Vunzlai siujsoq minzcuz caeuq gyong miz yienz dahraix, lumjnaeuz aennyenz Bouxcuengh、gyongraemx Bouxdaez daengj. Miz gyong couh miz foux gyong. Youq Sanglinz Yen Cinhih Yauzcuz Yangh、ranghdieg gapgyaiq Sanglinz Yen caeuq Majsanh Yen, lij riuz miz cungj foux gyong gaeuqgeq ndeu, de couhdwg foux duzlingz ndaek gyong.

Cienzgangj, gaxgonq vunzdig bae hah mbanj Yauzcuz, bouxvunz ak Yauzcuz Bunuj doxcomz gak mbanj beixnuengx hoenx vunzdig. Miz ngoenz ndeu, gyoengq beixnuengx Yauzcuz youq ndawndoeng ngaiz loeng, caeklaiq miz duzlingz vuengz laux ndeu daiq roen, daiq gyoengqde okbae. Rox roen le, beixnuengx Yauzcuz ndoj youq ndawndoeng, gvax bae gvax dauq, doq byaij doq ndaek gyong bae yaeuh vunzdig. Duzlingz vuengz caemh daiq gyoengq lwglan de youq henz banghemq, sing goksat lumj miz cien vunz fanh bing nei, hwk dwk vunzdig lau liux. Beixnuengx Yauzcuz couh buekluenh okbae dwk deuz vunzdig.

Ngoenz ngux nyied ngeihgouj, gak mbanj beixnuengx Yauzcuz hoenxciengq dauqma. Bunuj guh bouxdaeuz daep mauhngeg ndaek gyong, gyo’mbaiq duzlingz bang- coengh, foux duzlingz ndaek gyong couh baenzneix miz lo. Aen foux neix geiqmiz caiq ciepcienz le gij lizsij ronghlwenq haenx. Vih geiq- niemh hozbingz, vunz Yauzcuz bibi youq mwh de gvaq cietcieng Yauzcuz, gaj yiengz、 duk faengx、guh ceiz- ndek, lij diuq foux duzlingz ndaek gyong bae gyo’mbaiq duzsien caeuq cojcoeng.

Gij gyong ndawfoux dwg gyong- naeng. Gyongnaeng caeuq gyong- doengz doxdoengz, cungj dwg doengh- gaiq cwx ndeu, mbouj ndaej luenh mo, cijmiz boux lwgsae gaenq baiqnyinh bohsae haenx cijndaej hag gij dinfwngz ndaek gyong. Ciuhgeq, gyongnaeng hung naek, aeu 12 boux vunz cij ram ndaej hwnj, baeznaengz cuengq youq gwnz laeuzgyong, cienmonz miz vunz bawx dwk, dwg gij dijbauj ndawmbanj. Aen gyongnaeng guh ndei le, aeu gvaq sam baez youzdoengz bae goqhoh, goengsae coengzging sam hwnz sam ngoenz, baez guh buizsax cijndaej yungh, bouxyungh yaek cai caet ngoenz caet hwnz, hawj gij fapdauh ndaej diuz. Hoeng, haujlai aen gyongnaeng gaeuqgeq senq mbouj raen lo.

Gij neiyungz caeuq fuengsik foux gyongnaeng lai cungj lai yiengh, ciengzseiz dwg ndaek gyong、diuq foux、buenxyaem caeuq buenxciengq doxgap. Hainduj dwg goengsae foux《Fouxsamyienz》 bae caeq gyong gonq, sat le biengj baengzhoengz gomq aen’gyong hwnjdaeuj, sam boux vunz- ndaek gyong cix haenqrengz roq. Buek beixnuengx Yauzcuz ndeu cangguh duzlingz (4 daengz 12 vunz) okdaeuj, song genfwngz caeuq hwet loq goz, song ga loq maeuq, doq diem ga doq daemh din. Duzlingz vuengz aeu fajfwngz roxnaeuz genfwngz ndaek gyong naeng hung, duzlingz lwg riengz sing gyong foux bae foux dauq, mizbaez guh najgyaj, mizbaez bang duzlingz vuengz viz beiz, mizbaez caeg gwn gij laeuj ndaw lwggyoux duzlingz vuengz. Gij dungcoz de bi nungj bi nangj, foux gwnz foux laj, ndeiriu dangqmaz, ndigah duzlingz ndaek gyong youh heuh duzlingz vuengz caemz gyong、gyoengq duzlingz caemz gyong.

Foux duzlingz ndaek gyong Yauzcuz laeng Sanglinz geiqmiz gij lizsij caeuq fungsug ndwenngoenz beixnuengx Yauzcuz, yienh’ok le vunz Yauzcuz caeuq swhyienz doxhuz caezyouq, dwg gaiq dijbauj vwnzva minzcuz yizcanj Lozyez baih Lingj- nanz.

(Swhliu daj Sanglinz Yen Vwnzva Gvangjden Dijyuz Caeuq Lijyouz Giz aeu)