“Mwngz, mwngz heuh gou guh maz?” Gou sim mbouj dingh bae dap, “gou daj ndaw ndoengfaex baihde daeuj, cingq yaek maranz ne.”

“Cingq ndei.” De ndenq song bau nyinghfaex ragnywj hawj gou, “sikhaek bang gou soengq daengz ranz Ahveij bae.”

“Yw deng ngwzdoeg haeb?” Ndawsim gou ronghgywggywg, lij daegdaengq cam.

“W, Ahveij mbouj dwg deng ngwzdoeg haeb ha?”

“W! Lwgfwngz de deng haeb lo.” Gou ngaekgyaeuj dwddwd.

“Bau iq neix dwg cienq hawj de gwn, sam vanj raemxsaw cienq baenz vanj yw he.”

Gou iet fwngz coux song bau ywdoj gvaqdaeuj, hix coux gvaq gij saenqnyaemh de lo, haxbaenh gou gig saetmuengh caemhcaiq dwgcaengz de, seizneix gaenq youh fug de gingq de moq lo, youq ndawsim gou de dwg boux vunz ndei!

“Bau neix hung di hawj Ahveij naengj gij baksieng, aeu rek cienq goenj hwnj fwi, baihgwnz aeu baengz goemq hwnjdaeuj, heuh Ahveij iet lwgfwngz deng haeb haeujbae hawj heiqndat naengj, naengj ndaej yied nanz yied ndei.”

Gij vah Aulungzgveiz gig cingcuj gaek youq ndaw uk gou, de caen lumj boux canghyw ndeu, daengq ndaej ciengzsaeq fouzbeij, gou iet fwngzswix coux gvaq bau ywdoj hung haenx, de youh bouj le coenz ndeu:

“Geiq maenh, bau iq dwg yw cienq gwn, bau hung dwg cienq aeu fwi naengj fwngz.”

“Gou geiq maenh lo.”

“Baenzneix doq bae ba.”

Gou buet le song yamq, baenq gyaeuj daengx roengzdaeuj baez yawj, de lij ndwn youq gizgaeuq.

“Aulungzgveiz, mwngz vihmaz mbouj gag soengq bae?”

Gou cam coenz vah neix mbouj dwg ndojgik roxnaeuz lau mazfanz, cij dwg Aulungzgveiz goj caenndang soengq bae, hix ndaej hawj meh Simjmehveij gyo’mbaiq de, mboujnex Simjmehveij lij haemz de mbouj nyienh gouq Ahveij ne.

“Yi—— Lwgnyez buet ndaej riengjret, beij gou lij vaiq, doq bae!”

De vad fwngz coh gou, lumj duq duzgaeq nei.

Gou mbouj miz maz ndei gangj lo, baenq gyaeuj couh buet.

(caengz sat)