Daihngeih’it Yw Gij Baksieng

Daj miuhsaenzvuengz haeuj mbanj miz duenh roen mbouj suenq gyawj ndeu, caemhcaiq ranz Ahveij youh youq baihsae ndawmbanj, gou gaemz heiq ndeu bongh haeuj ranz de seiz, gaenq baegfofo lo.

“Simjmehveij, Simjmehveij!” Gou doq heuh doq bongh haeuj ndawranz bae.

Simjmehveij daj ndawrug byaij okdaeuj, doq rag vengqbuh uet raemxda doq sing daemq naeuz gou:

“Gaej hemq, hawj Ahveij ninz yaep ndeu.”

“Gou daeuj soengq ywdoj hawj Ahveij.”

Gou yaengx song fwngz sang- vidvid, song bau ywdoj cingq sanq ok gij feih nyafaex.

Simjmehveij iet fwngz coux gij ywdoj gvaqbae, geizheih youh sim- angq cam:

“Dwg mbouj dwg Aulungzgveiz heuh mwngz soengq daeuj?”

“Yi, mwngz baenzlawz rox lwi?” Gou gag doeksaet.

“Cijmiz de miz gij ywdoj yw deng ngwzdoeg haeb lo, caiqlij, de sim gig……” Simjmehveij sawqmwh gangj mbouj ok vah lo, gou raen de raemxda naed dem naed doek youq gij ywdoj ndawfwngz de.

Gou gig doengzcingz de, caemh- caiq hix miz di mbouj gvaqeiq, aenvih gou mbouj wnggai dingq gij goj Aulungzgveiz le youh caegdingq haxbaenh songde damzvah, rox le saehgonq songde, mboujnex, mwhneix gou baenzbaenz cungj liuh mbouj daengz Simjmehveij vihmaz baenzneix simcingz fukcab caemhcaiq in’get.

“Baenzlawz cienq ne? Ahbyauh, vaiqdi lwnh hawj gou!”

Simjmehveij dawz song bau doq byaij haeuj ndaw bae, gou riengz youq laeng de, lwnh gij vah Aulungzgveiz daengq gou hawj de. Daengz ranzcauq le, de luenhlablab ra rek, dwk raemx, gou hix bang coemh feiz, coemh hwnj aen loz he, youh coemh hwnj aen cauq, song cungj ywdoj doengzseiz cienq.

Feiz ndawloz yubyab ciuq rongh le ranzcauq, hix ingj ndaej faj naj Simjmehveij hoengzhwdhwd, song lwgda hung de dauqingj gij raemxda ronghsaw, naengbak gaenjgaenj hob dwk, naedhanh gwnz byaindaeng lumj geij naed lwgraz nei, gou dawz fwnz oet haeuj ndawcauq, caiq cienq gyaeuj gvaqdaeuj yawj de.

Feiz ndawloz engq haenq lo, de naengh youq eijfaexcuk iq henz loz, lij mbouj dingz aeu fwngz bae beiz feiz, gou cingqngamj raen mbiengjnaj de, giuzndaeng sangneng, lwgda rongh- sagsag cingq cim aen loz, gou guj seizneix de itdingh cingq dauqngeix saehgonq, lumj youq henzdah guh- saeg, roxnaeuz youq gwnzbya gvej nya、bungz duz ngwzdoeg……

(caengz sat)