaeqboux hung ndeu.

Seizhaenx lauxsae cungj dwg doxvuenh daeuj genhgauj, lauxsae hagdangz dou bae hagdangz wnq genhgauj, lauxsae hagdangz wnq daeuj hagdangz dou genhgauj. Gauj sat le, gij mbaw gienj couh dawz bae ndawcunh ce gonq. Cienzbouh gaujsi sat le, gyoengq lauxsae caez comz youq gizde yawj gaij mbawgienj.

Mwh yawj daengz mbaw gienj gou, lauxsae hagdangz wnq naeuz:“Boux hagseng neix cujswz cauxgawq daengjdaengj rim roekcib faen, cij dwg baihlaj diuz daez cozvwnz neix ciemq seiqcib faen ngamq sij coenz vah ndeu, mbouj ndaej faensoq.”

Lauxsae gou naeuz:“Haggeiz laj sam nienzgaep cij son gyoengq hagseng sij cozvwnz, byawz rox haggeiz neix gaujsi daezgonq aeu sij ne, sij coenz vah ndeu hix wngdang ndaej di faensoq.”

Lauxsae gou baenzneix gangj, gyoengq lauxsae sikhaek lwnh- foenfoen, mbangj naeuz cozvwnz sij mbouj sat, faen ndeu cungj mbouj ndaej; mbangj naeuz gaxgonq caengz hag sij gvaq, mbouj hawj di faensoq mbouj goengbingz. Lwnh bae lwnh dauq, doeklaeng gyoengq lauxsae gietdingh hawj gou gya cibfaen, mbatneix gaujsi gungh ndaej caetcib faen, dwg ndawban gauj ndaej faensoq ceiq sang lo.

Daengz sam nienzgaep, lauxsae hainduj son dou sij cozvwnz, aeu Sawgun sij hix aeu Sawcuengh sij. Seizhaenx ndaw hagdangz miz haujlai bonj saw Sawcuengh youq rog goq doeg, lauxsae naeuz:“Sou daeuj gou gizneix dawz saw bae yawj, yawj lai doeg lai faenzcieng cij sij ndaej ndei.” Gou hix bae caeuq lauxsae aeu geij bonj saw daeuj yawj, lumj gomiuz ndaej nditndat ciuq rongh, ndaej raemxraiz daeuj rwed nei, gou rox haujlai doxgaiq gwnzdangz caengz hag gvaq, roxnyinh citgeiz raixcaix.

Bae Sizmwnz Cunh doeg seiq nienzgaep le, lauxsae moix aen singgeiz heuh dou sij bien cozvwnz ndeu. Baez daengz dangz cozvwnz, lauxsae cungj doeg cozvwnz gou hawj gyoengq doengzhag dingq. Lauxsae ban wnq hix doeg cozvwnz gou hawj hagseng ndaw ban de dingq, naeuz sou aeu caeuq bouxsij iq neix hagsib. Yienghneix gou dauqfanj roxnyinh gig najmong, nyinhnaeuz hag cihsiz fouz bien fouz haenz, rog bya miz bya, rog vunz miz vunz, mwngz naeuz mwngz ak, lij miz boux beij mwngz engq ak, laebdaeb roengzrengz bae hag cijndaej.

Doeklaeng, gou okrog bae guh- hong ra gwn lo, ndaejhoengq couh aeu Sawcuengh sij di faenzcieng, douzgauj hawj cazcise caeuq bause. Guhhong ndaejhoengq saekseiz, gou ciengz- ciengz vix gwnz mbaw ngaenzceij caeuq gyoengq doengzdoih naeuz:“Sou yawj, gizneix hix miz cihsaw Boux- cuengh raeuz ne.”

Gyoengqde roxnyinh citgeiz, cungj humx gvaqdaeuj gangjcaca. “Hangz cih neix baenzlawz doeg ne？Mwngz doeg hawj dou dingq.” Miz vunz naeuz.

“Cunghgoz Yinzminz Yinzhangz it maenz!” Gou sing hung doeg.

“Hahaha, Bouxcuengh caen ak!” Gyoengqvunz sing riu goksadsad. Seizneix, gou roxnyinh ndaengndiengq raixcaix, hix roxnyinh cihgeij ciuhneix caen liz mbouj ndaej Sawcuengh lo, cawz le lai yawj lai doeg lai sij, hix aeu caenhrengz hawj daengxbiengz rox gij cihsaw raeuz.

Geij bi neix, gou miz caijsoq ndei ndaej caeuq geij boux lauxsae gig miz dungxcaiz caeuq bause ciemdingh guh canghraiz, roxnyinh diuz rap gwnzmbaq engq naekgywg, hix rox- nyinh gig miznaj. Seizneix, gou youh naemj hwnj daxboh. Danghnaeuz daxboh lij youq couh ndei lo, hoeng de gaenq biek gou bae cibgeij bi lo, danghnaeuz de ndaej rox gijneix, itdingh gig angq bw!