Ndawsim gou gig ndaet, siengj mbouj ok vah maz daeuj nai de.

Youq bingzciengz, lauxsaed gangj, gou saedcaih mbouj gyaez Ahveij geijlai, de miz di gvaiq caemhcaiq gig baetniuj, caeuq dou caez guhcaemz, doengh mbouj doengh couh gangj “gou aeu maranz lwnh hawj daxmeh gou”, mboujnex couh- dwg “daxmeh gou gangj”. Ndigah caezgya cungj maij daeuq de nyex de, de lij caengz haibak, dou couh doxciengj ngw gij vah de:“Gou aeu maranz lwnh hawj daxmeh gou!” Hixnaengz engq manz di couh yienghneix gik de:“Mwngz maranz bae lwnh hawj daxmeh mwngz ba, dou youq gizneix deq!”

De cungj hozgaek ndaej daengx naj hoengzfwdfwd, raemxda lae- nyangnyang, gou couh yawj mbouj hwnj de yienghneix, lumj mbouj miz di goetheiq, ndaej cibgeij bi lo lij daj rongh daengz laep venj daxmeh youq henzbak, gyawz lumj lwgsai ne? Hoeng, seizneix de deng ngwzdoeg haeb lo, ninz youq gwnzcongz, hawj gou lumz gij mbouj ndei doenghbaez de, caemhcaiq dauqngeix gij saeh de bungz, ngamq rim ndwen daxboh de couh deng goenjcug hwnj bya bae, doeklaeng song bi lai yienznaeuz daxboh de ndaej dauqma lo, cix ndaej binghnaek, cengq le bi lai, dauqdaej caen hwnj bya bae lo, ciengxlwenx hix mbouj dauq lo.

Doengh bi neix daeuj caeklaiq Simjmehveij souj maiq ganq lwgdog, ciengx Ahveij hung, baenzneix ngeix, mboujdan Ahveij mingh hoj, Simj- mehveij hix caen mingh hoj ha!

“Mbouj youqgaenj, gij ywdoj Aulungzgveiz gig ndei.” Gou ngeix daengz song coenz vah daeuj nai de.

“Gou rox, de gaenq deng ngwz- doeg haeb gvaq, doengh bi neix daeuj, de gig haemz ngwzdoeg, itdingh dwg yienghneix.”

“W, de lij gwn ngwzdoeg dem ne.”

“O!”

Simjmehveij ngiengxgyaeuj yawj gou baez ndeu, youh ngaemgyaeuj bae beiz feiz ndawloz, aen rek gwnzloz gaenq biu fwi lo. Gou doq oet bog nya hawq daengz ndawcauq bae, ngiengx- gyaeuj yawjyawj gvaengx farek gwnzcauq, hix hainduj biu fwi fedfed lo, gou roxnyinh vuenheij dangqmaz.

(caengz sat)