Gou yienznaeuz mbouj rox maz heuhguh gyaeundei, cix rox ndeiyawj couhdwg gyaeundei, doenghbaez, baenzlawz mbouj roxnyinh Simj- mehveij maj ndaej baenzneix ndeiyawj ne? Vunzmbanj cij naeuz meh gou ndeiyawj, gou nyinhnaeuz Simj- mehveij yawj hwnjdaeuj cij dwg beij meh gou laux di ndwi, doengh bi neix daeuj de deng haemz deng hoj, goemq gij ndeiyawj de bae caez lo.

“Ahbyauh.”

De sawqmwh heuh gou, gou doq cienq lwgda yawj gizwnq bae.

“W!”

“Aulungzgveiz daengz ranz mwngz?” Simjmehveij mbouj baenq gvaqdaeuj muengh gou, gou youh yawj coh naj de, de lij nyenghnyengh cimyawj feiz ndawloz, lumj haxbaenh cam feiz mbouj dwg cam gou nei.

“De mbouj daeuj ha!”

“Baenzneix—— gij ywdoj neix dwg——”

“O, dwg youq gwnzroen, Aulungzgveiz heuh gou soengq daeuj hane.”

“De mbouj nyienh gag soengq daeuj?” Simjmehveij cam coenz vah neix seiz, lwgda daj feiz yawj coh gou.

Gou ndoj gij ronghda de, caiq oet diuz fwnz haeuj ndawcauq bae.

“Mbouj dwg, de naeuz gou buet ndaej vaiq.”

“O……”

Simjmehveij baez riunyumj, hoeng baez yaep da couh siu lo, lumj gij ronghfeiz ndawloz youq gwnz naj de yubyab nei.

“Aulungzgveiz dwg vunzndei lwi?” Gou mbeihung cam de, hoeng gij vah neix cix lumj cam bonjfaenh.

“Mwngz naeuz de dwg vunzndei lwi? Ahbyauh.” Simjmehveij youh ngaemgyaeuj cim feiz ndawloz, de caeuq gou doxdoengz, hix lumj cingq gag cam bonjfaenh.

Gou caen siengj gangj gij vei Aulungzgveiz okdaeuj, hoeng, baez ngeix, roxnyinh lwgnyez saedcaih mbouj wnggai bae dwen gij saeh vunzhung, cijndei ndwnj vah haeuj ndawdungx bae.

“Gou mbouj rox.”

“Ai!”

“Mwngz vihmaz danqheiq? Simjmehveij.”

“Ahveij mingh caen dwg hoj……”

(caengz sat)