Fangzcwngzgangj Si Mbanj- sangyi youq laeng dieg henzguek Cungguek, gyawj Yeznanz, baih- namz Sizvan Dasanh. Dwg aen mbanj lai aen singq、lai aen minzcuz ndeu, miz Bouxcuengh、Yauzcuz、Bouxgun daengj minzcuz ciuhdaih youqdingh. Caetcib lai bi doxdaeuj, ranz Linz Cwngzbauj sam daih vunz cungj guh boux cihsuh ndawmbanj, caenh naemj hen ndei Mbanjsangyi, daih ciep daih doekrag ndawmbanj, bang vunzlai bienq fouq baenzmiz.

Linz Denhyou dwg daxgoeng, aenvih de cingqheiq、guhsaeh goengbingz, bi 1955, vunzmbanj couh senj de guh boux duicangj swnghcanjdui、boux cihsuh ndaw- mbanj. De guh cihsuh ndaej haj roek bi, caenh naemj caeuq vunzlai guhsaeh, vunzmbanj cungj haenh de ndei.

Linz Sisungh dwg daxboh. De guh gvaq donzcihsuh、nungzgiyenz、boux baizcangj minzbingh, bi 1979 laeb le sam daengj goeng. Bi 1993 daengz bi 2005, vunzmbanj senj cihsuh, de couh daj nungzgiyenz bienqbaenz boux cihsuh ndawmbanj. Bi 1994 ngoenz ndeu, gij raemxrongz Raengzfaexreiz Mbanjsangyi caengz roengz, dahsau iqet ndeu deng raemxrongz cung deuz, caeklaiq miz vunz byaij gvaq henz raen le, doq gouq hwnjdaeuj. Daj neix doxbae, Linz Sisungh gietsim caeuq ndaw- mbanj hwnq giuz. Couh yienghneix, de daiq vunzlai daengx mbanj guh le ca mbouj geijlai buenq bi, couh hwnq baenz diuz giuz raez cib lai mij、gvangq seiq mij ndeu. Seiq bak lai vunz ndawmbanj baedauq couh anhcenz lai lo.

Linz Cwngzbauj, bi 1995 cungcien bizyez couh ma mbanj dang ganbu, bi 2008 ndaej guh boux cihsuh Dangjcihbu ndawmbanj. Cib geij bi doxdaeuj, Linz Cwngz- bauj ndaej okbae guh seng’eiq ra ngaenz, hoeng, de gag roxnyinh daiq vunzmbanj duetgungz baenzmiz hwnqguh ranzmbanj engq miz cingzcik. De couh dazyinx daengx mbanj ra roen guh swnghdai dajciengx, vat daemz ciengx bya、gungq. Vunzmbanj baengh neix ndaej baenzmiz. Mwh de guh boux duicangj “aen doih lienzfuengz cunzbyaij”, guh hong hensouj henz- guek ndei gvaq vunz, bi 2012 lij bae Baekging camgya “Aen Hoih Hong Henhoh Henzguek Onjdingh Daengx Guek”. De haenh naeuz：“Guekgya maenh’ak, hawj vunzlai youq henz- guek ndaej miz baengh.”

（Gvangjsih Minzcuz Yenzgiu Cunghsinh hawj gauj）