Denzyangz Yen miz cungj swxva gyaeundei ndeu, swx neix dwg aeu ganjmeg daeuj san baenz, ndigah heuhguh swxva ganjmeg. Gij dinfwngz maenhndei neix byawz raen byawz haenh, mingzdaeuz de cienzdoh daengx guek, lij “byaij” ok rogguek bae dem.

2018 nienz, swxva ganjmeg Bouxcuengh Denzyangz ndaej haeuj Gvangjsih Bouxcuengh Swcigih Buek Daihcaet Feihvuzciz Vwnzva Yizcanj Daibyaujsing Mingzloeg. Vih- neix vunz Denzyangz roxnyinh gig miznaj.

Canghsan swxva ganjmeg coh heuhguh Liengz Siuginz, dwg vunz Denzyangz Gih Bahbez Yangh Mbanjsanhboh, ndaej roekcib lai bi lo, dinfwngz san swxva ganjmeg de seizneix caengz miz byawz beij ndaej. Seizneix de dwg bouxcienzswnj san swxva ganjmeg sengjgaep feihvuzciz vwnzva yizcanj.

San swxva ganjmeg Mbanjsanhboh lizsij gaeuqgeq, vunz mbanj neix itcig cienzswnj gij dinfwngz san swxva ganjmeg daengz seizneix.

Liengz Siuginz ngamq ndaej cibngeih bi couh hainduj riengz vunzmbanj hag san swxva ganjmeg. De ukgyaeuj gvai、cikfwngz lingz, gig vaiq couh hag ndaej rox baenzlawz san lo.

Baengh gij dinfwngz maenhndei de, 1972 nienz, Denzyangz Yen Vaimougiz ciu de haeuj ndaw bae guhhong, hawj de daiq bang mehmbwk san swxva ganjmeg. Faenh hong neix de maijgyaez dangqmaz, hix gig insik.

De haeujsim bae son caemhcaiq yiemzgek iugouz. Gij swxva ganjmeg gyoengqde san haenx gyaeundei raixcaix, ndaej aeu daeuj cang doxgaiq, youh ndaej guh gunghyibinj daeuj baij. Gij swxva ganjmeg neix dawz bae gak sengj ndawguek canjlanj, vunzlai yawj le haenh ndei. Miz di vunz diegrog lij daeujdaengz Mbanjsanhboh caenda yawj gyoengqde san roxnaeuz caeuq gyoengqde hag san dem.

Gij swxva ganjmeg gyaeundei neix mboujdan youq ndawguek gai ndaej ndei, lij gai bae daengz rogguek.Vunz rogguek raen le, gig doeksaet, da daengx bak aj, daengj lwgfwngzmeh hemq naeuz:“Gyaeundei lai lo! Gyaeundei lai lo! Goengfou Cungguek sou maenh’ak, gij dinfwngz Cungguek sou engq maenhndei!”

Engq hawj dou miznaj dwg, 70 nienzdaih, Denzyangz Vaimougiz aeu ngeihcib caet aen swxva ganjmeg bae vuenh ndaej aen cunghhingz dohlahgih Suhlenz canj. Seizhaenx, saeh neix dwg gienh saeh citgeiz ndeu, gingdoengh daengx guek. Haujlai vunz nanz siengjsieng ngeihcib caet aen swxva ganjmeg gingqyienz vuenh ndaej aen cunghhingz dohlahgih ndeu, lumj guhloq nei. Denzyangz Vaimougiz ndaej daengz baihgwnz lingjdauj haenh ndei. Daengx guek vunz vih gienh saeh neix roxnyinh miznaj dangqmaz.

Mingzdaeuz gyoengq mehmbwk san swxva liuz doh daengx guek, neix hawj gyoengqde engq miz saenqsim bae san swxva ganjmeg lo.

70 nienzdaih dwg duenh lizsij ceiq ronghsag ceiq miznaj gyoengqde. Cig daengz seizneix, baez dwen daengz gij saeh seizhaenx, gyoengqde lij angqvauvau, lumj dwg saeh ngoenzlwenz nei.

