Haemhlwenz roengz raq fwn ndeu, fwn seisaesae, lumj fagcim siuqva nei, dingzdingz duenhduenh doek youq ndawreih, youh lumjbaenz haujlai naedcaw daj gwnzmbwn vanq roengzdaeuj. Dingq gij sing fwn neix, gou youh ngeix daengz mwngz——gyaq ci iq gou.

Geiq ndaej bi haenx, gou caeuq gvan gou doengzcaez bae Namzningz ciep mwngz dauq. Seizhaenx mwngz lumj dahsau ndaej cibbet nei, yaek hai ok diemq gai ci seiz, boux lauxbanj dawz baengzhoengz venj youq song henz baihnaj mwngz, daengz seizndei le, de couh youq bakdou ndoiq aen lingz de, dou couh hai mwngz dauq- ranz lo.

Daeujdaengz ranz, dou heuh goengdauh daeuj guhmo, bauj mwngz cangqheiq bingzan.

Vihliux hawj mwngz miz congh dieg youq ndeu, dou cingj vunz daeuj lingh coih ranz baez ndeu, sai bae cibhaj ngoenz, ngaenzhong bae sam fanh lai.

Moix singhgiz it daengz singhgiz haj, gou gyanghaet couh hai mwngz bae hagdangz, haemh le youh doxcaez dauqranz. Vihliux mwngz mbouj deng dak ndit, gou youq gwnzvangj cawx benq baengz ndeu daeuj goemq mwngz. Gou caeuq mwngz lumj baengzyoux caezhoz nei, bouxlawz hix liz mbouj ndaej bouxlawz, yienghneix gvaq le seiq bi.

Miz haemh ndeu byonghhwnz, doek fwn gig daih, lumj aeu bat daj gwnzmbwn buet raemx roengzdaeuj nei. Gou ninz ndaej gig ndaek, moengzmoengz loengzloengz dingqnyi miz sing lwgnyez daejvauvau. Gou roxnyinh, aiq dwg daeglwg gou bingh lo, hai daeng yawjraen faj naj de hoengzmaemae, fwngz lumh gvaqbae, aen gyaeuj de ndatveuveu, gou gipmuengz dawz dijvwnhcinh daeuj rau, ndangraeuj miz 40.5 doh, fatndat lo.

Gou daenj buh ndei le, guh- muengz umj daeglwg hwnj ci couh hai bae yihyen. Youq ndaw fungh- gipgouq, daeglwg ndat ndaej genga hainduj hwnjgeuq bae. Canghyw naeuz:“Danghnaeuz mwngz daeuj nguh di dem, daeglwg mwngz couh nanz gouq lo.” Neix dwg goenglauz mwngz——ci iq, danghnaeuz mbouj miz mwngz, gou couh mbouj ndaej baenzneix vaiq bae yihyen, mbouj ndaej baenzneix vaiq bae yihyen couh gouq mbouj ndaej mingh daeglwg.

Geiq ndaej miz baez he, gou sinhcingj bingz guh boux lauxsae maenhndei ndawsi, ngoenzgonq gou gaenq dienz ndei biuj, yaek gyau bae ndawsi seiz cij fatyienh ndawbiuj miz di swhliu dienz loek lo, gou lienzhwnz hai mwngz bae hagdangz dienz biuj, cienz baengh mwngz lo.

Geiq ndaej bi 2019 haemhndaep, gou gwn caeuz imq le, cingq naengh youq sahfaz yawj vanjvei ndwencieng. Sawqmwh ndaejnyi miz vunz roq dou, gou haidou baez yawj, dwg daeggo caeuq nangzdaih daeuj laeng gou youz, dou song ranz vunz haujlai nanz mbouj doxcomz lo. Songde baez daengz, couh gyaez dwk mazciengq guhcaemz, hai mwngz daj ndawranz ok baihrog bae. Dou guh’angq gvaq- yinx dangqmaz, gyo’mbaiq mwngz lo.

Miz ngoenz ndeu, gou youq ndawranz sawqmwh dingqnyi miz maz doxgaiq doek youq gwnzndang mwngz, gij sing de yiengj baenzlai hung. Laxlawz dwg lwgbag, gwnzndang mwngz miz vunqsieng lai lo. Gou sim’in dangqmaz, couh siengj buet ok rog ranz bae hai mwngz haeuj ndawranz bae. Gvan gou sikhaek daih sing hemq hwnjdaeuj:“Mwngz mbouj aeu mingh la? Lwgbag baenzneix hung, danghnaeuz yaep ndeu moeb deng gwnzgyaeuj mwngz ne, uk luenh bw!”

Nyi naeuz yienghneix, gou doiq laeng song sam yamq, mbouj rox baenzlawz guh cij ndei, yawj- ngoengngoeng coh mwngz youq rog ranz deng lwgbag moeb, gij raemxda gou hix doek mbouj dingz.

Gou mbouj miz sim bae guh gij wnq lo, dan ndwn youq henz cueng yawj mwngz. Gvaq le yaep ndeu, mbouj doek lwgbag lo, gou doq cung ok douranz bae, hai mwngz haeuj ndawranz daeuj. Caenh doek lwgbag lo, gvaq le song sam ngoenz, Duh’anh Yauzcuz Swciyen dou couh miz binghraq, daengx aen yienhsingz cungj deng fung liux, dou ngoenzngoenz caez youq ranz, gyawz hix mbouj ndaej bae. Raen gwnzndang mwngz miz haujlai congh gumz roengzbae, itcig mbouj ndaej bae coih mwngz.

Caj daengz binghraq gvaqbae le, youh nyaengq guhhong. Cigdaengz cuengqgyaj le, gou cij ndaejhoengq bae coih mwngz, seizneix yienznaeuz gij yienghceij mwngz gaeuqyietyiet, ndawsim gou cix hai lumj vavengj, baenzbaenz mwngz lij hai ndaej, mbouj deng lwgbag moeb vaih.

Gyo’mbaiq mwngz——gyaq ci iq gou, ndaw fwn rumz cungj miz mwngz doxbuenx. Faenh cingz neix, gou baenz ciuhvunz cungj mbouj ndaej lumz.