Seizgan: Ngoenz ndeu Yangz Gvangh caeuq bohmeh ma ranzcoj

Diegheiq: Gyanghongh ranzcoj Yangz Gvangh

Boux ndawheiq: Yangz Gvangh

Yangz Ginh——Daxgoeng Yangz Gvangh

Lij Hungz——Daxbuz Yangz Gvangh

Yangz Siengz——Daxboh Yangz Gvangh

Luz Hungzlingz——Daxmeh Yangz Gvangh

Haimuq: Yangz Ginh、Lij Hungz、Yangz Siengz、Luz Hungzlingz caeuq Yangz Gvangh humx naengh youq daizrin gyanghongh ranzcoj, gwnz daizrin baij miz di gijgwn.

Yangz Gvangh (riunyumnyum, eu):

Bineix ma ranzcoj,

Boux ranz hoj duetgungz,

Ndwenngoenz bienq vuenyungz,

Gij ranz hung youh gyaeu.

Yangz Siengz (unqswnh naeuz): Daeg- gvangh, lajmbanj bienq gyaeundei, cienz baengh dangj dazyinx.

(Ciep eu):

Gungcanjdangj dazyinx,

Minz yamq din bae gaen,

Miz cauhmoq cingsaenz,

Gwndaenj caen mbouj heiq.

Yangz Ginh (sim’angq naeuz): Dwg ha!

(Ciep eu):

Ndaem naz dangj hawj ngaenz,

Coengzlaiz caengz raen gvaq,

Guh mieng yinx raemx ma,

Nazhaeux ndaej fungsou.

Lij Hungz (hix angq naeuz): Mboujdan yienghneix, canjnieb hix ndaej hwng.

(Ciep eu):

Ndaemciengx miz diepbouj,

Gungz bienq fouq mbouj nanz,

Bae gunghcangj hwnjban,

Goenglan hix sim’angq.

Yangz Ginh (najhai naeuz): Seizneix ndwen- ngoenz miz baujcang, vuenyungz dahraix!

(Ciep eu):

Bingh ndaej yw mbouj heiq,

Dangj geiq maenh simnduj,

Daegbied boux gungzhoj,

Mbouj lau nguh baezlaeng.

Geq miz bang miz ciengx,

Ansim yiengj vuenyungz,

Aen ranz ndaej hwnghoengh,

Bouxboux cungj angqyangz.

Yangz Gvangh(simhai naeuz): Seizneix ranz- ranz hwnj ranzlaeuz, gij ndwenngoenz gyoengq vunzmbanj caeuq boux vunz ndawsingz ca mbouj geijlai lo.

Yangz Siengz (gikdoengh naeuz): Dwg ha, guek fouq minz ndaej yiengj.

(Ciep eu):

Guek fouq minz yiengjsouh,

Bienq fouq roen miz lai,

Bouxboux angq najhai,

Daihdaih haenh aen dangj.

Lij Hungz (angq eu):

Bouxhoj hwnj ranz moq,

Mbouj gangj boq saek coenz,

Dangj hawj ngaenz bangcoengh,

Bouxgungz cungj angqyangz.

(Angq naeuz): Seizneix gij lwgnyez ndaej yiengj fukheiq lai lo.

(Ciep eu):

Lwgnyez bae doegsaw,

Ndaej ndeicawq haujlai,

Faen ngaenz mbouj yungh hai,

Lij miz ngaiz gwn ndwi.

Bae doegsaw ndaej ngaenz,

Caen dwg caengz raen gvaq,

Bouxhoj riuhaha,

Ra ngaenz rap gemjnoix.

(Hozswnh naeuz): Gij bouxdoeg baengh aen dangj yiengj gij fuk mbouj liux.（1）