Hojsik ha! Lai bi gvaqlaeng vaimoucan gaijsan lo, gyoengq mehmbwk san swxva haenx gak boux gag ra gwn. Bouxboux nyaengq ra gwn ra daenj, mbouj miz seizgan bae san swxva ganjmeg geijlai lo.

Hoeng, mboujguenj seizdaih baenzlawz bienq, ndwenngoenz baenzlawz bienq, gij simmaez san swxva ganjmeg Liengz Siuginz soqlaiz mbouj soeng gvaq, de genhciz ciepswnj gij dinfwngz san swxva ganjmeg. De youq ndawmbanj laeb baenz aen doih san swxva ganjmeg ndeu, ndawde miz bouxgeq、bouxcoz、lwgnyez. De sij ndaej son vunz, de naeuz:“Swxva ganjmeg dwg gij vwnzva Bouxcuengh raeuz, san de mboujdan dwg vih canh ngaenz, engq dwg aeu cienzswnj de、fatyiengz de、henhoh ndei de.

2017 nienz 10 nyied, Liengz Siuginz dawz swxva ganjmeg Denzyangz bae Aumwnz camgya Daihgouj Gaiq Guekgya Vwnzvacouh Gvendaengz Cungguek Caeuq Gij Guekgya Gangj Vahbuzdauzyaz.

2018 nienz 6-12 nyied, Liengz Siuginz dawz swxva ganjmeg Denzyangz bae Baekging、Denhcinh、Sinhcin camgya duihgaivei.

Gij mingzdaeuz swxva ganjmeg Denzyangz cienzdoh daengxbiengz, camgya gvaq gak dieg feihyiz vwnzva hozdung, camgya gvaq haujlai gij doxdax minzcuz vwnva caizyi, aen doih san swxva ganjmeg Mbanjsanhboh aeu ndaej haujlai cingzcik, ndaej vunzlai haenh ndei.

Haujlai vunz daj gak dieg daeujdaengz Mbanjsanhboh yawj、hag san swxva ganjmeg. Liengz Siuginz simhoengz son gyoengqde san. 2021 nienz, gyoengq hagseng Gvangjsih Gihden Yozyau caeuq Bwzswz Yisuz Yozyen daeujdaengz Mbanjsanhboh caeuq Liengz Siuginz hag san swxva ganjmeg, hawj gyoengq boux hagseng ndaej rox ndaej hag gij dinfwngz swxva ganjmeg.

Liengz Siuginz roxnyinh, swxva ganjmeg dwg gij vwnzva conzdungj gaeuqgeq Bouxcuengh raeuz, gij dinfwngz dajsan neix baenzneix maenhndei, aeu cienzswnj roengzbae, mbouj ndaej hawj de goenq.

Daj 2019 nienz hwnj, Liengz Siuginz daiq doih haeuj hagdangz bae son lwgnyez san swxva ganjmeg, cungdenj dwg youq Bahbez Siujyoz haiban. Gyoengq hagseng hag ndaej hwnjyinx dangqmaz. Seizneix, Bahbez Siujyoz hix miz aen doih iq san swxva ganjmeg ndeu, ndawde gaenq son ok haujlai canghsan iq lo.

Mbanjsanhboh miz aen fungsug ndeu, hwnj bya bae gouz fuk. Moix bi ngux nyied co’ngux ngoenzneix, bouxlaux couh hawj gyoengq lwgnyez ndawranz gak boux gag riuj aen swxva ganjmeg ndeu, ndawde cang miz gyaeq、gagaeq、gabit、faengxsamgak、mak daengj doenghgij gaiqgwn, hwnj bya bae gouz fuk, gouz bingzan、gouz ndangcangq、gouz roxsaw roxmaeg…… Youq gwnzbya, daihgya doxcomz youq dieg ndeu, aeu gwn gijgwn ndawswx liux bae, baenzneix aen swx neix couh bienqbaenz aen swx “fuk” he, doeklaeng cij gag riuj aen swx “fuk” bonjfaenh roengz bya, daiq “fukheiq” maranz. Swxva ganjmeg mboujdan ndaej cang doxgaiq, lij daiq fukheiq daeuj hawj Bouxcuengh raeuz.